9月8日(星期三),金沢,下午間中大雨
黃昏停雨
上一篇公佈左食店既評分,咁即係都知道我幫襯左邊間"名食店"啦
咪就係呢間山さん寿司
呢間舖頭既海鮮丼比手握壽司仲要出名
黎到注文海鮮丼既人係比較多
而我就注文左一個2625 yen既海鮮丼
而我就注文左一個2625 yen既海鮮丼
金沢既地道海鮮丼的確係有d浮誇,會唔會都代表左金沢人既特性呢?
午飯時段可以選擇既注文唔係太多
當然啦,金沢既地道特色海鮮丼係"雜不lung"咩都有,根本唔駛自己配搭
餐牌入面既頭3項係手握壽司
我呢次所注文既海鮮丼已經係繼海膽+大魚子丼之後,身價第二貴架喇!
以往食海鮮丼,多數我都係注文最愛既海膽+大魚子丼
雖然百食不厭,不過入鄉都要隨俗
咁就要食一次呢個唯有金沢先會既"雜不lung"海鮮丼
不過當"熱打他key孖薯"之後,問題就黎喇......
到底要由邊一件開始呢?
(考慮時間只有5秒鐘)
.........
..........
...........
...........
..........
考慮左5秒後完全無乜頭緒應該點分先後次序
咁就隨便由左邊其中一片魚生開始開動
不過夾起呢一片之後,頭緒就黎喇
乜唔係應該先夾起嗰d食唔到入肚既堅固裝飾品先咩?!
所指既咪就係"帶子殼"囉!
一夾起呢一塊硬殼之後,就即刻見到白飯位置,咁咪唔駛夾硬hea開d魚生黎食囉.......
又一低B婆既低B證據
揀左海鮮丼就無得食我的最愛--海膽+大魚子丼
為左要一解思念之情,咁就上網搵左佢出黎亮相,就係下面呢張
賣相無乜特別,唔見得有浮誇既個性喎!
海膽同大魚子都係貴野,浮誇d都唔會有人嫌棄架喎!
就咁睇賣相,海鮮丼既賣相一d都唔輸蝕喎,價錢又平d,味道確實都唔錯
理論上代表地方特色既食物,大概都唔會太差既
呢間舖頭仲有手握壽司,點睇都係覺得海鮮丼抵食d,份量又多d
最緊要係有地道特色
大門外擺住既係假壽司,最貴嗰盒係2600yen (2人前)
一向只鍾情於係海膽同大魚子海鮮丼既我
對金沢呢個浮誇既海鮮丼都絕對係讚
去到金沢就千祈唔好錯過
我俾金沢有咁高度既評價,呢個海鮮丼都要記一大功架!
上一回4個候選佳麗之中,有兩間主打係壽司,另外兩間主打係海鮮丼
另一間主打海鮮丼既就係井ノ弥
下面張相係店中最貴,最豪華既金沢地道"雜不lung"海鮮丼
盛惠2900yen
一睇呢張相就明白佢輸左响邊
為乜"山さん"會攞到3.56既評分,而井ノ弥就只係有3.28既得分(滿分係5分)
味道無得比較,只係睇外表既話
如果每一片舖响碗邊既魚生係用牙齒黎形容既話
咁唔該井ノ弥最好都係要箍牙喇,咁疏,賣相唔多掂喎!
睇下山さん棚牙密幾多,露晒齒都唔失禮
所以難怪山さん會以接近3分咁跑贏啦~抵佢贏既
終於都差唔多要準備要返大阪,要先返酒店攞返個"細仔"(背囊)
上車既地方就係金沢車站
咁最後當然係要响呢度逛一陣啦
留响金沢24小時入面,响呢個車站騰出騰入過無數次
但就係次次都無停低黎睇下佢
金沢同京都俾我既感覺的確係有相似既地方 
就連兩個車站頂都係用金屬架
(金沢駅)
(京都駅)
預早左時間去到金沢車站,就係要買定d晚餐响坐車中途肚餓時食
最佳選擇就係車站既大超級市場啦,應有盡有
對我黎講响日本行超市開心過行百貨公司
(其實响香港都係一樣!)
9月既當造生果除左係巨峰提子之外,可能就係西瓜
响超市入面有個位置放左d巨大西瓜
不過佢地全部都係"無價",皆因全部都係非賣品
(唔賣?!咁擺响度做乜呀?) 
擺响度宣傳囉!要買呢d西瓜係要訂架!
佢地個個都大有來頭,下面mickey坐住既呢一個係全場之中最大既
個牌上面寫住: 約50kg
所以就算要買都唔會有客人即場抬走
下面呢個係"玉子型"西瓜,看似無乜特別
佢既秘密就係糖度去到11-12度(即係好甜)仲保證爽口
呢個出品就係要7000yen
有時真係要佩服d日本人既認真 
經過佢地好認真咁改良品種之下,好多生果都變成必定係甜
好似西瓜咁,佢地真係好認真咁種出超乎正常既甜西瓜
就算唔欣賞d甜得有點假既生果,但至少都欣賞日本人呢種認真既態度
呢d可以叫到高價既西瓜
甜度既指標一定要去到11度,先可以响呢度亮相
是日晚餐就係以下呢d,好彩呢盒蜜瓜唔係超甜咋,正常就夠架喇!
坐JR高速巴士既就係呢個車站
今次係第3次坐高速巴士,每間巴士公司既運作都唔同
唔知呢次係咪一樣用網上訂票既確認書就可以上車
所以又要去問下先
朝早响隔離左邊個窗口俾個姐姐話唔明我D日文
激到我火都黎埋
激到我火都黎埋
宜家要問既就係右邊呢個窗口
可能朝早時俾個姐姐咁樣挫我銳氣,搞到我諗住呢次用英文問就算喇
簡單幾句英文,佢地應付到卦! 反正朝早時隔離窗口個姐姐識得同我講"背誦式"英文架喎!
結果.......
我只係想問我將要坐5點嗰班巴士去大阪
咁已經响網上買左票,係咪憑確認信就可以上車?
還是要換另一張正式車票先可以上車?
用小學程度既英文都講到以上要表達既意思啦
而且我已經特登講得慢d,仲攞埋封確認信出黎同佢指手劃腳架啦
點知......
响我講完幾句英文之後
只係見到眼前呢個後生女仔用以下既表情黎望住我
絕對無作大,佢真係呢個表情 
吓!原來佢聽唔明喎! 
咁好啦~我又轉台用返日文同佢講啦!
佢聽到我同佢講日文,佢終於都回魂喇
而我就係用慢過平時(俾人催住我亂)講日文既速度黎同佢講野
(諗左先講)
佢就絕對無表現出唔耐煩我講得慢+講得唔好
經過呢一次,我諗以後唔想俾人用d流利日文嚇窒既話
(一開始就輸左氣勢)
(一開始就輸左氣勢)
咁可以考慮先同佢地講英文
到佢地用唔到英文時,佢地就會有耐性聽d屎日文架喇!
終於都踏上歸途,返出大阪就唔再係咁樣既觀光心情
再留多3日就係要回家添囉!
响呢個時候,我就突然記返起自己响香港既生活
原來我係有份雞肋一樣既工作既
.....諗到哩度當堂有d心灰意冷
由金沢返大阪,最初沿途係經過海邊,風景唔錯
好用黎調和我當時灰色既心情,大海+大浪令人心曠神怡
今次因為一早就响網上訂票,所以安排到坐最前既位 no.1 seat
兩邊大窗口,所以全程都無瞓過,就係响度留心咁睇風景
我離開金沢,就連d雨雲都一齊走埋
終於都停雨喇! 
呢次坐既巴士係3行單座位,絕對係舒服好多
做乜都唔怕影响到坐隔離位既人
巴士既中途休息小解吸煙站,終於都離開左金沢喇!
一定後會有期既
呢一晚去到酒店check-in已經接近11點,終於再見返久別重逄既"大仔"喇!
黑貓叔叔應該跟我指示
响中午時已經將佢送左去酒店等我返黎認領佢
阿仔,辛苦你喇,跟住黑貓叔叔由東京去到大阪
車程仲長過我由金沢去大阪,肯定你呢幾日係响貨倉渡過架啦!
宜家先知道原來你响我既(生命)路途中係咁重要既
又從來都係任由我"遭質"(去親日本就次次行李都overload)
お疲れさまでした! 
不過以後既待遇&工作量都係照舊喎! 
