2014 日本之旅 DAY 8 @ 大阪-咀越來越刁

  

2014年5月10日～星期六，大阪天氣






响膠囊酒店只係齋泊，無朝食

所以哩朝早CHECK OUT後就返東橫INN CHECK IN


哩兩日响大阪嘅活動只係食+買，所以會四圍去

哩張週六，週日及假日適用嘅特惠ONE DAY PASS只係600日元（平日原價係850日元)

又係要買佢黎用啦！

可能有PASS在手，白伽煎無懼坐錯車，出錯站，所以就掉以輕心

咁樣就真係出錯車站喇！

第一晚黎到大阪時住响船場東嘅東橫INN，當時係使用堺筋本町

住左一晚就搬左去隔鄰谷町四丁目嘅東橫INN

結果就係出錯左車站去左堺筋本町

本來可以行10分鐘去谷町四丁目嗰間東橫INN

不過既然買左ONE DAY PASS，咁就再返落車站再坐過，唔想嘥腳骨力

去到東橫INN CHECK IN同寄存埋個＂細仔行李＂後就出發上路

白伽煎以前試過响早餐時間CHECK IN，細心嘅職員邀請白伽煎可以食埋個自助早餐

不過哩間就無咁貼心嘅職員

雖然食堂响2階，白伽煎真係食左都無人知，不過哩啲咁厚面皮嘅事白伽煎就唔想做

出得門就要記住自己身份係香港人，唔好做啲失禮香港人嘅事

繼續空住個肚就去第一個觀光點：黑門市場

哩次係白伽煎第二次去黑門市場，都係第一次認真咁行

以前响黑門市場好易聽到廣東話，不過宜家就係四圍都係普通話人

黑門市場已經俾國內人攻陷左，佢地繼續响人地國家表現出佢地特有嘅民族修養

唔理其他人塞住人地門口／通道，整跌啲貨又唔執返......

去到一間售價偏低嘅藥局，迫滿好多普通話人，只見啲職員面無表情

連大和人嗰種點都要有禮嘅服務態度，似乎都無力再表現出黎

蝗蟲對全球人嘅影响力真係不能睇少

仲未食早餐嘅白伽煎走左入一間超市，買左哩兩樣食物做早餐

乳酪奶＋＂脫印＂布丁

其實黑門市場有好多刺身可以即買即食，不過白伽煎就無興趣

都唔太想响哩度逗留太耐，買完要買嘅野就快閃

白伽煎之前上網睇過以下條片介紹漬物

https://www.youtube.com/watch?v=rAiACbL54TQ

紅酒大蒜到底會有幾好味呢？對於食好野，白伽煎從來都唔會放過／錯過 

要揾嘅就係哩間漬物店

仲設有試食，當時店外圍左一個香港家庭响度話：咁平就買啲啦！

傳說中超好味嘅紅酒大蒜漬物係相片中，中間嗰個

絕對唔係3袋1080日元嘅貨品

紅色嘅係紅酒浸醃，橙色係白酒浸醃，其實兩款都好味

不過就好似紅酒嗰款係更特別

咀刁嘅白伽煎無懼重量，買左4包返香港歎，哩個做手信都好

哩次响黑門市場買到零食帆立貝

响黑門市場買完就走，準備去食午餐

話說到埗大阪當晚，白伽煎計劃再去食大魚子丼

但係當晚揾黎揾去都揾唔到，夜晚認唔到路，又無左個食店招牌

大阪又正值係GOLDEN WEEK，購物區一帶人太多，咁當晚就係揾唔到

旅程再回歸大阪，唔食過哩間嘅大魚子丼，白伽煎會抱憾返香港

所以哩日再黎食店大搜尋（哩間係大魚子專門店，只係間中有海胆丼賣）

白天果然係認到路，好快就揾到，食店招牌仲响度，咁即係唔係結業

行入大廈入面食店無開門，咩事呢？

只見門口有告示

原來店主突然入院

吓！希望佢早日康復可以快快復工，明年白伽煎要再食到佢嘅大魚子丼

大魚子丼就食唔到，咁點算？　

唔怕！仲有其他後備，坐車去谷町一味禪，幾年前都去過一次，又係一間有口碑嘅食店

海老穴子天丼係名物，事實真係好大件，900日元係超值

不過白伽煎唔食鰻魚，咁就注文其他丼，

同上次黎食時一樣，注文最貴嘅海胆大魚子丼，盛惠2100日元

海胆係連同木棺材咁放飯面

掉左個木棺材之後，其實食材又唔算多

白伽煎都係懷念嗰間店主入左院嘅大魚子丼專門店，一味禪已經OUT左喇！

仲記得第一次去一味禪係2010年，嗰時都絕讚哩間一味禪

到左2012年第一次去大魚子專門店，當然又係絕讚啦！

之後2013年又去過，真係好記得哩間啲大魚子味道＋口感

哩次再去一味禪，海胆無得比較，但大魚子真係無專門店嗰間咁好

一味禪嘅大魚子只係好普通料子

無法食到大滿足，之後下一個景點又係去三井OUTLET

時間唔多，只係鎖定幾間舖頭就掃，週六嘅購物地方都相當熱鬧

買到一袋二袋，先返酒店放低戰利品，再出難波食晚飯

去到難波又見人潮，本來响難波都容易迷路，人多之下更迷路

白伽煎企响0101外面睇地圖，有個保安叔叔主動問白伽煎想去邊

其實白伽煎當時大概都知道要行邊個方向

但遇上熱心友善嘅天使，咁又不妨珍惜哩點點緣份

哩日晚餐再黎手打烏冬，哩間三佳屋响食評網站都有3.47分（滿分係5分)

食店網站: http://udon-miyoshiya.com/

白伽煎一個單身女子咁獨行，注文之後又四圍望，又影相

終於引起肥店主嘅注意，佢問白伽煎係邊度人？

跟住就問白伽煎係咪寫雜誌嘅人？

原來肥店主以為白伽煎嘅職業係寫旅行稿或者旅行天書

肥店主仲遞上兩張名片

講返食先～注文左兩件鯖魚壽司＋咖喱手打烏冬

咖喱仲要揀辣度，白伽煎不嗜辣，揀左普通

終於都開飯喇～

鯖魚壽司：就有啲失望，入口無滿滿嘅魚油口感

手打咖喱烏冬：手打的確係有彈牙口感

但係咖哩汁就比預期中遜色，哩個汁係廣東菜嘅獻汁多啲，咖喱味又唔濃

不過當時禮貌上都仲係要講：おいしい～おいしい！

好彩白伽煎唔係寫旅遊天書，如果唔係實倒佢米都似！

响哩度倒佢米都影响不大，因為哩度無乜人氣

店內有個色士風，夾左世界各地嘅紙幣，原來都係食客主動留低

白伽煎都揾到10元，20元面值嘅港幣，如果佢無，白伽煎都會留低一張以示＂到此一遊＂

哩晚返到酒店第一次用東橫INN嘅洗衣機

屋企嘅電器中，洗衣機都係白伽煎從來唔會接觸嘅電器

結果哩晚搞左個大笑話出黎，實在太低能所以唔公開講

不過哩次之後，白伽煎知道其實無需用乾衣機，洗完之後拎返房間掛起

翌日都會乾透，仲可以為房間保濕，皮膚都唔會太乾，又慳返乾衣錢

又唔會傷到啲衫令佢地縮水



2014 日本之旅 DAY 7 @ 大阪 - 膠囊酒店初體驗

2014年5月9日～星期五，大阪天氣

歎完個馬肉刺身後，極快咁坐車去長堀站，哩晚繼續有新野玩

就係膠囊酒店（又稱棺材酒店）

出左車站徒步5分鐘就到，以下部份光猛嘅相片係翌日離開時先影

响大和城市有膠囊酒店都好普遍，但白伽煎都上網睇過口碑先揀哩間

唯一理由係哩間全層5樓都係女生樓層，雖然其他都係男女分開

不過專為女性嘅話，感覺上就係體貼啲

行上2階先係接待處，1階係餐廳

當晚都趕得切响23:00前CHECK IN

見到個職員，化晒粧嘅後生靚女，同白伽煎講解入住注意事項時

說話相當流利，無數嘅敬語，白伽煎突然好懷念小豆島泊宿酒店遇上嘅叔叔

對客人恭敬非常故之然係好，不過就冷冰冰左啲

上左5階，入埋大門要小心留意地毡顏色

唔好著住街外鞋踩入深色地毡部份，嗰度係就寢區，所以要保持衛生

所以參觀自己個膠囊之前，首先要先去儲物室換鞋

白伽煎嘅膠囊係5-061，儲物柜都係相同號數，相片中嘅鎖匙只係開大門用

儲物柜係用密碼鎖，由自己重設密碼

打開柜門，有齊毛巾，浴衣，拖鞋等等

突然間白伽煎發現個儲物柜咁窄，如何放個＂細仔＂行李呢？

唔知會唔會有額外付費儲物柜俾有需要嘅客人用呢？

去返接待處同個女職員講，結果換來係幾句：抱歉，相當抱歉，非常抱歉....

吓～無！唔通要將＂細仔行李＂寄存响車站嘅儲物柜入面？

返去再試，好彩＂細仔行李＂係軟嘅行李袋，攞走入面嘅野，將佢直立式嘅放置都夠位

好明顯哩間膠囊酒店無預算俾旅行人仕入住

只係預俾嗰個趕唔到車回家吃嘅人借宿架啫！

安頓好行李後就去沖涼，先參觀一下啲設備 

梳洗間

有齊全套落粧，潔膚，護膚用品

浴室有3間，唔係公用大浴場，而係私人空間小浴室，哩個真係要讚 

就寢居就係咁樣

白伽煎嘅膠囊係樓下嗰個，唔洗擒上擒落

 

為免影响他人休息，所以敬請要保持安靜

膠囊入面地方細細，但樣樣齊備

拉落捲簾，咁就係一個私人空間 

有埋電視機，不過入住哩日已經係夜深，所以無試開電視機

收音機，鬧鐘，插蘇供電話充電用

可以調教嘅冷氣出風口

鏡

基本上係各樣齊備，泊宿一晚係2900日元

白伽煎都算好彩，哩晚哩邊入宿嘅人只有4個，但另一邊就有7，8 個

始終太多人行黎行去就好易醒，白伽煎都不時被啲拖鞋聲嘈醒

 

一向無懼陌生地方都可以瞓覺嘅白伽煎，哩晚都瞓得唔太好，而且唔係好快入夢鄉

試過入住膠囊酒店就夠，當做係一個觀光體驗

旅行未必要豪花，但能夠好好瞓一覺都係基本享受

關於哩間膠囊酒店嘅影片，可以睇以下影片

https://www.youtube.com/watch?v=nqA5Siw8WDg