2012年一人黑仔之旅DAY 2@京都(日劇"種"毒)

 

(以下係日劇"仁醫"劇照)






3月24日(星期六) 下午天晴  溫度:10度-13度







離開白川就行去河原町通,哩個係哩次行程中鎖定要去嘅地方朝拜

Circle K便利店?!.......到底有乜好睇

自從白加煎睇完兩輯"仁醫"之後,對坂本龍馬嘅事蹟好有興趣

日劇中,仁醫去到江戶時代,改寫左當時部份歷史,咁到底本來嘅歷史係點架呢?



劇中,即使歷史因為仁醫嘅出現而改寫左少部份,但坂本龍馬最後仍然都係被暗殺而死

(以下係日劇"仁醫"劇照)

哩次係行萬里路之前,就讀定萬卷書

白加煎响網上睇左部份坂本龍馬嘅生平事蹟 

去到日本坐高速巴士時再詳細咁睇佢嘅事蹟



坂本龍馬响33歲生日當晚被人伏擊暗殺身亡

而Circle  K 嘅原址就係當年進行暗殺嘅近江屋

當年一齊被暗殺嘅,仲有佢嘅友人: 中岡慎太郎







坂本龍馬响日本人心目中嘅形象係"不為過去所拘泥,永遠走在時代前端"

睇佢和服配皮靴就知佢當年係潮人,內外都潮

望住今日車水馬龍嘅河原町通,腦海中就出現仁醫响江戶時代嘅畫面

實在係有d難以想像,昔日今日





白加煎記得2006年一個人到關西旅行時

某個晚上途經哩度都見到哩個木牌,當時都停低望左一眼

心諗:坂本龍馬?邊個黎呀?坂本龍一同佢有乜關係?


當年白加煎係徹頭徹尾嘅無知識,通通都唔識

相隔5年後,白加煎再無哩個疑問坂本龍馬?!

哦~哦~至少識佢唔係老鼠,係龍馬




坂本龍馬响日本係相當舉足輕重,只係响京都,除左哩塊"遭難之地"嘅石碑之外

响円山公園有佢同中岡慎太郎嘅石像,响二年坂有佢地嘅墓地

咁白加煎對佢只有好奇而唔係崇拜,睇完當年佢嘅葬身之地都夠喇!

未到要為佢掃墓嘅地步






兩條街之隔,仲有另一個遭難之地,哩次嘅主角係本間精一郎





哩個本間精一郎就真係唔知佢係乜水?

又可能相隔5年後,白加煎就會識佢係乜水,咁就要睇下邊套日劇係用佢做題材,而收視又唔錯喇!

咁今日就影低張相先














响日本逛超市,係白加煎最樂而忘返嘅事,所以每晚去超市買晚餐係相當興奮




晚餐有主菜, 冷盤, 甜品, 零食,唯欠五穀類



日本嘅冬天係士多啤梨季節,不過白加煎最愛都係夏天至秋天嘅巨峰提子

士多啤梨確實要買d價錢比較貴,大約500yen或以上先有保証

白加煎都係貴精不貴多嘅人,價錢一樣就寧願買d份量少d

咁都保証到甜美,下面黎自小豆島嘅就合符晒貴精不貴多嘅原則

498 yen,份量係9大粒,哩個係全個行程最甜美嘅士多啤梨

  

日元高企,以往去日本例必唔會錯過百貨公司食品部嘅蛋糕

以前400-500yen一件蛋糕覺得價錢都可以接受

但當日元去到100yen=$10

 $40-$50一件一人前蛋糕?! 太貴喇



所以哩次改行食各式布丁,不過白加煎都一樣有指定要求,唔係任何布丁都可以入口




2009年,白加煎响日本旅行,食過"心領"出品,因為香港d日式超市都可以買到

如果好味就可以返到香港繼續買黎食,以慰解單思之苦,之不過.....

"心領"出品就真係心領就夠喇,唔好客氣!


因為佢實在係同"好食"哩兩個字,絕對拉唔上關係

詳文請看:一個人浪盪日本2009-Day 12@大阪(食住篇)


上次住民宿,民宿太太請白加煎食過好好味嘅咖啡啫喱

係"脫印"出品,咁哩次當然係要揀"脫印"入口啦!

17日行程,白加煎食左以下圖片中加左星星符號嘅"脫印"出品

如果"脫印"唔掂,白加煎都唔會食足9個咁多啦

雖然唔係個個都好好食,但至少口感佢做得到係布丁,而唔係彈牙化學品

後文再逐一介紹

哩一晚被選進入決賽嘅"脫印佳麗"係以下兩位





左邊係STRAWBERRY SHORT(CAKE), 右邊係栗原さん抹茶布丁

哩個STRAWBERRY SHORT(CAKE)個賣相真係相當好,但內涵就有cheap嘅感覺

頂層: DOUBLE CREAM,   第二層:STRAWBERRY JELLY

第三層:CUSTARD,   底層:STRAWBERRY SAUCE

STRAWBERRY JELLY哩層太搶味,所以成個甜品都CHEAP晒

CHEAP到似只係啫喱而唔覺得有CUSTARD



不過無可否認"脫印"嘅奶係好有質素頂層嘅DOUBLE CREAM係全個甜品中最好味嘅一層




栗原さん抹茶布丁嘅味道&口感都唔錯,不過錯在佢附加左一包LEMON SAUCE

抹茶+檸檬味=怪




哩次行程除左支持"脫印"之外,仲繼續支持"卡落D"

下面左邊嘅明太子PIZZA味,係相當GOOD

右邊哩個係香港都有嘅CHEESE BIT,味道同香港賣嘅一樣,但係日本超市大減價

咁就買定一包守門口,事實上日日都食薯片都有d 膩口