第二輯終於都返黎交待返d事喇!
對我黎講完全係期待嘅日劇,4月17日先播第一集
知道佢收視高開就更加想睇
哩兩日就已經上網搵到佢踪影,即刻煲晒第一集
第一集係兩小時嘅版本,絕對唔簡單,哩一輯講明係完結篇,即係最後架喇
南方仁
(大沢隆夫飾)係咪可以由江戶時代回到現代?
而佢做左植物人嘅未婚妻結果會如何?
可能哩一輯最後尾會講到南方仁响時空交錯之時咁回到現在
佢一返到黎就會見到本來係昏迷不醒嘅未婚妻變得會行會走
哩d全因為南方仁响回到江戶代時,佢努力咁改寫左當時嘅醫術
咁都變相令到日本嘅醫療步伐加快左
雖然睇完第一集就無交待結局嘅方向
不過編劇响哩一輯都响人類時空交錯嘅事上再着墨多左
曾經被時空掉亂嘅人,唔只得南方仁一個,都有其他人係由古代走到未來
結果又無端端返回古代
而南方仁就遇上哩個人,而哩個人嘅說話就令南方仁開竅
佢終於相信係上天要佢返去古代改變一d事
不過又唔等於上天容許佢改變所有歷史
總之一切由上天做主導,南方仁只需要盡佢所能咁去做
唔需要再介意自己來自未來,都知道歷史故事
更加唔需要怕改變左歷史,而會為未來帶來唔好嘅事情
簡單講就係天降大任於"JIN仁"
無聊題外話一則: JIN嘅日文讀音似"煎"
我呢d日文只維持水皮程度嘅人經常都採用"中日發音大混合"黎認字
咁"JIN 仁 "嘅讀音俾我讀咪就係 "煎仁"囉....吓係"賤人"?!
雖然我對歷史無乜興趣 ,日本歷史就更加
但都無礙我睇哩套戲嘅心情
因為我實在好鐘意入面d角色,尤其係女性
佢地雖然生於封建嘅古代,但係當中都有女中豪傑
橘咲
(綾瀨遙飾) 由第一輯已經好鐘意佢
內柔外剛,溫婉,但又好堅毅,年紀少少已經好有意向
註:哩次拍第二輯仲表現左凌瀨遙夠專業
據小道消息所講
拍第一輯時一向緋聞少嘅佢同男主角大沢隆夫真係撻着左,不過因為兩個人都忙,咁好快都分左手
嗰時正正係拍瑩之光嘅續集,知道仁醫要開拍續集,當時傳媒都估佢可能怕面左左而唔接拍續集
結果佢都係好專業咁接拍續集
野風
(中谷美紀飾) 又係一個女中豪傑
佢同咲唔一樣,佢係內外都堅強
哩次睇完第二輯嘅第一集,又多左一個女中豪傑令我欣賞
橘栄(麻生祐未飾),佢係咲嘅媽媽
第一輯最後講到咲因為要跟住南方仁(既為感情,也為學醫)
所以決定退掉婚約,咲哥哥明白妹妹嘅心意,為左令妹妹可以走自己嘅路
所以就做左一場戲趕咲出家門
當做同佢脫離關係
結果有婚約嘅男方就為哩件事而深心不忿
故意造謠令橘家丟臉難受,而咲因為咁而惹來其他人嘅閒言閒語
身為媽媽都難以接受咲做出影响家聲嘅事
之後栄就患上腳氣病
响當時腳氣病係因為某d營養不足所致,只係當時醫學無哩方面嘅知識
所以d人就認為腳氣病會傳染
事實上如果唔對症下藥,腳氣病會引發各病疾病,繼而會死亡
當時南方仁就做左d食物
可以針對腳氣病患者所需要嘅營養
(南方仁又做左一件改變左當時醫學歷史嘅事)
不過即使有治療嘅食物,栄都拒絕進食,其實就係決心要死,以懲罰咲嘅任性
最後係喜市嘅一番說話令栄想通左
喜市係一個小朋友
第一集佢因為患上霍亂而俾南方仁醫好
但喜市嘅媽媽就因為意外過左身
曾經歷失去媽媽嘅痛,喜市都試過對人生感到萬念俱灰
但結果想通左之後,佢明白到未來都一定會變得更好
唯有活着先可以用笑容黎迎接哩d開心嘅事....
喜市嘅說話感動左栄,令佢明白到咲嘅路未必要好似其他女子一樣.結婚生仔
咲都可以走自己嘅路......佢終於都原諒咲嘅任性
甚至佢鼓勵咲要努力,唔可以放棄自己嘅想法
努力地為自己選擇嘅路而活,同樣地為其他同咲一樣咁堅毅咁生活嘅女子而活
睇到哩一段真係有d感動
感動咲嘅堅毅,感動媽媽對咲嘅愛
更加感動喜市哩個小朋友可以講出咁成熟嘅說話
所以哩次睇完第一集,又多左兩個我喜歡嘅角色喇!
哩次嘅JIN仁完結篇,會係繼"瑩之光 2"之後
另一套緊貼咁追住黎睇嘅日劇,佢果然係魅力沒法擋
