macaron移民去東瀛

色彩繽紛既macaron就見得多,咁樸實低調既就好少見

如果係我孤陃寡聞,少見多怪既話,咁就有怪莫怪喇!

因為我係個"大鄉里"嘛!

 

如果用埋黑色既食用色素黎整,咁就仲會cool到暈

型到爆!

家陣無用色素,咁就似一粒石仔咁,有晒紋理

 

呢個食譜係黎自日本書(台灣翻譯本)

估唔到"菊花國"既人,將原本既材料:杏仁粉改用黑芝麻粉都搞得幾掂喎

咁變一變,d macaron就變左國藉喇

由"花都國"移民左去"菊花國"

 

出自"花都國"既macaron就完全表現當地既風情--花哩花碌

紅-橙-黃-綠-青-藍-紫都出齊,確實浮誇左d,咪似足"花都國"d人民個性囉!

所以一睇就知呢d灰色,咁低調樸實既maracon應該係出自另一派系

 

一向都知"菊花國"d人係崇洋,今次佢地將"花都國"既甜點大哥

搖身一變而成為充滿左"菊花國"獨有既特色(低調,忍耐,尊嚴,認真...)

又幾有創意,至少我都欣賞佢唔駛整色整水用色素

 

本來我估我老闆一見到"菊花國"呢d低品味創意,佢一定會檸晒頭

認為"菊花國"d人將佢d家鄉名點變成不淪不類

誰不知佢又無喎!

佢無咀渺渺之時,仲對d "非正統"出身既macaron好似久別重逄咁熱情添喎!

明明今次係佢地第一次見面架咋喎!

可能點計都係"同父異母",再加上佢d思鄉病

發作卦?

不過點都好啦,至少有佢幫我食晒呢d甜到不能忍受既野食

只要唔浪費食物,咁我就話知佢地d族譜/血統

 

其實我真係唔明白macaron有乜咁好食,仲搞到唔少人對佢催之若鶩?

因為佢身價貴,捨得食佢就等如係高貴既人?!

而站在cooking既立場

就係因為佢難做,做到佢就等如係高班既人?!

人人都各有自己既原因,拜倒佢石榴裙之下

 

不過除左獨立咁欣賞佢之外,其實用佢黎做餅面裝飾都唔錯架!

响"菊花國"d餅店中,有d都係用macaron黎做陪襯既

用呢d"花都國"既甜點大哥做裝飾,又真係全個餅都當堂高貴左喎

睇下係咪呢?

至少好過擺係件"士多啤梨",或者又係用朱古力做裝飾咁無新意

唔可以否認"菊花國"既人民會花好多心思追求外表既靚

佢地唔止要求主角要靚之餘,當然都又要有實力,連綠葉都絕對唔馬虎

對於"菊花國"既嚴謹認真程度,小女子真係深深佩服

咁都解釋左

我會為"菊花國"沉迷,繼而沉淪

 

今夜睇黎blog主又舊病復發喇

全篇blog都响度語無論次

其實今夜只係有d痕

 

檸檬芝士蛋糕

 

前幾日同事問我,呢個星期做咩蛋糕?

我答:檸檬芝士蛋糕

佢諗左兩秒話:檸檬?!好清新喎,你無整過檸檬做既蛋糕俾我地食喎!

我又諗左兩秒

:又係喎!佢地無食過呢樣架喎!

先為兩片裝飾用既檸檬片解左話先~

佢地個樣係有d枯乾咁,係我用焗爐將d檸檬片烘乾既

只不過個效果唔多好,好似放响雪柜雪到乾晒咁,失敗!

 

返入正題喇~

事實都好耐無整過凍既芝士蛋糕

更加好耐無整過檸檬芝士蛋糕 (耐既定義係以"年"黎計算)

不過呢個檸檬芝士蛋糕係好有意義同功勞既

係佢為我既"做餅生涯"揭開序幕既

 

想當年,自己年少無知,一心只係想學識做一個自己鐘意食既芝士蛋糕

咁某一日,無知少女就睇到報紙既食譜

就咁傻更更咁走去買材料+用具,跟住食譜去做

結果....

當然係唔成功啦!後來先發現報紙既食譜係搵人笨居多

嗰d俾人訪問既大廚,點會咁易流個食譜出去呢?

嗰d大廚肯接受報紙訪問,只係為左要宣傳間舖頭,等多d人幫趁

並唔係要做義工導師教人做餅

當年係10幾年前,討論區又唔流行

嗰d大廚仲唔當自己d食譜係私人財產咁珍貴咩?!

 

俾錢買左材料但就做到一pet野咁,絕對唔忿氣!

我仲記得呢個蛋糕既"遺容"

與其話係一個蛋糕,咁不如話係一個pizza,咁會貼似d囉!

 

當時home-made cake仲未成為潮流,唔同宜家有材料舖可以好易買到材料

全部材料都係响超市度買,當然係貴啦!

因為咁,就更加唔忿氣,唔忿氣之下就撩起我d求知慾

既然報紙免費食譜係搵人笨既,咁我就唔貪小便宜,俾錢買食譜書先

 

"有志者,事竟成"

係絕對有理既

都因為呢本書,改變左我一生既命運

 就係唔再做無知少女

(係呀!宜家既唔係無知,都唔係少女喇!)

呢輪魂魄唔齊咁,做蛋糕都連返失手

老貓燒鬚到自信心跌破新低

為左重拾自信,咁唯有"回到低B班",做一個最無難度既凍餅蛋糕先啦!

還好,仲似返樣,咁樣白溜滑淨先似返樣架嘛!

 

 

不過唔好睇少呢件只係低B班程度既蛋糕喎

佢頭頂嗰粒係超高班既macaron黎架!

d咁高班又咁高級既野,當然係要開另一篇黎下回分解啦!

仁者俠醫 (JIN仁)

 

呢輪放左工就好似自動踩衡Turbo咁

竟然可以抽到時間溫書


又可以晚晚上黎"巡視業務""掃黃賭毒"兼掃走埋d"無賴人"廣告

又要巡下"是日餓鬼雅虎"又生吞左幾多篇blog黎醫佢自己個肚

(快d 嘔返出黎俾我呀! )

又順便去人地d blog度"邪魔"(打攪)一下,又繼續响呢度語無倫次發up風


原來一晚都做到幾多野架喎!

 

更好野係呢輪仲有時間可以快速咁煲埋日劇

可能係終於都春回大地,睇黎死蛇爛鱔都冬眠完畢喇!

雖然係咁講,但最好都係"神呀!請給我多一點時間"

24小時真係唔夠我用,我唔大貪,每日俾我多6個鐘,咁就心足架喇!

 

以往多數都係撈埋d 冷飯菜汁日劇,新片都擺到變舊片先會去睇

難得今次會咁快手就睇左上季日劇,仲快手到7日就煲完晒添!

就係呢套 JIN-仁- (中文譯名:仁者俠醫)

 

記憶中我從來都唔會揀睇呢d古裝片黎睇

可能呢套係講現代醫生响時空交錯之下

返左去江戶時代,呢個題材都幾有趣,再加上d收視都唔差

咁先令我有興趣睇,話非常好睇又唔算,不過都幾唔錯

其實呢套戲係改編自漫畫

真人版就由大沢隆夫飾演"仁醫"

 

漫畫中既"仁醫",靚仔過日劇中嗰個啵!

 

醫生題材既戲應該係好嚴肅既,呢套大致上都係

不過最初講"仁醫"啱啱去左江戶時代時又講埋d現代用語

又話要幫傷者做開腦手術,只係咁又幾有趣既

不過當佢安定左落黎之後,咁全套劇情都係好認真

日本講醫療既日劇,內容總係會有權力鬥爭

原來呢個情況自古以來已經係咁

"仁醫"返左江戶時代,都一樣要面對呢d明爭暗鬥既事

如果認識日本歷史人物既話,咁睇呢套戲會仲有趣

因為响"仁醫"身邊出現既人,就係江戶時代,舉足輕重既人物

"仁醫"响現代本來係一個好好,又有自信既醫生

同樣係醫生既未婚妻(中谷美紀飾),因為腦生左個瘤要做大手術

操刀既人就係"仁醫",結果手術後,未婚妻變成植物人

而"仁醫"對於自己既醫術都失去左信心

 

 

"仁醫"無端端返左江戶時代,唯有扮部份失憶,咁先可以隱瞞到佢既身世

不過好彩佢有"咲"(綾瀨遙飾)做佢助手兼聽佢訴苦

"咲"傾慕"仁醫",再加上佢善解人意,柔中帶剛

雖然年紀輕輕,但已經好有勇氣咁正視自己既人生

"咲"並唔似d古時女性,咩都無主見,連自己既人生都由其他人作主

 

"咲"知道"仁醫"係黎自未來,又知道"仁醫"依然深愛未婚妻

但"咲"依然愛得無佔有慾,只係一心要守護"仁醫"

其實我幾鐘意"咲"呢個角色

"溫婉"呢樣野,唔止可以冧死男仕,連女仕都一樣會被迷倒既

 

"仁醫"一個人去到江戶時代,响一個醫術落後既世界

佢用自己既醫術的確係可以治癒好多人

咁樣就令"仁醫"重拾返作為醫生要盡力救人既使命感

 

 

除此之外,佢仲認為如果可以改變歷史,令當時既醫學可以加快步伐

咁樣到左現代,佢未婚妻既命運可能會改寫

(切除腦瘤都唔會係風險好大既手術)

 

當時有一個花魁(名妓)"野風"(中谷美紀飾)

佢同"仁醫"既未婚妻相長相似,連個性都有d相似

 "仁醫"相信"野風"就係未婚妻既祖先

"野風"多次見到"仁醫"救人,所以都漸漸傾慕"仁醫"

不過因為自少被賣去妓院,所以"野風"既個性就堅強倔強好多

"咲"知道"野風"都傾慕"仁醫"

雖然大家係情敵,但兩個女子既相處依然係好友善,而且好有風度

其實大家都係出於對"仁醫"既愛

"咲"同"野風"既個性,都有討人喜歡既理由

女人至少要大方得體架嘛!

 

"野風"本來既命運係會俾有錢人贖身,離開妓院而成為妾,後來會患上乳癌

江戶年代患上乳癌係必死無疑

"仁醫"認為呢個係"野風"既命運

命運唔會改變,咁"仁醫"既未婚妻先會可以响未來出生

 

所以"仁醫"即使知道"野風"患上乳癌,但都俾好多藉口自己,唔想為"野風"醫病

其實佢怕改變左"野風"既命運,就會連未婚妻既命運都會改變埋

"咲"將所有事看到眼裡,唔能夠認同"仁醫"為左未婚妻既原因

而對"野風"既病當作視而不見

"仁醫"經過多番掙扎,終於決定為"野風"割除腫瘤

將"野風"既病醫好左,但响改寫他人既命運之時

都似乎意味住未婚妻既命運會被改寫,而"仁醫"都可能再返唔到現代世界

 

因為患病,"野風"贖身為妾既事告吹左

病醫好左之後,"野風"都離開左妓院

自己一個人响其他地方重新開始新生活

 

其實呢11集既戲,結局仲留左好多無交待既事情

都肯定係有第二輯既,真係好想知佢點收科

“仁醫”又點樣可以回到現代呢?