文章日期：06/06/2010 12:27 pm
雖然話考試進入最後準備既日子, 不過有時留响公司食飯
都可以睇下戲黎送飯,又兼可以順便練下"聽解"
咁都係可以輕鬆幾十分鐘
劇名:ATTENTION PLEASE (中文譯名:空姐特訓班)
主演:上戶彩,錦戶亮,相武紗季,小泉孝太郎
呢輪諗諗下,為咩自己會對日本國產既航空公司咁支持?理由係咩呢?
托賴次次坐飛機都無驚無險又暫且無黑仔事件要貼錢睇空姐面色
所以空姐既服務對我黎講,基本上間間都係差唔多
咪係一般送餐,派報紙,機上販賣服務...等等
諗諗下,我一方面相信日本人對服務業既要求係比較嚴格
所以我相信日本公司既水準會比較高
另一方面,我好懷疑自己係睇完呢套"Attention Please"之後
就入迷左咁絕對相信呢d就係日本人既機艙服務
"港產"同"日產"航空公司既機票價錢都係相差無幾,咁為咩我唔買個"黑仔保險"
萬一真係有阻滯事發生時,至少唔會仲要睇d"空中大姐/大少面色"
唔會貼錢買難受,頂到一肚氣
呢套戲由JAL(日本航空)做贊助既,雖然唔係我最支持既ANA
不過我都相信日本既機艙服務員(簡稱為cabin)既訓練都係嚴格
呢套戲由睇第一集直到最後一集
每一集都有相同既同感,就係"嘈吵..."
3個女人一個墟,咁呢套戲係講空姐既訓練,所以每一集入面都有幾個墟
雖然係咁講,原來上戶彩把聲幾好聽架喎
佢講日文時d高低音同語氣輕重好明顯,把聲唔巴渣時都幾溫柔清脆
我就係鐘意呢d人講日文,聽到我好冧呀!我鐘意呀!
劇中美咲洋子(上戶彩飾)既性格係多咀,男人婆,又反叛,又逞強...
所以絕大多數既嘈吵係黎自佢
不過即使再嘈吵都睇完全套戲
當然係套戲都有吸引力啦!
不過有點不能相信既係一個咁唔認真又反叛既學生
點解咁大間航空公司仲唔一早炒左呢d人
,踢佢出校啦!
(咁睇戲就唔好駁戲,就係要講"頑女"都會改過自身)
即使洋子既學習態度咁差
但佢都有老友,甚至有本來係敵視佢既同學
結果都同佢老友左,大家關係融洽,互相扶持
(其實真實生活中,女人邊度會咁易咁大方唉!可以唔記仇,不過唔代表要變成好友!)
睇完呢套戲之後,就明白點解一張機票動輒要過千元
事實上全部機組人員都付出好大既努力,咁先可以將乘客安全送到目的地
次次坐飛機係出門去玩既心情,所以都唔會咁得閒諗d咁理性+感性既事
原來响日本要成為空姐真係好嚴謹
簡單如响飛機上拉布簾都要練習好多次,唔可以拉到發出足夠打擾乘客既聲音
不過我印象中,响飛機上都曾經聽過拉布簾既聲音喎
其實戲中係咪有d誇大既呢?
不過點都好,有一d內容相信係真既,例如:
空姐鞠躬分為3種:點頭係15度傾斜,一般打招呼係30度,道歉係45度
由始至終要望住對方既眼睛
仲一定要係講完野先鞠躬,全部有晒先後次序
(呢d規舉相信只限於咩都要鞠躬既日本國產航空公司)
仲有,起飛時既3分鐘,着陸時8分鐘,事故多數發生响呢11分鐘內
所以呢段時間被稱為"魔之11分鐘",即係critical 11 minutes
咁呢d都係常識
劇中洋子自細都係一個男仔頭
咁點會立志要做客室乗務員 キャビン‐アテンダント(cabin attendant)
不過就為左自己心儀既男子所講既一句戲言,咁就踏上cabin之路
由最初既唔認真,直到最後立志要做好呢份工
劇中有一個角色係我好主觀地鍾意既
就係三神たまき,佢係洋子既教官(真矢みき飾)
真矢みき同黑木瞳,天海祐希一樣,都係系出名門-寶塚劇團
其實真矢みき所做過既好多角色,我都幾鍾意
佢成日都做好多有智慧又獨立既現代女性
雖然唔係有天姿國色既美貌,不過有智慧又高貴既女人的確係有吸引力
至少我係咁諗,咁佢又的確係有呢種氣質
但係劇中有乜理由搵小日向文世黎襯佢先得架?呢個配搭完全無說服力
三神教官既用心教導,打動左洋子,令佢終於肯認真地面對cabin呢份工作
劇中,三神教官對唔認真學習既洋子似乎又係有d留難咁
起初洋子都唔妥佢,後來到可以正式上機做現場訓練時(簡稱OJT)
全部同學都通過考試合格參與OJT時,三神教官就偏偏要洋子"留班"
無了期咁留响課室重做各種訓練
响呢d情況之下,個學員仲唔憎死個教官咩?!
但日劇之中又係好少會顯露呢d咁真實既人性
洋子無嬲三神教官,只係自己一個人响度沮喪,發脾氣
 
如果有打算坐日本國產航空公司去日本既人
不妨花少少時間睇下呢套戲
見到佢地既訓練,至少都會多一份安全感黎乘搭佢地既航班
唔想睇晒全套,至少都睇第十集同最終回
其實全套戲都唔差,只係洋子巴巴渣渣咁嘈吵左少少
劇中各式既緊急逃生訓練
|
如果想比較"日本產"同"港產"既航空公司班空中服務員,咁一定要睇第十集
"日本產"既空中服務員既EQ果然係高過"港產"既
乘客鼓燥時,唔可能仲要鬧乘客,反而係要道歉,道歉,再道歉
呢d先係專業服務水準
