3月27日 (星期二) 晴
大風,溫度:1度-15度
"日本三景"除左宮島大鳥居之外
其餘兩個分別係京都丹後嘅天橋立 (網上圖片)
宮城縣嘅松島(網上圖片)
京都丹後嘅天橋立都係白加煎其中一個有可能成行嘅地方
至於松島........就未有哩個打算
對於需要由東京落腳嘅地方,暫時依然無興趣
日本三景之中,個人覺得最有睇頭都係宮島嘅大鳥居
大鳥居嘅興建時間係1555年,全個共重60噸
佢只係放响地上,並無任何結構藏入地下
滿潮,乾潮嘅大鳥居,完全係唔相同嘅氣勢
如果要睇到嚴島神社浮响水中,咁滿潮嘅潮位就要係250cm或以上
如果要步行去到大鳥居,咁乾潮嘅潮位就要係100cm或以下
哩日嘅滿潮時間係11:54,潮位大約係301cm
乾潮時間係18:11,潮位大約係36 cm
咁當然係要响宮島逗留一日,睇晒兩個景色先不枉此行啦!
鳥居係日本神社建築物,用以區分神域同人類嘅居所
簡單講鳥居就等如分隔天界,人間嘅"門"
鳥居(とりい),响日文中,漢字嘅"鳥"都解作為雞,咁鳥居即係雞居啦!
其實咁講又唔係"亂up 24"
據神道教嘅傳說,因為"天照大神"唔鐘意佢細佬,所以就"哩埋"响山洞仲用石頭塞住個洞口
結果人間無左太陽,咁d人就諗方法要引"天照大神"出黎
佢地起左一個高支架,仲放好多公雞企响支架上由得d公雞啼叫
咁嘈!
"天照大神"八卦之下推開石頭看個究竟
當石頭一推開,即刻就俾d大力士頂住石頭,仲合力推開石頭
咁樣世界先得以重見光明,所以傳說中鳥居本來就係"雞架"
滿潮時會有"櫓欋舟"撐到大鳥居觀光或者參拜,大人800yen,小童400yen
每次大約有20分鐘參拜
觀光時間
睇返哩d看似相當風和日麗嘅相
白加煎都係講嗰句:實情係凍得緊要
大風到不得了
宮島嘅勁風並唔係"嵐",而係真正"風繼續吹",唔係一陣陣間歇咁吹嘅嵐
响海邊影完幾張相,連手都凍到彊
d相睇落相當寧静咁樣,事實上當日係旅客非常多
宮島以前被稱為嚴島,所以嚴島神社就係島上最大嘅神社
以前要去嚴島神社參拜嘅話,係由海上開始,大鳥居就正正聳立响神社前面
(以下係網絡圖片)
旅客遊嚴島神社,就會排隊面向神社以大鳥居做背景位置留影
白加煎得一個人搵邊個幫手影相呢?!所以索性連300 yen入場費都慳返,過門不入
只係見到哩d人潮都已經唔想入去影相,實在太多人會做"騎呢啡"喇!
嚴島神社後嘅五重塔,興建於1407年
宮島都有賞桜之地:"うぐいす步道",嚴島神社,多寶塔
不過觀光當時宮島嘅桜只係以下哩個模樣
不過世界上又唔係只有桜係最美,其他花卉一d都唔輸蝕
响桜未黎到之前,佢地都可以勝任做主角架!
きれい!!!
豊国神社 (又稱:千畳閣)
興建於1587年,豐臣秀吉為供奉陣亡嘅將士而下令建造大經堂為已亡將士誦經
豊国神社嘅面積正好係857張榻榻米,千畳閣哩個名稱就係咁樣得來
不過神社未完功,豐臣秀吉就去世,工程都因為咁而無了期停工
(即係爛尾?仲爛足幾百年.........
,如無意外會永遠爛落去)
响宮島嘅手信中,紅葉饅頭係代表作之一
哩間店舖睇落好似係比較歷史悠久,而且佢唔係响商店街
雖然未食都知係乜味道,不過天氣太凍,都係需要保持身心溫暖
睇在哩間舖頭有個暖爐俾客人休息一陣
咁都值得俾75 yen買一個黎食
熱茶自助任飲
哩個係つぶあん(即係紅豆粒餡) こしあん(即係紅豆茸饀)
還好啦,唔係太甜!不過唔食都無損失
沒有留言:
張貼留言