3月24日(星期六) 早上間中有雨
溫度:10度-13度
經歷徹夜失眠
所以一早就起身梳洗
開始第一日觀光行程 
天氣依然係有雨,所以心情仲唔係太好
以往去日本,落雨只會係一日,通常第二日都唔會再落
但哩次連續兩日都落雨,係咪由滿身霉氣嘅白加煎帶黎關西嘅呢?
去廣島嘅JR高速巴士車票仲未買到,所以哩日第一時間先要去買車票
入住嘅東急INN响梅田,咁當然係去大阪站嘅高速巴士站買票啦!
雖然白加煎一向比較多會選擇行程停留大阪
而以往住民宿又係响梅田附近,理應對梅田係比較熟識
不過梅田車站+地下街都令白加煎有d投降
次次响地下街都有迷路經歷 (其實都比唔上難波站有30幾個車站出口咁令人恐懼)
哩次帶住半迷惑
咁响車站搵高速巴士站嘅位置,問左一個車站職員 再睇指示牌就搵到,其實係响三越伊勢丹嗰度,都算係易搵
哩張JR車票價值5000YEN,但張車票就同超市收據無異
確實都係第一次用一張咁兒嬉嘅貴價車票搭車
其實哩次JR高速巴士俾白加煎嘅印象係唔太PRO
網上資料唔正確
响JR綠色窗口唔會買到高速巴士車票,去便利店用購物機一樣係買唔到
結果去到巴士站買票,就出現哩張車票,都無話可說!
仲未計上次因為地震,白加煎明明已經响網上取消訂位
但JR都仲係濫收車資
哩間企業唔太可靠 
買完車票就開始第一站觀光,哩次目的地係京都
出發前已經知道今年櫻花姍姍來遲,所以取消晒京都賞櫻之地
改去一個從未去過嘅地方,至少會有d新鮮感
以前總係坐JR去京都站,之後買1 DAY PASS黎坐巴士
不過巴士只係去一般大路景點,哩次要去嘅地方係"伏見稻荷"
用1 DAY PASS嘅巴士去唔到哩度
所以哩次係要坐京阪電車 
哩次終於化解左白加煎哩幾年黎對京阪電車嘅無知+偏見
話說當年第一次日本自由行係關西,仲買左一張 KANSAI THRU PASS
哩張PASS可以坐京阪電車穿梭關西地區
不過當年白加煎唔知電車有分普通,快速,急行,特急之分
每次都係見車就上,咁黑仔又次次都上左普通車,所以當時覺得哩張PASS無乜用
因為次次都坐站站停嘅普通車,坐車都要花好多時間
哩次發現原來有特急車,而且車費平過坐JR
咁以後又多一個選擇 哩次係坐急行車去"伏見稻荷"站
車站月台嘅裝飾相當配合"伏見稻荷大社" 
出左車站行一段路仔,哩度有d似清水寺嗰邊嘅二寧坂,產寧坂
其實京都d神社,寺廟真係間間都差唔多,咁哩間又有乜咁特別呢?
伏見稲荷大社(ふしみいなりたいしゃ)係大有來頭
响日本境內,有四萬幾間稻荷神社,哩間就係總本山,哩度擁有"千本鳥居"
除左全個山頭有無數大大細細嘅鳥居之外,仲有哩d狐狸使者石像,佢地d表情相當兇狠
更加有真馬騮,不過白加煎當日就見唔到,可能係因為天氣凍而且落雨
自古以來伏見大社係農業,商業嘅明神,善信會响哩度祈求農作豐收、生意興隆、交通安全
自江戶時代起,去稻荷大社參拜許願嘅人會捐錢豎立一座鳥居,以表明對神明嘅敬意
有幾種呎碼可以揀,豐儉由人
哩款係最大,最貴,所以見到有香港人都認識嘅企業
哩個係細幾倍嘅尺碼,相中哩兩個"無料"特約模特兒
真係夾埋都無咁啱啱好,兩人位置相近,高度又差唔多,同是一身黑衣
一出一入咁令到構圖豐富左好多
善信嘅千鳥居令哩度變成相當有特色,不過其實全個山頭都係同一個模樣
一般人黎祈福就可以買哩個願かけ鳥居
除左鳥居模樣之外,仲有狐狸造型可以揀
如果要行晒全個山頭,至少都要半日,哩日白加煎變身"我國國寶(熊貓)"咁黎到
再加上天氣凍仲要落住雨,真係要行一陣,停一陣,休息一陣
明明上次去上高地行山,嗰時不知幾咁元氣,全程不停站,不停走都無問題
哩次?!........白加煎相信係天氣+臨時狀態嘅影響,因為白加煎仍處於半冬眠狀態
仲有係不停行樓梯上山,所以寧捨攰
最後只係行左下圖藍線部份就打道回府,不過來回都响哩度行左超過一個鐘頭
其實每次去日本遇到哩d需要體力嘅活動時,真係相當羞家
大和後生仔女當然健步如飛,嗰d着住高踭鞋嘅"大和小姐"都輕易爬白加煎嘅頭
退休大叔雖然都要間歇休息,但佢地好有耐力,休息一陣就好似又上晒鍊咁
本來曾經係同步前進嘅人,結果每次白加煎身邊都只係剩返d婆婆公公相伴在側,一齊並肩前行
香港哩個彈丸之地,平日唔多機會做運動
至少日本人習慣經常踏單車,咁已經係比香港人多做運動嘅機會
行到四ツ辻就會見到京都在我腳下
下面張相看似無乜特別,但原來白加煎已經同"桜"初邂逅......左都仲未知
白加煎响哩度扮睇風景,其實係索緊氣休息之時
突然後面傳來一聲
あれ~さくら! 有個"大和姐姐"望住佢腳前有飄落响地上嘅一朵白色櫻花
之後幾個大和女仔一人一句相當興奮,又企定定响櫻花樹前留影
咁白加煎就影左哩張相,亦都知道京都某d角落會搵到"早桜的踪影"
借用網上影片
追伸
白加煎認同"讀萬卷書不如行萬里路"
白加煎本來都係一個毫無知識,通通唔識嘅人
不過每次去完一個旅行,當重溫旅行嘅片段之時
另一方面都係努力惡補關於旅行時嘅所見所聞
堅持寫遊記除左為自己嘅旅行作一個記錄,將自己當時嘅心情保鮮之外
仲為要增加自己嘅知識
旅行响籌備中,全副精神放响一d相當實際嘅事情上
例如交通上嘅接駁,景點嘅安排......
旅行完畢返黎,再寫返個遊記,咁就可以將時間花响旅行質素/層次上
關於伏見稻荷嘅大部份資料都係上網搜尋得到
宜家白加煎就知道稻荷大社係何方神聖
亦都知道日後只要身在日本,有可能再見到其餘四萬幾間"稻荷大社(分社)"
"讀萬卷書不如行萬里路"&"讀萬卷書,先行萬里路"確實係言之有理
宜家好多人寧願自由行,貪夠晒自由,鐘意去邊到可以
不過跟團都有跟團嘅好處,至少都有個"人肉解話機",介紹景點嘅特式或者歷史
哩d都係可以增進到自己嘅知識庫
如果自由行只係變為自由追景點,蜻蜓點水式嘅過客
咁大概都係行完萬里路都仍然係無增長到知識
生活上累積哩d知識當然唔會換來文憑,証書,但哩d知識會令人變得唔再空洞
同其他人溝通時可以有交流嘅話題,唔會令人覺得自己言之無物
開口埋口都只係講只有自己(但又無趣味)嘅事 ,人地聽左都答不上半句
哩d就係難以有互動嘅溝通,難免令人覺得哩d人係空洞乏味
被迫要溝通嘅話,都恨不得想借機會閃人
年紀越大就越怕哩d人
為乜咁大個人都俾人覺到說話空洞,言之無物....不過哩個層次嘅人偏偏就越黎越多
歲月無响哩d人嘅思維中留下d乜野証據
白加煎認為花費金錢去一個旅行,唔只為買野,食野,留影哩d表面事情
其實每件看似係表面簡單嘅事情,都會有可以俾人深入認識嘅野
白加煎就相信一個人嘅思維層次係慢慢培養累積出黎
如果用食野做比喻,有d人只求最基本感覺:食>飽,,唔會深究食左d乜,只要唔再肚餓就可以
咁哩個大概都係世上所以動物最基本嘅本能
不過如果願意用心去品嚐,去比較,甚至發掘到有關連嘅事物
咁已經係脫離左動物最基本嘅本能,而再走入更深層次
當今世代能夠相識一個思維有深度,有層次嘅人絕對唔係易事
相識後而大家嘅話題可以彼此連接落去,唔會有悶場
咁就好似打波搵到"搓波"對手一樣,越打越起勁
相反嘅話就只會變成單方面發球,但對手永遠都無法接球
每次都落網或者出界,非常無癮
結論:人都仲係會找尋層次相近嘅人和事,咁就會有共鳴
層次唔同最後都只會淪為九唔答八
沒有留言:
張貼留言