2014 日本之旅 DAY 10 @ 大阪- 男仕風度大倒退

2014年5月12日～星期一，大阪天氣

回程返香港哩日份外緊張，因為實在係第一次搭咁早機返香港

08:55啟程返香港，所以未夠5點就要起身

外面都未天光

哩日天氣預報話大阪稍後可能落雨，好運嘅白伽煎又逃過一場雨

咁早就CHECK OUT，當然酒店係未準備好早餐啦，哩朝早都準備出機場先食早餐

不過都預左哩個咖啡布丁做甜品早餐

離開酒店時天就光晒，不過街上都無乜人

哩朝早發生一件小小騰雞事

話說前一日已經响NAMBO CITY探左路，07:00之前要用2F中央改札口

不過當白伽煎去返之前嘅入口，全部都鎖上，仲未開門喎

死火啦，咁點算？飛機唔等人，電車都唔等人架喎

條街又無乜人，問邊個呢？

（以下係前一日影嘅相）

無計可施之下，拖埋行李向前行，高島屋停車場出口有兩個保安員

白伽煎唯有問佢地，佢地都唔太清楚，只係指白伽煎去正門睇下

正門入口開左，好彩，都無問錯人，原來咁早只開放正門

05:43黎到，可以搭06:02嘅空港急行車

黎到等電車，先叫做鬆一口氣，應該會無誤喇卦！

07:03就去到第二客運大樓，趁人唔多，做左CHECK IN先

＂落土＂規定寄艙行李不能過20KG

哩次白伽煎19.3KG，蝕左少少俾佢添，哈～哈！

其實白伽煎帶備小型手提磅都相當準，執行李時大約都計到係哩個重量

跟住先去醫肚，食早餐

注文左洋朝食，盛惠900日元

哩個早餐都相當豐富，哩個份量足夠包埋半個午餐

食完早餐入禁區，完成出境手續，就作最後衝次

薯條三兄弟係北海道區域食品，响大和其他地方只限機場禁區出售

咁珍貴就只限一人買兩盒（上年仲只限一人一盒）

哩個早輪响＂拮豬腦＂見過有得賣，但價錢被炒高3倍，唔知有無人會買呢？

禁區賣嘅日版JAGABEE，盛惠300日元，哩個價錢就同香港同價

神戶嘅暢銷手信，响機場禁區有售，每盒850日元

返香港見到團購，係雙倍價錢

哩個草莓朱古力同＂陸巴停＂嘅差唔多，不過白朱古力＋乾燥草莓本來係偏甜

不過神戶哩個其中一款就再封左一層酸草莓粉，咁就可以減甜，而且賣相再名責啲

買手信時，遇見一對20幾歲嘅港男女，女嘅想用埋手上餘下嘅日元，所以想買啲手信

但男嘅就樣樣都話香港都有啦，買乜啫，返香港買啦！

女嘅無癮，但都無奈接受

真係唔知旅行嘅錢係AA制？還是由男方俾錢女方洗？

如果係AA制，為乜年輕港女們用自己嘅錢都要受制於男人

而嗰個男人仲要係其貌不揚，完全唔似係高質素有條件嘅男人？

男人講到香港乜都買到，乜都唔好買

咁佢返到香港一定會捨得買返俾女朋友，即使係香港買貴過日本買

如果係得把口講話返香港買，但返到香港就唔會買嘅男人

咁嘅男人就執到都唔好恨，癈話連篇，癈男一個

白伽煎就覺得宜家時下啲港女為求有一男，完全無左自己嘅尊嚴，都放棄被人尊重嘅權利

自己都唔愛自己，咁如何揾到個真心愛自己嘅人？ 

年紀尚輕嘅港女們未身經百戰，所以未能悟出哩個道理，可能要自殘過先會醒悟

白伽煎哩啲咁獨立嘅70後港女，完全享受自給自足，有話事權

所以買左一大籃手信，買完之後先發現原來已經登緊機，買到不知時間

仲要係尾10位上機嘅乘客，攞住件手提行李，仲有兩大袋手信

其實都幾狼狽，前面有個中年大和男人目露異光

眼神好似响度問：乜香港無得食咩？做乜買咁多？

白伽煎用好吋嘅眼神回答佢：你地黎香港掃名牌時咪一樣係咁，乜大和無名牌專門店咩？

因為遲左上機，放行李嘅貯物柜都塞爆左，唯有行到後10行先揾到個吉位安放兩袋機場手信

到落機時白伽煎去攞返兩袋手信，因為唔夠高，哩啲紙袋質地又滑手

搞左一陣都攞唔返兩袋手信

附近只有睇嘅大和男人，而無人出手幫忙一下

唔通坐廉航嘅人真係CHEAP啲，完全可以無風度？

哩幾年响大和自由行，對大和男人都改觀左，佢地都會對陌生人表現有風度

不過哩次嘅經歷又令白伽煎覺得＂風度大倒退＂

行程最後一影：一拖四返到香港，完全係大豐收之旅

大行李19.3KG，手提行李係10.4KG，仲有兩大袋機場手信

暫別大和

10月响青森再見



2014 日本之旅 DAY 9 @ 大阪- 夏滋咩爹: 拾下~拾下

2014年5月11日～星期日，大阪天氣

 

哩日係行程尾二日，明早超早機返香港，所以哩日係行程中最後一日自由活動

因為翌日係超早機返香港，所以訂左難波嘅東橫INN

貪佢有直車出機場，唔洗轉車／轉線

哩朝早第一件事就係搬酒店

未試過响大阪搭咁早嘅飛機，為免到時有乜意外

所以响酒店CHECK IN左之後，第一個活動係為明早出機場而探路

心中首選係坐南海電鐵，仲有另一個選擇係坐巴士出機場

預計坐06:20嘅南海電鐵出機場，黎到NAMBO CITY先見到唔係個個入口都會一早開門

睇指示早於07:00，係要使用2F中央改札口

探完路心安之後，就開始最後一日嘅活動，繼續買未買完嘅野

前一日發生左一件氣頂事：

白伽煎由出門前已經通知各方友好，如果有野要代買，請早揚聲

點知真係有啲唔識撈嘅人會响行程返到大阪，白伽煎要四圍撲去買野之時

晚上收到友人嘅WHATSAPP，話想托買把傘

要指定顏色，唔要花邊，唔要士的頭，小巧＋輕身，大約3000日元或以下

收到訊息後白伽煎心諗：唔係嘛，咁多日都唔講，宜家先講，哩樣野要花時間去睇去揀

宜家唔係去藥局度買指定藥品喎！

之前白伽煎行程仲好悠閒時又唔講，如果早講，應該响之前嘅行程已經買到啦！

哩日仲要係母親節，全街都係人呀！

氣頂還氣頂，如果睇得中就買啦！

雖然友人講左話：唔一定要買到，咁啱有先買啦！

白伽煎就諗：咁無所謂咁就連講都唔好講啦！

講左而白伽煎選擇唔買，咁就係白伽煎嘅問題＞拒絕幫忙

哩啲人雖然唔識撈，但識得交波俾人＞推卸責任係強項

行行下見到哩幢大廈，外表無乜特別

最特別係租住者要係養貓之人，否則不合資格

如果白伽煎係貓或者狗，都恨不得可以响大和生活

哩朝再去黑門市場再買野，事實上黑門市場嘅貨品，真係平通大阪咁滯

連龍角散都係哩度最平 

跟住就係午餐時間，返難波

哩日嘅食店都係一早就揀好，地點都算易揾，而且路口都有好多指示

轉入巷仔

就係哩間：一人一鍋，有埋英語介紹

雖然哩日係母親節，但係應該無惠及哩啲小店

白伽煎係第一次响大和食店食火鍋單人入座，被安排坐响前枱

哩間店都預左做遊客生意，所以有英文指示及餐牌 

白伽煎揀左個特選牛＋豬，盛惠1850日元 

白伽煎真係唔知如何開始，係咪要等埋啲肉先呢？但煲水滾緊喎？！

老闆見白伽煎唔動手，先講可以先食蔬菜

左邊係豬肉，右邊係牛肉

港式火鍋嘅湯底已經有味，大和嘅火鍋只係清水湯底

味道只係靠沾上醬汁

最後仲有個拉面，老闆話係最後先入鍋，仲放左一碗仔醬汁指明係拉面汁

到白伽煎煮好拉面時，老闆行開左，咁白伽煎就當係煮即食面咁，將個醬汁倒入鍋內

食入口係好淡味

老闆見白伽煎食拉面為乜無左碗醬汁，就估到白伽煎將醬汁倒左入鍋

親切嘅老闆即刻送上另一碗拉面汁，其實係將煮好嘅拉面沾上醬汁先食

哈～哈！大鄉里左添！

老闆問白伽煎如何揾哩間食店？

白伽煎答：响網上揾嘅！

老闆突然眼神閃動咁問：响香港嘅網站揾到？

白伽煎答：唔係，係日本網站揾到

老闆又問白伽煎係咪寫旅遊文章嘅人？如果係，可以幫助介紹一下

白伽煎回應一句：任せてください！（包响我身上）

老闆笑了，可能佢估唔到低級程度日語嘅白伽煎識得講哩句！

老闆隨即又派咭片

白伽煎响網上揾食店時，哩間食店評分都不俗，有3.5分（滿分係5）

食材新鮮，去到難波時不妨一試，總好過餐餐係拉面，回轉壽司

 一人鍋しゃぶしゃぶ専門店：http://shabuchin-namba.com/

哩次白伽煎感受到大城市食店，同小城市食店嘅分別

就咁睇都仲係小城市前舖後居嘅生活係比較輕鬆

食完午餐開始SHOPPING，自從上年响心齋橋發現哩間DAISO後

黎到大阪只需行哩間就夠，貨存多，款式又新 

哩日响心齋橋最後衝次買晒要買嘅野後，先返酒店執一執行李先知仲有無條件再買

撲左一個下午，全個人都散晒，係時間返酒店小休一會

經過一小時摶鬥後，全部戰利品好整齊咁揾到居所，而且仲有行李仲未過20KG

有本錢再買啲，擄拐返香港

最後仲有啲時間，離開酒店再度衝次，之前幫唔到友人睇啱傘

咁去左難波0101商場（白伽煎都係第一次行哩個商場）

皇天不負有心人，終於揀到一把合友人心意嘅傘

跟住就可以輕輕鬆鬆逛街，哩次要去美國村嗰邊嘅FLYING TIGER

哩間係雜貨店，價錢實惠，而且仲有啲創意設計

店內入面有好多商品好值得影，不過怕俾人鬧，只能偷影左幾張

絕對要讚係哩把小童傘，只係400日元，必定要買啦！

其實之前响大和睇電視都見到籐木直人＋仲間由紀惠參加綜藝節目介紹過

當時已經存放响後備購物清單中

估到都哩個花塔頂打開後會變成一個后冠，哩把傘真係人見人讚

哩日响心齋橋難得好少聽到廣東話，因為水楔不通，啲大和家庭拉晒啲媽咪出街慶祝

唔少係三代同堂嘅家人

哩晚一早預左响超市作最後一轉入貨，晚餐都响超市解決

但就優待自己可以响百貨公司買一件靚蛋糕

入到百貨公司洋菓子部，又係全店都係母親節氣氛，檔檔都有排大隊嘅人龍

行晒全場都無＂一見鐘情＂嘅心水，最後白伽煎買左哩件

果然因為唔係直覺嘅一見鐘情，哩件只係麻麻地咋

晚餐係魚生＋蔬菜

食飽飽就好好點算埋所有野，明早未天光要起身出機場