2009年9月17日,全日天晴 
跟團通常都要 morning call既,所以晨早7點就起身咯~
睇下張"巴士乘車劵 - 指定劵"
寫明08:30発,買票時個姐姐仲話要早15分鐘响售票處集合
咁咪即係08:15要集合?!
從無試過响日本旅行參加觀光團,所以點敢怠慢呢 ~都係早d起身啦!
呢度就係集合地點,呢d就係部份團友,同一時間幾個觀光團逐一出發
所以呢個姐姐會舉起個寫左團名既牌, 咁參加左嗰個團既鴨仔就會自動跟住佢架喇!
正式出發前,睇下今日行程先~
札幌站前巴士站 08:30 (出發)
岩見沢(休息 15分鐘)
富良野芝士工房 (參觀 25分鐘)
Prince Grand Resort Furano (午餐及酒店內觀光 85分鐘)
富田農場 (參觀 45分鐘)
Flower Land (參觀 40分鐘)
四季彩の丘 (參觀 30分鐘)
Patchwork之路 (車上通行觀光)
高速公路中途站 (休息 20分鐘)
札幌市時計台 19:00 或 札幌站前巴士站 19:05 (解散)
是日行車路線大約係咁 ~
巴士响08:45出發,呢個係隨團既導遊姐姐
第一站係"岩見沢"
其實無咩好睇,落車只係俾d團友伸下腳,去下洗手間!
第二站係:富良野芝士工房"
幾架旅遊車泊响度,即係仲有其他旅行團,佢地仲係講普通話架!
呢隻假牛係可以扮下渣奶架,每次100yen,不過渣出黎只係水
在場所見無人對呢隻"假牛"有興趣喎!
呢度展示左世界各地既芝士
好可愛既"森之樂團"
中間有一個仲吹到暈低左添!
"君,大丈夫?" (小子,你無事嘛?)
下面呢一舊係"絕對好味"既芝士蛋糕
我唔係芝士蛋糕"粉絲",甚至對呢d日式芝士蛋糕都唔係好欣賞
不過可能北海道既奶真係寧舍香濃
連做芝士蛋糕都特別濃味,口感豐富,濃得有d似泥
但又無鬼佬既芝士蛋糕咁覺得"滯"
北海道好多手信店都賣呢種芝士蛋糕,仲好搶手添架!
响北海道都試食過幾隻唔同出品既芝士蛋糕,真係全部都可以話係好味
呢間芝士工房出品既呢一件
係我覺得最最最好味,最最最濃味既!
食完就真係唔明點解以前"伊x家"既芝士蛋糕要排大隊先買到
(為乜咁都要排隊呀?)
呢件芝士蛋糕咁好味,搵日等我做番個"老翻A貨"先得!
我估入面d材料有.......
同芝士蛋糕一樣都係"極品"既,就係呢度d軟雪糕
又係因為奶製品香濃,所以連雪糕都寧舍好味!
芝士工房當然有招牌芝士味雪糕賣啦!
呢隻味完全係品嚐到奶既雙種味道,因為d奶,所以雪糕個質感好 rich
因為d芝士,所以個雪糕有好濃cream cheese既味道
我呢個"注文"(order)有兩隻味道,白色係芝士味
紫色係提子味
相比之下提子味就失色左d喇,大概因為做生果味需要加入果汁
奶既份量會減少左,所以只係口感都明顯地比下去
水份既口感比較明顯,又"削"左少少,無咁稠
其實呢個雪糕係Gelato,乳脂含量較一般雪糕低
除左芝士味,提子味之外,仲有牛奶味,南瓜味,粟米味,菠菜味
呢個芝士味雪糕係全個日本之旅行程中,俾我評定為係最好食既雪糕
連小樽嗰個海膽味雪糕都要讓位
因為呢個除左係味道之外,連個口感都好正呀!
呢個觀光時間只有25分鐘時間,所以唔會有好多時間參觀
黎到呢度可以食到兩樣"正野"都心滿意足囉!
富良野cheese工房既網頁: http://www.furano.ne.jp/furano-cheese/
自由行既話,响JR富良野站落車
轉坐的士,路程大約係3.4km,所需大約係9分鐘,如果踩單車大約需要25分鐘
第二站係 Prince Grand Resort Furano
黎到酒店首先係去地庫個餐廳醫肚先 ~
是日係自助午餐(洋式,和式同中華風都有齊)
味道就普通啦,不過黎呢度既目的並唔係食自助午餐,而係....
其實响酒店隔離有個好特別既景點
就係呢個: ニングルテラス
「ニングル」係作家:倉本聰氏既作品
內容係講以前北海道森林住左身高只有15cm既妖精既故事
呢度個氣氛就係取材呢個故仔,所以咪做到好似森林咁囉!
呢張"熊出沒注意"既告示唔知係真定假呢?
呢d屋仔係賣手信既,而且每間舖頭都好有特色
舖頭入面係"禁止攝影"
咁就响佢地份宣傳單張入面睇下佢地d特式貨品啦~
原來呢度都有"森之樂團"既 ~
下面呢d係網頁入面既相片,冬天有雪時原來仲靚呀!
"わ~ 綺麗!"(好靚呀!),好似童話國一樣咁呀!
呢度既午餐加觀光時間係85分鐘
自由行黎呢度既話,响JR富良野站落車,轉的士,路程約5km,車程大約10分鐘
