3月29日 (星期四) 晴
, 溫度:2度-17度 
米子係無新幹線聯繫嘅城市,再加上係鳥取縣內其中一個城市
咁即係交通上會轉折再轉折,所以連人氣都少,街上總係冷清清
不過好處就係酒店一定相當接近車站,而且房租又相當抵
哩次响米子泊宿嘅東橫inn係住咁多間東橫inn以來最華麗嘅一間
距離車站又只係2分鐘,相當方便
白加煎入住禁煙單人優惠房間,房租cheap cheap
唔係住電梯隔離間房,又唔係住低層房間,又唔係細房,又唔係樓對樓,風景仲相當開揚
哩間東橫inn真係抵讚,咁為乜會係優惠房間呢?
離開廣島哩個當日令人憤怒嘅地方
下站係妖怪樂園,哩個安排係最好舒緩情緒
行程黎到第7日,先似返係觀光,至少都有興奮地期待
2007年,白加煎响東京時去過調布嘅鬼太郎茶屋,純粹路過因為有時間所以先去
當時白加煎連鬼太郎入面d主要人物都唔係好認識,只係識得鬼太郎兩父子+猫女
哩次咁有計劃山長水遠專程去到境港,當然想睇得更加值回票價
咁就一定要事先備課,結果睇左少少墓場鬼太郎,知道鬼太郎,眼珠爸爸嘅來頭
又睇左100集嘅鬼太郎卡通,仲睇晒150集嘅ゲゲゲの女房
哩個係電視劇,原著由水木太太寫嘅書,內容係佢同水木先生婚姻生活上嘅點點滴滴
如果去境港嘅妖怪の町,咁哩套連續劇更加推薦要睇
咁樣會更加了解"水木先生"嘅事
關於白加煎對哩套日劇嘅評價,請click [水木夫婦]
哩次白加煎係"讀完萬卷書,先行萬里路",有備而戰,獲益良多
雖然話睇電視係娛樂成份居多,但其實從中都有好多得着
首先可以繼續保持低級日本程度,仲可以响"成功人物"身上反思到好多哲理
對於"水木先生",白加煎有一份尊敬之情意
日本漫畫本來都只係小朋友嘅"無益書刋",但宜家日本漫畫風行全世界
唔單只係小朋友嘅書刋,仲可以走入成年人嘅世界
哩個大轉變,"水木先生"擔當好重要角色嘅其中一人,親身令大時代改變
3月底係日本新學年前嘅假期,預左會有好多小朋友去探訪鬼太郎
所以白加煎都不敢怠慢,寧願早少少出動
哩日係選擇坐08:42嘅電車
有無坐過電車係用"0"號月台?
由米子去境港探妖,就係咁詭秘,相信哩個都係刻意嘅安排
一踏入哩個"0"號月台已經令人相當興奮
其實哩個只係主菜前嘅頭盤,好戲在後頭
有理由相信响鬼太郎作者"水木先生"心中
友情比愛情係更重要,因為"鼠男"嘅出鏡率比"猫女"多好多
傳統上一代大和男人,點會鐘意談情說愛哩d'阿婆又阿媽"嘅事呢?
女人?! 無地位
況且動畫中都唔見得鬼太郎對猫女
嘅愛慕有乜回應,總係相當冷淡咁 白加煎覺得猫女嘅出現只為一個正義英雄點會無傾慕者
所以點都要為鬼太郎畫一個"單思病患者"
雖然境港先係妖怪の町,但由米子站開始已經睇到每一部份細心嘅安排
大約50分鐘車程,中途每個車站都有嗰個車站嘅代表妖怪
要影每個車站嘅妖怪畫都相當困難,要停站停啱位置先會影到
不過頭站嘅米子站,就一定無問題啦,企响度任人慢慢影都得
米子站嘅代表妖怪係鼠男
除左米子站,白加煎只係影到哩一張,哩度係"米子空港駅"
其實白加煎唔明白點解"鼠男"嘅品德咁差
但鬼太郎都願意同佢做死黨? 成日俾佢借過橋都由得佢
鼠男確實係跟據"水木先生"一位由童年時代已經相識嘅玩伴而創作出黎
事實上鬼太郎+鼠男哩個配搭,等如"水木先生"+友人一樣
一個踏實堅毅,另一個就市儈貪心
木の葉天狗係靜岡縣嘅妖怪代表
哩d地區代表妖怪並唔係水木先生嘅創作,而係真有其傳說嘅妖怪
水木先生對妖怪嘅認識係相當深,佢綽號係"妖怪博士"
日本境內唔同地區都確實有好多妖怪傳說
車站月台當然唔少得主角鬼太郎兩父子啦!
四架主題列車有限班次行駛,如果要坐就要睇清楚行車時間
如果要一日之內坐晒4款列車,只要時間安排妥當都可以做到
基本上當列車由米子去到境港後,稍為休息就會原車返回米子站
所以只要好似下圖,來回程選擇分別坐A & B時間
咁都應該可以一日內坐晒4款列車
(註: 以下只係黃色格仔嘅時間先係鬼太郎列車,白色嘅就係一般電車)
第一日去嘅時候係坐鬼太郎+猫女列車
哩日佢地拍住拖咁當值,so sweet!
其實哩4架列車嘅組合係時時會更改,猫女都唔係次次都同到鬼太郎一齊當值架!
車廂內連坐椅都係眾妖
車廂內可以畫公仔嘅地方全部都由妖怪所佔據
仲有車廂天花都一樣畫到花哩花碌
最意外地興奮都係車內連到着車站嘅廣播
都係用返動畫入面嘅配音 哩把係"咩它孖餓吔之"(眼珠爸爸)把聲
上網搵到原來曾經出現過其他人物角色嘅原聲,而哩個就係鬼太郎+猫女把聲
不過唔知點解聲帶播放會快左半拍
配音嘅鬼太郎卡通,可以聽到佢地嘅真正日語配音聲音
去到境港站,白加煎完全係熟女還童一樣,見乜都影,又玩自拍
不過講真喎,論年紀白加煎只係鬼太郎嘅妹妹咋!
鬼太郎係"60後"嘅產物黎架!
站員見白加煎大鄉里黎境港探妖,佢都肯定見慣不怪,亦無咁好氣等白加煎出閘
仲拉左閘,又因為開左暖氣,連玻璃門都關上
吓?!
被困? 
不過佢地都好細心咁留意乘客係咪需要出閘
至少去到閘口,佢地就自動走出黎收車票,唔洗白加煎又大叫"あの~すみません"
米子,境港都仲係用緊人肉出閘/入閘機
無法啦,既然都係無新幹線聯繫嘅城市,自然都唔需要咁講求効率啦!
仲備有4款,日日唔同款式,如果連續去4日應該會集齊4款
第一日係鼠男
第二日係鬼太郎......妖~我要佢老豆"咩它孖餓吔之"呀!!!!
唔知香港中有無人咁"強"會集齊4款呢?
うらやましい!
沒有留言:
張貼留言