大風
氣溫:5度-12度
晨咁早就起身食完個豐富早餐就搬酒店,終於都離開哩間"有漬房間"
第一時間去東橫check-in,擺低行李先出發去觀光
响日本坐電車確實係唔平,身為遊客要知慳識儉都要之前做足功課
哩張1日乘車劵唔係新鮮事
以前叫No My Car Day Pass宜家新名稱係 Enjoy ECO Card (詳情請click)
平日係850yen,星期五或者每月20號就有優惠價600yen
宜家改左喇~價錢不變,只係改為優惠價600yen適用於星期六,日+公眾假期
咁咪仲着數左
購買方法:
最後記得要襟銀碼,咁先會出票
雖然Enjoy ECO Card網頁入面話可以不限次數乘搭大阪全線巴士
不過係唔包括JR巴士
所以哩日要轉駁JR巴士時係需要另外俾錢
買左哩張票,咁就代表哩日會去得遠d,又或者去多d要坐車嘅地方
算死草嘅白加煎
响大阪而又唔買pass嗰日,通常都只會响同一區出沒咁頂多都只係一來一回嘅電車費
咁並唔係鼓勵孤寒,而只係支持錢要用得合理,應洗得洗,唔應洗就留起佢備用
例如:食得豪d,益自己個肚好過益交通機構
香港政府鼓勵"家庭有計劃',白加煎鼓勵"旅行有計劃"
不過特首鼓勵市民生3個黎令一般平民父母一生為兒女做奴隸
但白加煎就係鼓勵人要留錢黎自我行樂,咁到底邊句啱聽d呢?
癈話少說,咁哩日到底要攀山涉水去邊呢?
見到哩架電車,不過唔係去環球影城?
哩架電車只係响行程上,中途轉車時遇到,唔坐都影張相啦!
是日行程係去參觀怪樓,唔好睇佢古靈精怪,其實佢大有來頭
知道佢嘅幕後主腦人係乜水嘛?
幕後主腦唔係叫"乜水",而係叫"百水"
Friedensreich Hundertwasser (1928-1991)
(德文"Hundert"=英文嘅Hundred,而Wasser=英文嘅Water)
大樓入面有展覽廳,就咁睇模型,可以一眼睇晒百水先生嘅建築設計&名畫
可以估到哩幢出自名家手筆嘅建築物係乜野呢?
舞洲工場分開兩部份,下面哩個係另一幢大樓
睇埋內裡嘅大型機器模型,咁可以估到係乜未?
其實大阪舞洲工場係垃圾處理場,夠唔夠震驚???
連垃圾處理站都要出自名師手筆!!!!係咪有d好大喜功之感呢?!
出發前上網頁睇
講明參觀要預約咁其實白加煎都只係打算影下"百水先生"嘅傑作就走人
但係當日去到大門口,已經有幾個職員好似香港選舉投票日咁嘅情況
企响度笑晒咁話歡迎大家入內參觀.........乜可以參觀架?無預約到喎!
一場黎到只係過門不入又好似有d唔俾面
所以白加煎就拉人衫尾咁跟住前面一家三口日本人咁入內參觀
哩日係星期日,基本上係無垃圾處理嘅運作
只係有少數職員要把守崗位,繼續一d無得停落黎嘅工序
除此之外,响每個區域都有工作人員為參觀者解釋或者做示範小活動
其實哩度係免費參觀,點解佢地會咁熱心
星期日都要返工做哩d同處理垃圾無關嘅工作???
參觀完畢要填一份簡單日語問卷
其中一條問題係:為乜你會黎參觀?白加煎同個工作人員講(日文) :"我唔係日本人,只識少少日文架咋喎!"
個工作人員相當友善咁答:"如果睇得明少少,都請你填啦!"
填完問卷臨走又塞左一堆紀念品俾白加煎
明明係一人送一個磁貼,佢地就全套4個咁塞俾白加煎
好似相當感激有人客黎參觀咁樣
後來白加煎只係留起左個背心環保袋,另加一枝uni (0.7)黑色原子筆帶返香港
(原子筆並唔係白加煎唔記得還返俾佢地,而係佢地話唔收返,請攞返去繼續用
)d磁貼上面係完全漢字,仲要係簡體字咁寫住"舞洲工場,来場記念"
百水先生嘅傑作都即刻down grade晒,真係見到都唔開胃,唔丟唔得
等佢地再回魂返黎哩度做最後的葬禮,化作一陣輕煙啦!
直到宜家白加煎對哩d咁過度熱情嘅款待,仍然係百思不得其解
哩次雖然係亂打亂撞咁黎到參觀,不過都好過百無聊賴咁响大阪shopping
話晒參觀哩度都係d可以增廣見聞
內部參觀
每一部份都有圖版說明+真人解話嘅介紹
當垃圾車將垃圾運到哩個工場,咁就開始垃圾嘅最高榮譽葬禮
能夠响死前都可以入哩間出自名師手筆嘅"龍宮",咁仲唔係風光大葬?
哩個超巨異型大爪,每次可以爪起相等6架垃圾車所運送嘅垃圾
哩d垃圾就係咁樣攤响哩度等運到(=等被"抓")
哩度全場大約係40米(長) x 40米(闊) x 20米(深),相片只係其中一部份
垃圾燃燒嘅過程中會產生有害物質,有害物質會經過特別處理後
先會再對外排放
垃圾經過燃燒後就會變為灰燼,由原來嘅體積縮細15倍
燃燒過程中嘅熱力更加可以發電
垃圾被燒為灰燼,就會貯存响一個洞穴入面
簡單講,哩度嘅垃圾處理係用燃燒法將垃圾化為灰,咁就可以省下儲存垃圾嘅地方
燃燒前首先要風乾d垃圾,咁先可以進入燃燒階段
上圖咁大碗垃圾化成灰之後,重量減少5倍,體積會縮小15倍
燒成灰之後會洒上水防止吹散,之後先會再度將灰風乾
响燃燒垃圾過程中所發出嘅熱力仲用可以用黎發電
全個工場最大發電量係32000KW
哩日工場係半休息運作,當時都有9520KW發電量,足夠令19040部家用吸塵機運作
响youtube搵到有人跟旅行團,行程(被迫)包括參觀舞洲工場
有團友將參觀過程拍成短片,因為有導遊在旁翻譯,咁就可以更加明白全個過程
有興趣增進知識,不妨click以下網址 (一共8段短片介紹)
http://www.youtube.com/watch?v=ua8aZNnrljc
參觀完畢係自由影相時間
以下相片中嘅建築物係另一邊嘅大樓,同樣都係出自"百水先生"嘅手筆
哩日天氣就咁睇可以形容為風和日麗,不過實情係地方空曠,凍到嘔又吹到癲
哩個季節响日本,"嵐"係失驚無神就會出現嘅天文現象("嵐"即係暴風)
响哩個小公園就再繼續發生(半)黑仔事件簿之
當白加煎set 好腳架想影張自拍照之時
一陣"嵐"吹到,相機即刻連埋腳架一齊碌街
碌到連電芯都嘔埋出黎
吓?!當場斃命?!
白加煎嚇到傻左,如果無左部相機,咁之後10幾日行程點算?
即刻買返部傻瓜機?.........但係白加煎考慮重投單鏡反光機行列
唔想浪費當年求學時期阿sir對白加煎嘅指導+讚許
吓!
唔通真係要用2萬-3萬yen响日本買部傻瓜機頂擋?咁白加煎心儀要買嘅單鏡反光機仲有得剩嘅?.......哩個時候嘅白加煎係欲哭無淚
(半)黑仔事件即係黑又黑唔晒
部傻瓜機的確係嚴重內傷
間歇失靈但又未到受終正寢咁嚴重,咁樣先仲有以下哩d相
唔夠20分鐘,再黎(半)黑仔事件簿之
參觀完畢踏出大門,除低一隻手袜順便影埋哩張門口招牌相片
影完之後離開行左一小段路,發現唔見左一隻手袜
回頭一看,就係跌左响哩個招牌位置,咁就快步去執啦~
正在彎身去執之際,突然又刮起一陣"嵐",腳前嘅手袜就好似有魚絲連住咁,一吹就吹出大馬路
情況同睇緊電視台嘅大整古節目一樣
哩區馬路上嘅車的確唔多,不過"嵐"仲未吹完,跑出馬路都唔代表一定執得返
黑仔嘅白加煎自知霉氣纏身
無必要搵命去執返一隻手袜之後全個行程都係一隻手袜捱過每日嘅寒風
白加煎唔係無諗過响日本買手袜,但係根本買唔到,3月下旬嘅日本,春裝都出籠喇
買手袜?唔該冬季時請早!
關於大阪舞洲工場
沒有留言:
張貼留言