2014 日本之旅 DAY 2 @ 京都 - 京都之行只為食

2014年5月4日～星期日，京都天氣

越近中午，嵐山哩度水泄不通，周圍都係人，仲見到哩三個藝妓打扮嘅女子

响京都如果要碰運氣撞到真正嘅藝妓，咁花見小路嗰邊先係真正藝妓嘅出沒之地

而且通常佢地嘅出沒都係快閃黨

所以黎到嵐山可以見到嘅大搖大擺又大無施樣嘅藝妓

通常都只係响出租服裝店租和服影相，打扮成藝妓嘅"偽妓"

不過就算係A貨，佢地都引起連串哄動，附近嘅人圍着黎舉機影相

咁白伽煎都唔執輸影埋一份

大熱天時見佢地三個着成咁，仲化咁厚裝，真係熱鬼屎左佩服！

時間唔早，先係坐車去醫肚

下一個目的地係烏丸

由嵐山站去到桂站之後，全車人落晒車

白伽煎呆左咁無動於終，可能係餓到唔太清醒

結果原來電車係開返去嵐山，無黎啦位遊車河嘅白伽煎响上桂站落車轉月台出返桂站

結果都等左15分鐘先有下班車

去到烏丸站係轉京都市內電車，哩次都係第一次坐京都市內電車

其實都只係坐兩個車站响四条站，京都市役所前站落車

其實坐阪急電車响三条站落車都可以

但因為上次响京都揾哩間食店時迷路太耐，所以今次就索性跟住食店網頁所指

响京都市役所前行去，應該唔會失拖啦！

第一次見識嘅京都市內電鐵

落左車一出就係京都市役所，哩次為食而專程去京都嘅主角

大約會响５分鐘後就出場

响市役所左邊轉入小街，主角就係：末廣壽司

去到哩啲遠離左景點區嘅小店，好處就係唔需要等位

哩次去京都朝拜嘅主因，就係為左さばずし（鯖魚壽司），已經係第二次光顧

日本消售稅由5%加到8%

さばずし都由兩年前嘅1850日元加到2000日元，不過日元兌換價比起兩年前係低左

總之出門去旅行就無謂慳住個荷包，响香港俾更多嘅錢都好難食到哩個質素

一整條係4000日元，哩度係半條嘅份量，哩個份量啱啱好

皆因為仲有位置去食其他野

白伽煎嘅為食原則係：唔會為一棵樹而放棄整個森林

仲未講いっただきます，幻想中已經見到啲鯖魚向我招手

因為肚餓而引發思覺失調？還是因為單思病而引起幻覺呢？

唔得閒去考究咁多，其實碟醬油係浪費，好食嘅野必定係原味已經夠殺食

根本就唔需要其他調味黎吊味，況且醬油係必定有啲味精，食完必定會口渴

所以唔食醬油都唔可惜

入口完全係超美味しいがっだ！滿口都係豐盈嘅OMEGA 3

連結＞兩年前响相同食店嘅鯖魚體驗

食完野响車站下面嘅商店街逛左陣，都有所斬獲

其實係受同事所托，買到佢地嘅心頭好

食完又買完，坐返阪急電車返大阪

點知就勾起了當年响東京上班時間坐電車嘅＂三文治回憶＂

日本連續四日假期嘅黃金週，一早預左係人多

响阪急三条站上到架飛站快車，心入面暗喜啦

起初電車入面仲有空位嘅，不過每停一個站，落車嘅人都唔夠上車嘅人多

人人都想搭到飛站快車，所以就算無乜空位，月台嘅乘客都唔理得咁多

死迫死推咁企圖可以上到車

企响門口旁邊嘅白伽煎見勢色不對，以減少遭人抽水嘅誤會

白伽煎由面向車門變為背向車門，咁至少仲可以呼吸到

 


不過死迫入車廂嘅人，相片中嘅哩位人兄就大安旨意咁壓實白伽煎



白伽煎能夠將上身移前少少，哩位人兄就再移後少少

咁即係無論我如何地想避開佢佢都係死要壓住我

好彩只係背脊啫，如果係前面，咁真係蝕底晒啦！



最難頂係飛站車，車站同下一個車站嘅車程可能係10分鐘或者更長

經歷過响日本迫電車，香港迫地鐵真係唔算係一回事，小小小兒科黎咋！

返到大阪隨即去左梅田，哩次行程留响大阪嘅時間只有兩個全日

所以要把握時間買野  所買嘅都係受人所托嘅野

睇到忘晒形，本來諗住去難波食晚飯，結果都係無能為力，又攰又餓

阪急百貨食品部仲未關門，入去睇下有咩買

半價嘅刺身，後來响便利店買沙律 

百貨公司嘅刺身的確比超級市場嗰啲品質係更好

 　哩晚有肥美嘅拖羅(TORO)

  

仲搜到一件檸檬MOUSSE CAKE，本來都怕佢似清潔精味

不過睇佢個樣又好鬆，好FOAM咁樣，都係抵不住佢嘅誘惑

結果係：

完全無清潔精味，而且口感真係好FOAM，都算白伽煎有眼光，有品味

 

哩晚嘅零食係 "家落啲"米果圈，普通平凡無咩特別

反而係明治哩隻綠茶朱古力就相當唔錯，綠茶味好濃又唔太甜

2014 日本之旅 DAY 2 @ 京都 - 醉翁之意不在酒

 

2014年5月4日～星期日，京都天氣





罰企咁企左一個鐘頭嘅電車，終於黎到嵐山

 

 


天氣好到不得了，萬里無雲咁～曬 見到哩個陽光都估到有幾咁～熱！






出左車站見到mini stop，二話不說入去睇下

其實為咩店名係mini stop呢? 百思不得其解

白伽煎每日都有飲牛奶嘅習慣一見到哩個＂高千穗牧場＂嘅乳酸奶，就如獲至寶一樣

黎到日本更加可以用合理價錢品嚐到和牛嘅乳製品

 

 

 

由2009年第一次响北海道品嚐過哩種乳酸奶後，白伽煎已經一飲定情

今次响日本仲試左唔同牌子同各式口味，又可以扮食家品評一下喇!

  

 

其實香港嘅日式超市都買到，不過價錢係令人咋舌

 

 

 

相同牌子，相同份量，價錢係由163日元對比$ 40.9

 

即係$12.5 對比 $40.9，咁樣～點買得落手，點飲得入口？

 

 

哩次白伽煎响日本確實係飲番夠本，估計都慳左有$200左右

 

 

 

 嵐山行程正式開始，其實哩次只係揀左渡月橋，嵐山公園，仲有野宮神社

 

 

朝早10點多啲，遠鏡睇落都還算清靜未算好多人

 

 

 

近鏡一睇就點都唔會叫哩個情景為＂唔算好多人＂

 

 

 

 

哩個係松樹，見到佢就自然聯想到長頸鹿，かわいいね

 

京都好易見到哩啲人力車伕

 

 

影左一陣相，人就已經越黎越多

 

 

响河上可以泛舟划艇，又可以坐觀光船

 

不過白伽煎一個人就唔會咁詩意去泛孤舟，對坐觀光船又無乜興趣

 

 

 

反而有啲興趣睇船夫撐杆，咁撐法其實都幾辛苦

 

 

 

 

 

 

行下行下就到竹林，人多到連用心影張都唔得，週圍都係人

 

 

 

野宮神社係無入場料，都係因為咁白伽煎先會揀黎＂到此一遊＂

 

 

 

 

野宮神社係供奉交友結緣、入學升學學問之神嘅神社

 

所以黎祈愿求籤參拜嘅人，多數都係有以上憂慮嘅年輕善信

 

 

 

 

去到中午時間，嵐山多人到不得了，可以用＂插針都插唔入＂黎形容

 

間間食店都擠滿等位嘅人，連小食檔都迫滿人

 

哩個時間都係白伽煎去覓食嘅時間，哩次行程嘅嵐山一行都告一段落

 

 

其實哩次去京都只是借遊嵐山之名，主角要下一篇先會出場

 

 

 

 

下站係邊個車站呢？..........つつく

 

 

 

追伸:

 

哩次响日本試左唔同味道，唔同牌子嘅乳酸奶，真係可以扮一次食家

 

其實白伽煎嘅人生係為＂美食＂而生存

 

同時嚴守脂肪只會為＂美食＂而累積嘅戒條，名符其實係要＂積而無憾＂

 

 

 

 

以下係最普通嘅係香港都買到嘅高千穗牧場嘅原味

 

 

仲有另一隻牌子嘅原味，哩個牌子比高千穗牧場出品嘅係奶味更香濃

 

兩者價錢差唔多，但哩個份量少過高千穗牧場嗰隻

 

仲有另一個牌子嘅芒果味，因為有芒果味，所以奶味就遜色啲

 

白伽煎最愛都仲係原味

 

 

 

仲試左蜜柑味，藍莓味，白伽煎仍然係死心塌地咁鍾意原味

 

 

 

 哩次响日本差唔多係每日至少一乳酸奶，白伽煎真係覺得本当に幸せがっだ