四月出發既櫻花之旅會去岡山一帶
順路既關係會去鳥取
去鳥取既主要目的並唔係賞櫻,亦都唔係去鳥取砂丘
而係去睇妖怪
鬼太郎
鬼太郎
我都係鐘意目玉オヤジ多d,呢個鬼太郎老爹相當鬼馬又可愛
本來係因為順路先安排既行程,宜家慢慢變成非常咁期待 
本來從未睇過鬼太郎卡通,宜家變成日日都睇緊既日語片集
本來完全唔知道作者-水木しげる既事
宜家認識多左
宜家認識多左
因為想去到境港參觀鬼太郎町時可以更加投入
所以呢段時間就開始補課
唯有多加認識,到時先會更加投入.......結果因為更了解,所以更喜歡
為左搵境港鬼太郎町既資料
先知道原來水木先生係失去左手既傷殘人,佢既故事漸漸令我產生好奇心
水木先生係鬼太郎既作者,而水木太太都寫左一本書
呢本書首先被拍成電影,後來被拍成日劇,响日本既口碑係相當唔錯
呢d家庭溫情式既日劇,可以話係婆媽既戲
一直睇呢套戲,見到水木夫婦既相處模式,一直反思到好多事
布美枝--水木太太劇中既名稱,不過呢個"水木"姓氏,都只係一個筆名
水木先生真正既姓氏係"武良"
布美枝生於1932年,响大家庭之中排行第4
平時性格內向怕事,但响緊急關頭時就會有堅毅既力量+勇氣
嗰個年代既日本女子係無地位可言,在家從父,出嫁從夫
完全唔可以反對父親或者丈夫既意見
布美枝出生於商人之家,屋企係經營小生意,當時算得上係家境不俗既大家庭
布美枝因為身材高挑既關係,所以久久都搵唔到願意相睇既人
(連身材高挑都係壞事,宜家聽落真係有d不能置信)
布美枝直到28歲先有相親既機會,對象就係水木先生
佢比布美枝年長11年,而且仲係失去左手既傷殘人,响東京以畫出租漫畫為生
因為只係醉心畫漫畫既事,對自己既婚事就完全唔在意
相睇見面之後,水木先生就以布美枝既身高為靈感畫左呢個漫畫造型
呢個造型後來仲變為鬼太郎漫畫中一個重要既角色
一反木棉
一反木棉
相睇5日後就舉行婚禮,之後布美枝就離開家鄉去東京生活
去到東京之後,布美枝先知道原來以畫漫畫為生既丈夫係相當窮困
連相親時所着既西裝都係水木先生問哥哥借來既
水木先生既破舊屋企的確係頗為嚇人
本來對婚後生活有美好憧憬既布美枝,全部都幻想破滅
布美枝無因為咁樣而跑返外家,佢的確係付出好大既勇氣
當時出租漫畫已經係夕陽行業
堅持自己興趣與才能既水木先生就不放棄咁繼續畫漫畫
水木先生的確係有天份既漫畫創作人,亦遇到唔少認同佢能力既人
不過當運氣仲未黎到之時,霉運就一直咁跟住佢
即使係咁樣,水木先生一直都無諗過要放棄畫漫畫
每當投入漫畫世界之時,水木先生就會去到完全忘我既境界
對漫畫完全唔認識既布美枝,見到丈夫對漫畫既熱情,都變得很受感動
所以即使生活係相當窮困,布美枝仍然極力支持丈夫既工作
佢可以堪稱為"大和撫子"
布美枝既爸爸去東京探女兒,先知道原來女婿既生活係咁窮困
布美枝以往寫信返屋企都係有所隱瞞
而當日仲發生左一d小誤會
衝動既爸爸眼見到咁既情況,就同布美枝吵起黎
從來唔會反對爸爸既布美枝為左維護丈夫而跟爸爸頂咀
爸爸看在眼裡,明白布美枝對丈夫既信任與支持
即使女兒既生活的確係相當困難
但爸爸都放下心頭大石,深信女兒已經擁有美好既婚姻
與其話布美枝對愛情執著,倒不如話佢對婚姻有一份堅持
事實上只係相睇既婚姻,仲火速舉行婚禮
咁短時間係相處,兩個人可以談得上有幾多愛情存在呢?
細水長流既感情都要由時間,一點一滴咁結聚而成
而布美枝確實係由決定結婚嗰一刻,就立心要執子之手,與子偕老
只係呢一份信念,已經足夠令現代人好好地反思一下
點解自由戀愛之下竟然會有更多失敗既婚姻?
水木先生當年因為打仗被派上戰場,結果因為感染傳染病而在營中休養
突而其來既空襲,無法逃走之下,咁樣就失掉一隻手
因為變成殘癈,咁先有機會回國,唔會戰死沙場
,clic
失去一隻手,就撿回一條性命,咁樣到底係幸運?還是不幸呢?
戰爭既往事令水木先生既求生意志變得更強
雖然戰爭的確帶來痛苦既回憶,不過水木先生既人生觀仍然係積極,正面
只係呢一點已經令到我相當佩服水木先生
當布美枝知道自己懷孕之後,家庭經濟會更加足襟見肘
所以最初得知太太懷孕之後,水木先生差唔多係無任何正面既回應
一向默默忍受丈夫大男人個性既布美枝終於第一次離家出走
最後當然係由水木先生接佢返屋企
同時兩個人都決定勇敢咁面對未來一家三口既生活
婚後3至4年,窮困倒霉既日子一直跟住水木家
即使水木先生再努力咁畫,但倒霉既運氣一直都揮不去
屋企入面有價值既物品,已經全部攞去當舖做底押
連女兒出生後過既第一個女兒節
都因為買唔起裝飾品同節日既食品黎慶祝,水木先生就畫左一張畫黎代替真實既裝飾品
~
最後當然係水木先生捱出頭來,遇到好既機遇
咁樣先會有今日既鬼太郎漫畫,會有水木夫妻既往事被拍成電視劇
布美枝同水木先生第一次相遇既緣份可能係响童年,青年時代
童年時既布美枝,有一次响森林迷路,佢覺得有妖怪跟住自己
布美枝相當驚咁逃走
途中遇到一個中學生哥哥
途中遇到一個中學生哥哥
佢拖住布美枝遠離妖怪,而呢個哥哥對妖怪既事係相當熟悉
當布美枝嫁左俾水木先生之後,有一日就記起呢件往事
只係對呢件往事,水木先生就唔係好記得,似有還無一樣
不過布美枝就相信當時嗰位哥哥就係眼前既丈夫
呢套戲由最初既低收視,直到最後成為由2004年開始
晨早播放既日劇之中,收視排行第三名
雖然話呢d戲係婆婆媽媽既劇情
不過即使係再婆媽,都係每個人身邊最平凡不過既事
因為人人都會有家庭(或者希望自己最終會擁有自己既家庭)
全套戲係以布美枝為中心,所以重點就係表現布美枝有大和撫子既美德
男仕大概會希望遇到好似布美枝一樣,事事依從自己既女性
不過水木先生都係一個唔可以忽略既角色
身為女性既我,就睇到水木先對家庭既承擔,對生活既勇氣
名符其實地肩負起一家之主應有既責任
雖然舊時日本社會個個都係大男人,不過水木先生間中都有體貼而細心既一面
不宣於口,但就用行動表示
的確現代既男仕比舊年代既男仕更見體貼細心
即使無行動,但至少都會用把口講,咁都做左門面功夫
可能呢d就係溫室之下成長既人,自然地都會變得弱不襟風
要好似舊社會既男仕咁樣肩負家庭重擔,對自己既承擔?談何容易
實際上做不來,咁至少都仲有把口,用口黎空談都總好過乜都無
我欣賞布美枝既個性之時,都同樣欣賞水木先生對逆境所付出既勇氣
劇中,布美枝同水木先生經常掛响口邊既一句說話:"...總會有辦法既....."
布美枝自細都怕事,但婚後都因為丈夫既關係而變得咁樂觀
呢d都係兩個人生活之下,互相既影響
劇中除左水木先生之外,布美枝既爸爸都係一個相當重要既角色
佢都係名符其實既"一家之主"
布美枝擁有"大和撫子"既個性,都係由屋企所影響
布美枝既父母跟水木先生既父母就相映成趣
水木先生既爸爸响當時係一個"潮人"
佢係境港市內第一個可以去東京讀大學既人
可能因為本身既高學識,所以連娶得既太太都與別不同
水木老太太既行為係凌駕丈夫
响當年既年代實在係相當咁in,奇怪咁巴渣既女人
都無俾丈夫休妻
都無俾丈夫休妻
呢d確實就係緣份
初時布美枝嫁入水木家之後,見到老爺奶奶既相處之道都為之側目
呢套戲無高潮迭起既劇情
反而講到水木先生兩夫婦一直都擺脫唔到貧窮之時,呢一段略嫌篇幅太長
不過呢套戲係真人真事,唔係虛構出黎,所以劇情上都偏向真實
雖然無高潮起伏既劇情,但就有細水長流既溫馨
睇完呢套戲,令我更加想去鬼太郎町,想知道更多水木夫婦既事
慢慢歎啦!
有無搞錯!
會停低,留步嘅人
