旅。夢。人生: 2012年一人黑仔之旅DAY 3@大阪(不是名牌奴隸)

(以上係網絡圖片) 舞洲工場嘅鳥瞰夜景迷人嘛?

3月25日 (星期日) 晴

大風

氣溫:5度-12度

能夠見識到百水先生嘅作品,哩個係由"遲桜"所撮合嘅一段緣份

原先打算哩日去京都嵐山賞桜,但姍姍來遲嘅桜令行程要改動

當毫無頭緒之際隨手打開响旅行社攞返黎嘅"大阪城市導遊書"

咁就睇中哩幢怪樓

白加煎本來完全唔識"百水先生"係乜水

百水先生响奧地利係相當著名嘅畫家

又被稱為鬼才建築師

佢响亞洲區嘅作品就只有日本,响日本嘅作品唔只係哩間舞洲工場

仲有一個キッズプラザ大阪(KIDS PLAZA OSAKA )
不過哩個係室內環境,並唔係一座戶外大型建築物

"百水先生"喜好唔對稱形狀,善用曲線,所以响作品中可以見到唔少哩d創作元素

堅持不規則圖形,色彩豐富都係佢嘅最大特色之一

第一眼見到"百水先生"嘅作品,覺得相當吸引,而且亦都有別於一般建築設計

所以決定要去大阪"舞洲工場"一睹佢風采

返到香港先再黎"行完萬里路後,補讀萬卷書",上網搜尋關於"百水先生"嘅資料

"百水先生"嘅建築作品

旅館Grüne Zitadelle (德國)

Waldspirale(德國居民住房)

Blumau (AUSTRIA) 溫泉村

03Kunst Haus Wien (維也納)

Saint Barbara Church (奧地利)

Hundertwasser Houses(維也納)

關於Friedensreich Hundertwasser 嘅生平,請click
"百水先生"嘅建築作品中充滿左平面設計嘅手法,响平面空間中,以圖形,線條,顏色做變化

唔用對稱嘅圖形係佢其中一個特色

白加煎突然將自己最欣賞嘅建築大師Antoni Gaudi i cornet同"百水先生"相比

某程度上,Gaudi同"百水先生"嘅意念有部份相似

Gaudi 着重用曲線,形狀去做創作,佢嘅創作入面都有色彩繽紛嘅設計

越深入去諗,越出神去睇,

開始覺得"百水先生"嘅建築作品好似有所欠缺

到底係欠左d乜呢?

將"百水先生"嘅作品同Gaudi嘅作品一比拼之下,好快發現到所缺欠嘅係乜野

"百水先生"身出係一個畫家

一個平面創作人

當平面創作轉為立體創作之時,"百水先生"似乎只係將一大片嘅牆壁化身為畫布

繼續响牆壁上做平面嘅創作,但係平面空間同立體空間完全係兩碼子嘅事

並唔係將立體變為多個平面,响平面上畫畫,咁就係立體創作

但係"百水先生"嘅作品就正正令白加煎有哩份感覺,如果係咁,咁又點可以稱為建築界大師呢?

至少白加煎覺得"百水先生"响建築界嘅名氣有d言過於實

"百水先生"嘅建築創作有欠新意,每個建築物都有相當近似嘅設計概念

咁到底係刻意保留個人風格以做到盡量歸一?定還是創意有限呢?

平面空間設計,無論如何都比立體空間設計狹少

而且响處理上平面會比較簡單容易,哩個係鐵論

白加煎係相當欣賞"百水先生"嘅畫,顏色,圖案,構圖係相當大胆而且豐富

令人留下深刻印象

第一眼已經吸引到觀賞人嘅注意力

不過出色嘅畫家並唔一定係出色嘅建築師,雕刻家

以下係Gaudi 嘅部份作品

被列入世界遺產嘅CASA BATLLÓ (巴特略公寓)

哩度d露台令白加煎諗起"歌聲魅影"中嘅面具

CASA MILÀ，LA PEDRERA (卡拉公寓)

PARK GÜELL (奎爾公園)

當然唔能夠唔提及响興建中就因車禍意外去世,一直都未完工嘅

TEMPLE EXPIATORI DE LA SAGRADA FAMILIA(聖家堂)

以下分別係Gaudi 同"百水先生"嘅創作,同為教堂,但係視覺效果高低立見

同樣係以唔同形狀做設計元素,但係Gaudi嘅作品,每個都保留個人風格,再加上大量新嘅意念

而且係真正立體創作,响唔同角度都能夠有唔同變化

咁到底真正大師級應該具備邊d條件呢?

當然佢地兩個人都有個人特色,但如果要稱為鬼斧神工嘅話

咁哩個詞語又應該係邊個比較受之無愧呢?

後世人嘅褒揚會唔會只係出於"名牌效應",'人云亦云"呢?

以上只係白加煎有感而發,純粹表達個人觀感

哩日參觀完"舞洲工場"已經係下午茶時間

返出市中心醫肚,哩次揀左咁多年去大阪都掙扎左好多次"好唔好去?"嘅食店

哩次因為下午茶時間嘅"遲來的午餐"

好多食店都中場休息,咁唯有揀一間無中場休息時間嘅食店

哩間就係"北極星",哩次終於都解決左掙扎多年嘅考慮

响食評網站上,北極星得到相當高分數,係3.63分(滿分係5分)

事實哩日黎到係下晝4點幾,雖然唔需要排隊等位

但去食"遲來午餐"嘅人都唔少

哩間舖頭係真正"老舖",入面嘅格局都係古老和式設計

仲係要坐地下食飯,可想而知係幾咁難受

跪又唔舒服,伸直腳坐?!又好似無大和女仕係咁粗魯.......

食完後連再坐一會都唔想,快閃!

蛋包飯絕對係和式食物嘅代表

全世界除左日本之外,再無其他國家係有哩款食品

睇日劇時,日本人會將蛋包飯形容為"令人感到幸福"嘅食物

白加煎一直都相當懷疑,係真唔係呀?咁普通嘅食材,可以令人有幾幸福呀?

哩次白加煎終於明白係有幾咁幸福喇..........

皆因為白加煎都唔係食哩樣食物長大

完全唔會有大和人心底裡嗰份"お母さんの味"嘅回憶或者比較

所以味覺中對如何評價蛋包飯係毫無概念

蛋皮確實係炒得好薄好滑,蕃茄汁嘅味道相當適中,不過係完全無酸味

白飯,雞肉粒都無乜特別好或者差

評價就係咁樣

哩個情況等如叫一個外地人品嚐廣式煲仔飯

外地人都唔會有"娘親的味道"哩個回憶或者經驗

同樣外地人唔會識得品評,煲仔飯嘅火喉適中,飯焦軟硬啱啱好,豉油係秘製.....

哩次學識左一樣野,即使係人人都讚嘅名牌,咁都唔代表自己跟住去做

都一樣會得到跟別人相同嘅感受,名牌都要睇個人條件或者情況

唔理智咁去跟名牌風氣,通常只係淪為名牌奴隸

關於"北極星" 北極星位置請click

咁就浪費左一個可以無顧忌任食午餐嘅quota,嘥晒!