2014(秋季)單人匹馬闖日本之旅 DAY 2@青森 - 把鬼朝食

2014年10月5日～星期日，青森天氣（晴到無倫）

 

 

前一晚雖然搞到凌震一點幾先去揾周公，但其實哩個旅行開頭２，３日都失眠

雖然話旅行可以減壓，但最初去到海外都未能即刻將啲惡人惡夢洗腦

繼續係失眠，真陰公！

終於勉強咁瞓左４個鐘，醒左瞓唔返，決定起身出去逛下，無謂浪費光陰

 

朝早５點幾，天都未光晒 ，哩次住响8樓，風景幾咁開揚

 

 

 

最後決定出去食早餐，唔吼酒店嘅飯糰

車站嘅時計顯示青係６：０８，相當早啊

天光左先叫做可以睇真啲，青森就係哩個模樣

青森係一個海鮮出名嘅城市，黎到當然不能錯過最新鮮嘅海鮮啦！

 

香港旅遊天書推介响ＡＵＧＡ入面有好早就開店嘅壽司海鮮丼店

 

哩度咁近酒店，所以是日早餐就响哩度

 

 

 唔會聽晒旅遊天書嘅資料，上食評網站睇埋各間食店嘅評分

 

當中又以哩間＂すし処 三國＂嘅風評係最好，咁就揀哩間啦！

 

 

 

舖頭嘅擺設完全可以用不修篇幅黎形容

 

哩兩個似係老闆／老闆娘喇卦？！

 

 

 

 

以日本咁講究形象嘅國家黎講，哩間食店都算係＂我行我素話之你＂

 

 

 

1500日元嘅大魚子＋帶子海鮮丼

 

白伽煎對於帶子刺身就嫌佢味道淡，生食唔及熟食咁吸引

 

所以注文左一個大魚子丼

 

 

いくら同うに都係白伽煎嘅至愛，食得多都識食左 

坦白講哩度嘅いくら唔覺得特別新鮮，响大阪食過いくら專門店嘅いくら丼

 

青森海鮮市場入面哩間就顯得平平無其

 

 

 

 

食完早飯逛埋哩個魚市場

白伽煎本來只係抱住逛下嘅心態，無諗過要買野

 

事實哩日先係行程正式開始，唔急住要買手信啫！

 

不過哩個全場最識得做生意嘅嬸嬸，為左促銷生意，不停俾(其實係迫)白伽煎試食

食食埋埋咁多都唔好意思唔幫趁，終於都買左幾包

 

 

 

哩個月份正正係青森嘅蘋果收成期，市場上當然唔少得佢出場啦！

 

 

出左市場見到＂青森魚菜センター＂哩個紅色招牌

 

哩度都列入左行程中要光顧嘅食肆，時間尚早，走去８下先

 

去到就見到一堆人排隊輪飯，好有監獄風雲ＦＥＥＬ，都底咩事呢？

 

哩個奇景响往後幾個鐘一直都深印白伽煎嘅腦海，揮之不去

 

哩個表現已經代表擦出了＂激情的火花＂

 

待續

2014(秋季)單人匹馬闖日本之旅 DAY 1@青森 - 愛恨交纏。食到嘔電

2014年10月4日～星期六，青森天氣（夜。晴）
 

响東京駅玩左大半個鐘就去月台等住北上

已經有好幾年無坐過新幹線，皆因做左＂慳精＂，愛上坐高速巴士遊日本

除左車費比新幹線便宜之外，仲鐘意佢舒服，省去要轉線轉車嘅煩惱

坐高速巴士並唔太適合哩次嘅行程，車程太遠

更重要嘅係哩張JR東北票嘅價錢實在太抵喇，點可能唔用佢呢？唔會同錢有仇啫!

哩次由東京駅去青森，還好就係唔駛轉車轉線，上車後就直坐到尾站

 

由東京駅直達新青森站嘅新幹線係响2010年12月4日先全線通車

 

唔係好耐之前嘅事咋!

 

一坐又3個幾鐘，哩日全日就係「坐完又坐」 

終於去到新青森駅～咋

 仲要再轉車先去到青森駅

照常理:新幹線到站，乘客會有足夠時間轉下一班接駁電車

白伽煎响哩個時候就完全係"バカじん"咁懶醒無跟大隊行

自己周圍摸路，用個ＰＡＳＳ又出閘又入閘

當揾到去青森駅嘅月台時，已經係咁水靜河飛，雞飛狗走晒喇，只剩下一個"馬鹿(バカ)"

因為走左車喇，等吓先啦~バカ (死蠢)！

北上黎到青森後，就感覺到有寒意

只需5分鐘車程就到青森駅

泊宿嘅東橫ＩＮＮ就响車站前

跳字時計顯示時間為20:12，"大移動日"終於大功告成，安全抵埗

响酒店CHECK IN完之後，即刻出去揾食

其實哩日响飛機上食左飛機餐之後，就無食過正餐，其實係肚餓

出發前，白伽煎已經上網揾晒哩個行程要去嘅食店

而哩晚就揾左間居酒屋

白伽煎响食評網站上揀食店嘅首要條件係分數必定要有３分或以上

哩間都合格，其實揀佢嘅原因係哩間有馬肉刺身

去到日本就總係心思思想食馬肉，過其心癮，做其野人

 

青森都有各樣名物，其中就有貝燒味噌

舖頭細細間，哩晚係星期六，所以都差唔多坐滿人，只有單丁散位

眼闊肚窄又唔飲酒嘅白伽煎，去到居酒店又變身為"馬鹿(バカ)"

人地去居酒屋係慢慢歎，食完一啲再叫一啲

哩隻"馬鹿(バカ)"一坐低就注文馬肉刺身

可惜，老闆話：今晚無馬肉刺身

吓！！！大震驚呀！！！

响驚魂未定之下注文，一次叫左３道下酒小菜＋一杯橙汁

會唔會太多呢？

 

 

第一道菜係炸芝士

 

 

  

哩個好味都不得了

其實白伽煎係＂奶品精＂，連臭過臭豆腐嘅芝士都可以食得津津有味

哩啲咁正常嘅芝士，只係用左罕有方法咁去煮理

白伽煎點會覺得唔好食呢？！

原來炸芝士＋WASABI+醬油一齊食，係好好好......味！

 

 

 

能夠食到好野，就算食完要變做"哀伊屍"都死而無憾啦！

 

 

第二道上嘅就係青森名物：貝燒味噌

 

 

 

哩個白伽煎就覺得一般：帆立貝加左雞蛋，味增等一齊煮

口感相當濕，哩個唔係白伽煎欣賞嘅口感 

 

 

 

食埋哩個都已經感覺到有啲飽，但仲有一個注文未黎喎～

 

 

哩個都係青森名物：ゲソ揚げ 

 

 

相片入面一條條嗰啲係魷魚+菇

哩碟野最終都只係食左一半就放棄，實在食唔落而且食到想嘔

又唔係話難食，只係相當一般

 

已經有啲飽，又唔係自己鐘意食嘅野，所以實在係食唔落

再加上啲魷魚係口感硬，夾硬食落肚時，有啲反胃想嘔嘅感覺

 

 

 

响居酒屋食完晚飯都只係9點幾，住宅區嗰邊有超市仲未關門

 

但哩個時間嘅青森住宅區嗰邊已經好靜，街燈又唔多

 

抬頭細心睇下仲見到星星，青森唔算係光害嚴重嘅城市

 

條街靜到白伽煎一邊有啲驚，又一邊揾路，最後都揾到，為左食就會心口掛個"勇"字

 

 

下圖部份就係其中嘅收獲

 

 

"家落D"嘅栗黃金係响東京駅專門店買嘅，哩個係甜味薯係，都相當特別

 

 

另外兩杯小食：

 

期間限定版嘅蕃茄味"炸家D"就唔食都無損失

 

不過隔離嗰杯"零字"芝士薯粒就唔錯，可以食過返尋味，又係因為"奶品精"上身嘅緣故

 

所以有私心

 

 

 

 

 

4款朱古力，最讚都係右邊嗰隻咖啡豆味，100YEN都唔駛

 

 

 

第一日响東北已經親身經歷東北嘅＂落後＂

 

 

 

哩次白伽煎都係泊宿東橫INN，仲要住算係高層嘅八樓，風景又開揚，以為執到寶啦！

 

點知原來係無WIFI訊號，接收＂弱到無朋友＂

 

試過走出房間，去到走廊都一樣係＂弱到無朋友＂

 

無理由着住睡衣走去地下大堂上WIFI啫～

 

結果哩晚就選擇＂斷六親＂做獨家村，留响房睇電視就算

 

 

 

日本嘅東橫INN甚至其他酒店／旅館，由北海道住到四國，從未試過係用唔到WIFI

 

往後仲有機會感受東北有幾＂落後＂

 

 

 

 

哩晚搞到可以揾周公，都已經係凌晨一點幾



2014(秋季)單人匹馬闖日本之旅 DAY 1@東京－傲慢無偏見

2014年10月4日～星期六，東京天氣

(註：第7次單人匹馬獨闖日本）

到埗東京嘅首日，其實全日都無行程，皆因哩日係大移動日

天黑後已經會身在青森

全賴揀左撻尾航空：遲唔會遲，早實會早

預計13:50响日本着陸，咁當然又係早左啲到埗

當日大約13:30已經落機，等埋過海關都只係用左20分鐘左右

白伽煎一直對東京都無乜好感，哩個印象直到宜家都無變

 填入境申報表時，要填寫泊宿地

白伽煎哩晚會泊宿在青森東橫INN，咁咪誠實照寫囉

等過海關時，前面兩個女子係大陸人，着住性感熱褲，咩住Ｌno B名牌手袋

其中一個仲識講日文，唔算好流利，但至少比白伽煎好

海關哥哥好快就俾佢地兩個走

到左白伽煎，佢一見到青森東橫INN哩幾隻字

已經問：去青森（佢相當懷疑嘅語氣）？去青森做乜？

白伽煎如實相告：去觀光

海關哥哥：觀光？你點去呀?

白伽煎答：陣間坐新幹線去

海關哥哥 : 你留日本幾耐?

白伽煎答 : 一個星期

態度仍然係相當差嘅海關哥哥話：.........請你打開行李

白伽煎一定合作俾佢檢查，不過為乜態度要咁差？

一個女仔唔可以自己去日本觀光嘅？個個外地人都只應該去東京先合理嘅？

定還是白伽煎應該亂寫一個泊宿地，只要係响東京就可以？

又再一次令白伽煎對東京加多一個反感

其實無乜需要白伽煎真係唔想踏足東京＆札幌，對哩兩個地方都不能有好感

遠征日本嘅經驗越多，响其他小城市或者鄉間，友善嘅面孔笑容隨處可見

即使不認識嘅人都會互相問好

（明知係門面功夫都無所謂，一個笑容總比一個黑面好）

相比之下就會越反感哩啲大城市人，不可一世嘅傲慢態度，連客氣門面功夫都懶得做

咁送佢幾個「劣」都係合情合理

過左海關第一時間去買JR PASS，把握每分每秒

哩次買東北嘅JR PASS（彈性自選5日），仲要係去到日本先買

還好，遇上個友善嘅JR姐姐，佢嘅笑容算係消解左之前過海關時遇到嘅一肚氣

用JR PASS就當然係坐最舒服嘅N'EX

全因為撻尾嘅有早無遲，白伽煎先趕到14:18嘅N'EX

本來撻尾預計13:50响日本着陸，如果準時先到埗，咁必定要坐遲一個鐘嘅N'EX

哩日要北上大移動，咁當然係越早出發就越好

N'EX大約1小時就直達東京駅，中途不停站

哩張JR PASS又包含左一個黑仔故事，到佢出場時先再詳述

一次劃晒兩張車票，去到東京駅就轉坐東北新幹線

N'EX去到東京駅大概係15:20

白伽煎跟住要趕上16:20嘅新幹線去新青森

中間可以偷到大約1個小時，咁有乜好做呢？

就係去揾食

哩日係星期六下午，東京駅人山人海

＂家落D＂响日本設有專門店，但暫時只限東京＋沖繩＋札幌＋博多

難得黎到東京，當然要朝聖一下，順便醫肚

食薯片都可以醫肚？似係過口癮，心癮多啲

 

哩度食到嘅薯條應該係最新鮮，MENU就係以上哩個

對於最右下角嘅薯條寫明係＂一番人氣＂，真係百思不得其解

＂家落D＂嘅薯條家族明明係人才濟濟

有黎自北海道嘅薯條三兄弟

又有可愛嘅Jagabee

仲有價錢最平嘅長頸鹿

三款之中以長頸鹿係最難食，口感又硬又乾

咁點做＂一番人氣＂呢？

哩期做緊本店限定版嘅係Chicken Tatsuta 味同 Peperoncino味

 

最後白伽煎揀左雙重芝士味

買左都仲要等即做，薯片係响個小廚房度生產

所以要食就要等

但如果講係咪好食？咁真係無乜特別

雖然有個小廚房新鮮炸出黎，但食落口嘅薯條唔係熱嘅

又食唔出係特別新鮮，同市面販賣嘅包裝薯片無分別

分別似乎只係價錢，哩個貴好多