2013年6月14日,星期五 (下午), 和歌山天氣
响JR和歌山駅可以騰出到大約1小時逛街
之後好乖預早左時間去巴士站等巴士哩日要坐渡輪移動去徳島,所以時間上不能有出錯
响巴士站等4號巴士,18:07出發, 18:23到碼頭
計劃哩段行程時係相當困難
明明有電車去碼頭,但和歌山渡輪網頁上就建議乘客坐巴士接駁JR和歌山駅
原因就係去和歌山港駅嘅電車係相當疏車,比巴士仲要疏落
巴士會途經南海和歌山市駅,和歌山港駅
白加煎一直都以為坐哩架巴士去到尾站就係和歌山港駅
睇哩個站牌嘅車站編排,尾站都似係和歌山港駅
坐左大約10幾分鐘,開始留意要落車
見到和歌山港フェリーターミナル就落車
白加煎仍然以為哩個係尾站諗住應該全車人都會落晒車
不過落車嘅人就只有兩個(白加煎+友人)
哩個時候白加煎心有不妙
但又相當奇怪喎,以往白加煎獨行日本時為安全起見通常會响落車時問司機確認係咪無落錯車
但同友人結伴時反而又唔會做哩件事,懶醒咁喎~
懶醒係隨時都會出事
上圖(1) 係白加煎同友人落巴士嘅地方
落左車後,白加煎仍然諗緊:為乜唔係尾站嘅?
行左幾步就見到哩個電車站,當時睇唔到站名(其實係和歌山港駅)
無預期巴士唔係尾站,更加無預期附近有電車站
哩個時候腦海仲一閃:
為乜唔見有海?
哩度似碼頭咩? 係咪落早左巴士呀?
一諗到咁就突然好騰雞,因為真係唔可以錯過渡輪班次
白加煎同友人即時拆返巴士站
為左自己嘅失誤,白加煎打算自費坐的士去碼頭
咁啱又有架的士等上客,司機叔叔企左出黎
白加煎即刻問司機叔叔:我地要去フェリーのりば(渡輪碼頭)
司機叔叔好好心咁指住條天橋話:行過天橋轉右就係フェリーのりば
嘩~原來係虛驚一場
不過有誤會都好正常,碼頭的確應該响海邊而哩個位置確實睇唔到有海
2000 YEN嘅船票都係响自動賣票機度買
買左船票就行去碼頭天橋駁通和歌山港フェリーターミナル(乘船口)
哩啲跨區渡輪可以載車輛
8便嘅渡輪响19:10開出,船開喇
最有壓力嘅一個交通行程,終於鬆一口氣
和歌山
記得仲有個白浜的約定,會再黎架~
四國
由和歌山坐船去徳島,船程係兩小時10分鐘
白天坐船都可以,但當天黑晒之後,白加煎同友人行出甲板位置
真係好驚
伸手不見五指,又大風,果然係欺山莫欺水哩次係白加煎第一次响大和坐跨區渡輪
以前坐過都只係短船程嘅觀光渡輪,咁今次就要參觀下船上設施
一般乘客嘅座位,設有大電視,行李架,BB車架,真係幾週到
小食部+進餐區
哩個係貨車司機專用嘅休息間
有床
可以俾啲貨車司機休息,好細心呀!
有電腦間,但無公用電腦,無公用WI-FI
貨車司機可以有躺臥休息嘅地方,一般乘客都有
有啲乘客帶埋睡袋打地舖
有啲圍埋玩紙牌
小食部只係營業到晚上7點10分,開船後,小食部就關門
如果肚餓,可以幫趁自動售賣機
有COIN-GAME
JR有GREEN SEAT,船都一樣有"グリーン席"
大人額外俾500 YEN, 小童額外俾250 YEN
哩晚响海上,所以坐巴士前已經响和歌山嘅MISTER DONUT買定晚餐
哩盒波波DONUT要讚
兩小時10分嘅船程,大約21:25就到左四國嘅德島
終於係首次踏上四國
最後一班接駁巴士JR德島駅嘅巴士
船上乘客都唔少,但落左船就閃左好多人
坐巴士嘅人都唔多
大約15分鐘車程就到JR徳島站
哩晚泊宿响東橫INN,車站步行5分鐘
後記
出發前白加煎曾經同友人講過:
如果大家真係瘋狂購物到要追加託運行李
咁就兩個人攤分額外需要多託運嘅行李費
每人$182.5而白加煎都帶左個大旅行袋預防額外追加行李之用
以往經驗有人情味嘅大航空公司通常都唔會太計較
過重少少,件數多左一小件,佢地都會隻眼開,隻眼閉,哩個只係人情,並唔係道理
雖然白加煎已經提示友人哩次嘅"樂土"係廉航,每項服務都係另外計錢
而且相信係會計到足,件數多左,過重等都需要額外收費
但似乎友人嘅思維入面,仍然覺得廉航同有人情味嘅大航空公司係無分別
去到日本,行程日日緊湊,白加煎已經認為應該無需要追加行李
事實上連觀光時間都咁緊迫,唯一可以購物只係最後兩日返到大阪之時
只係兩日,常理下買到嘅戰利品都有限
哩晚响德島酒店休息時,友人突然對白加煎講:
唉!唔理咁多喇,就豁出去俾嗰件追加行李費啦!
白加煎細問原因
友人每次去日本都會掃5至6個大碗麵返香港
理由唔係香港買唔到,而只係响日本買會平過香港大約$10- $15
友人嘅至愛家人相當鐘意食,不過响香港就唔會買,因為覺得價錢唔抵
哩次友人嘅至愛家人甚至為友人準備一個中型紙箱
(紙箱摺埋放响友人嘅行李箱入面)
友人準備託運8-10個大碗麵返香港,務求塞滿個紙箱
白加煎知道事情因由,本來講好左追加嘅行李係二人攤分
白加煎唔想臨時縮沙孤寒嗰$182.5
但再諗深一層:又唔係自己超買,為咩自己要負責俾$182.5
即使友人肯自付全數$365用黎託運10個大碗麵每個大碗麵嘅託運費係$36.5,如果計算埋大碗麵本身嘅價錢
豈不是每個空運到港嘅大碗麵大約要$60
响香港買都唔駛咁貴,有智慧嘅人都唔會選擇做咁蠢嘅事
哩次行程,白加煎為左友人嘅行李問題,好幾次都心中着火
但哩日只係行程第二日,怒火心中燒嘅情況只係啱啱開始,仲忍得
為左解決行李追加事件,白加煎又再黎多口+懶好心嘅本色
多口嘅白加煎同友人講左上述條數
友人仲問:
啲大碗麵好輕咋喎!"樂土"真係會計到咁足?
白加煎心入面已經無咁好氣
但仲要裝作若無其事咁答:照道理就係會同你計,白紙黑字寫明託運有件數限制,重量限制
到時响機場佢地真係同你計
你一係即棄哩箱大碗麵,一係就俾多$365做託運
咁你會點揀呢?
當時白加煎唔明白,為友人準備紙箱嘅至愛家人係男人
多數男人唔會貪哩啲"買菜應份送蔥"嘅小便宜行為
(買菜應份送蔥=航空公司應份接受乘客行李超過指定限制而不另收費)
再者男人應該會理智地解讀到乜野為之"廉航"
但友人嘅至愛家人仍然無視哩啲白紙黑字嘅規例
而悉心地為友人挑選中型紙箱,用以額外託運一箱"大碗面"返香港
白加煎又再次不能不同意:
世上奇人怪事何其多,只在乎大家古怪嘅野唔相同
後來白加煎拍心口可以幫友人託運3-4個大碗麵
因為白加煎哩次決定左要理智SHOPPING
要託運嘅行李會自律嚴格限制响20KG以下
友人聽到白加煎咁講,算係唔再堅持要追加一箱大碗麵託運返香港
宜家回想當時,白加煎絕對係諸事八卦口多
本來自哩朝早為左玩海豚而發生嘅激氣 "操控事件" 後
關於溪氣"操控事件": 2013 日本之旅 DAY 2 @白浜 - 動物開餐
白加煎答應過自己,往後嘅行程中,只要事情唔會影响到自己
就會選擇沉默
哩晚已經失信於自己嘅承諾
不過往後幾日就有好好堅守諾言
其實如果友人真係追加一箱"大碗麵"返香港,都唔係唔影响白加煎
友人捱唔到苦,攰又頂唔住,意志力又弱,思維又率性衝動
尾程由難波酒店去關西機場,仲要係隔涉嘅2號客運大樓
一個人推住個半殘癈行李喼,一個單邊揹嘅大旅行袋,仲有一箱"大碗麵
而白加煎都同樣有自己嘅行李要搬,哩個情況幻想不來
半殘癈行李喼
白加煎翌日發現友人嘅行李喼已經係"長短腳"殘癈左
為左哩個半殘癈行李喼,好幾次都搞到白加煎怒火心中燒
只係"敢怒不想言",無謂搞到大家都黑面
當時白加煎都理解哩幾日友人能夠脫離日常"被操控"嘅生活方式
所以難免會興奮得進入忘我境界,終於無人管治,可以自由隨心行事
但作為一個成年人,無人管治自己但都需要自我管理,自己嘅言行盡量唔應該影响他人
可惜氣頂事件响往後陸續有來,直到返到香港都仲有
