歲月催人...型-竹野內豊

 

呢輪路經

尖沙咀"哈巴成"附近時,總係會眼前一亮....wow~俊男呀~

每路過一次,雙眼就發亮一次...再wow~

 就係呢張大宣傳板喇!

 

 

竹野內豐呀~

佢係繼江口洋介之後,我第二個覺得man既男優

不過我唔鐘意佢呢個咁官仔骨骨整齊既打扮,佢係可以粗獷好多

 

"70後"男優之中,同佢同期又差唔多年紀既,我只覺得佢似返個男人

不過竹野內豐既星途運就真係麻麻地喇

响我心目中由佢主演令我印象好深,好有好感既戲真係無乜

佢做d角色唔夠man,好多時仲係做d花弗男,咁真係嘥料

 

除左竹野內豐會令我眼前一亮之外,當然仲有江口洋介啦

佢令我眼前幾亮添呀

話說早輪响日本旅行時,某一日响大阪行到攰無可攰都要死頂下去之時

响車站見到呢本書....wow~又當堂眼前一亮,即刻醒晒

 

係呀,我鐘意江口洋介多d架

其實江口洋介唔算係靚仔樣,但佢就比竹野內豐man好多添...

咁江口洋介係"60後",man過d後輩都係正常既

江口洋介既戲成日都做d保護人既角色,所以就形成佢既形象仲man....我鐘意呀

由佢主演既日劇,有唔少我都相當鐘意,番煲番煲再番煲都唔會dry

其中最無懈可擊既就係 逃亡者 RUN AWAY 

雖然劇情有d抄西片橋段,但都依然令觀眾睇得相當入神

每一集都同佢一齊逃亡,一齊搵兇手

 

宜家响藝能界好似唔再興呢d man男,有時睇見d新一代男優

佢地個形象似要由其他人保護佢地多d....真係有d慘不忍睹既感覺

 

呢個情況唔只响日本係咁,香港都一樣

宜家新一代男藝人之中,仲有邊個個樣係好有大俠feel,好會保護人既呢?

諗黎諗去

得劉德華一個咋,點計佢都唔算係新一代演員啦

唉!宜家潮流都再無大俠呢樣野架喇

 

不過當江口洋介同竹野內豐都仲係未夠30歲時,嗰陣我唔覺得佢地有man feel

嗰時只係覺得佢地有別於一般脂粉味既男優,但距離man呢個字都仲好遠

但隨住時間流逝,咁就越黎越有男人味,越黎越man.....

女仕們依然係認為男人要man,要保護身邊既人,咁先似係男人既

日版+限定版KitCat

 

 

上篇"原裝卡樂 D"引來BLOG友回應"宇治KitCat"

我即刻諗起我今次回程由關西機場返香港時,一度懷疑緊自己係咪做左笨人呢?

話說响關西機場禁區等上機時俾我見到呢幾種味既KitCat

分別係宇治綠茶味,wasabi味同埋櫻花味

一大盒入面有10小排,都只係1300yen,抵買喎 

我曾經一度想買一盒返香港

 

响度猶疑緊之時,望住呢隻粉紅色包裝既櫻花,突然諗緊:宜家係幾多月呀?

9月架喇喎,仲賣緊櫻花產品? 係咪out左好幾個月呀!

理智既思維响呢個時候就出現喇 

睇晒全個包裝都無"期間限定"或者"地區限定"既字句喎

咁呢d貨會唔會一樣响"silly叔婆"呀,"JoeGo"呀,"亞peter"呀....呢d地方買到呢?

如果香港都買到,咁就無謂嘥力抬返香港咯,d日元又唔係平....

結果係無買到既,但如果我响香港見到有得賣

我都想試下wasabi味同櫻花味架 

 

呢次行程去到信洲時,我就買左兩盒"貴"KitCat 

每盒係525yen,入面仲得5小條"迷你孖裝"朱古力夾心條(咁大把)

比起响機場見到既1300yen有10排,呢個真係貴好多......

 

不過都話左凡係"期間限定","地區限定"就係擺明可以吊高黎賣

不過呢個辣粉味既朱古力又令我好有興趣喎....

呢個萍果味就普通d,但啱小朋友喎自己唔食就買黎做手信啦

呢個盒上仲有上高地既靚山景添,正!

 

如果會旅行係去到d少d香港人去既地方,手信店真係值得花時間行下,抬手信返香港送俾人

都想人地收到之後會有驚喜,好唔好食就唔敢包

但至少夠特別唔係一般野既話,人地收到都會有d神秘感+期望

 

自己去旅行都想見識到多d當地既事物,旅行唔只係齋觀光

所以我去任何地方旅行,就係會樂意做一個hea人...hea下hea下咁

其實都係擴闊眼光既方法

呢d係旅遊天書都唔會話到俾讀者聽既事

 

呢包辣味KitCat我就同屋企人一齊食左
唔係話好好味,但就幾特別,d辣味係吞晒成舊朱古力

個口入面剩返少少朱古力味時先會食得出辣味

如果大啖大啖咁食,怕且唔會留意到d辣味添

呢個size咁細盒,入面真係每條都矜貴,食既人先會慢慢嗒真d味

就因為只有小量,所以大家先會珍惜品嚐時既一刻....

 

如果响香港買包普通KitCat,之後洒少少七味辣粉响入面咁食

唔知又扮唔扮到呢隻"信洲限定"既KitCat呢?

(我真係可以做發明家架喇,咩都諗得出既!)

最後の試験

日本語能力試驗一共考左3次,好彩每次都合格

應該唔會再有第4次去考呢個試....

雖然可以考到N2級合格係我讀日文以來既目標

不過時間,環境,思維會令人改變

而且人生中的確有好多夢想一生都唔會實現既(生命中總要存有d遺憾既事)

我諗能力試N2對我黎講就係咁樣

 

今年7月時去考既N3,今日終於去攞返呢張"最後的證書"

成績一早响網頁上公佈左,我既成績比自己預期差

今年起行新制度,N3既合格分數係95分

而仲要每一張試卷都要達到"基準點",即係每張卷都要有19分或以上

咁先為之達到"基準點"

我覺得呢個新制度比舊嗰個仲易合格,因為"基準點"既分數都屬於幾低

 

從來都知自己無考試運氣,就算好用心準備

到左考既時候總係會"發考試瘟",明明係估得啱答案,但都會填錯格仔

呢次考N3又係一樣,所以第一張卷(言語知識)本來係唔只得35分咁少

第二張卷(読解)就更加係瘟神上身添

我之前的確係做左好多閱讀理解練習先去考試

有乜理由60分滿分,我啱啱係31分先得架呢?

第三張卷(聴解),呢張卷就合情合理好多,其實呢張試卷比我預期之中淺好多

好彩我今次唔係走去摶一舖咁考N2

如果以我當日既情況去考N2,就必肥無疑

 

決定唔再考呢d試,唔係因為今次既成績,而係好實際咁諗返當日自己考試時

到底有幾多題真係唔識,而係靠撞彩填答案既呢?

求學係求知識?定還是求分數呢?

就算自己係撞彩咁撞到N2級合格,咁又代表到d乜呢?

呢次去完日本旅行返黎,我更加知道自己唔係為左分數而去學日文

我同d日文人溝通唔到嗰一刻,係聽唔明或者講唔明之時

都唔會有A,B,C,D答案俾我揀,咁就算考試合格又代表到d乜呢?

諗到咁就已經決定唔再考呢d試喇

況且人生有更應該要做既事,呢d"求分數既證書"唔會對我既未來有幫助

不過,我會繼續自修日文,去學d生活化既日文

我已經掃左幾本初級日文書黎記生字

唔好睇少呢d初級書,如果熟用到入面d生字,咁都唔少野架喇

 

別笑!

我是資深日語學生.....但其實我仲要睇返呢d低年級既書

 

 

追伸

話說今日為左攞張證書就走左去西灣河

咁順路就當然要去"亞peter"一遊啦!

本來想搵下有無wasabi味既KitCat,係無既,只有香港普通版

但响"吉豬腦"俾我見到呢兩隻卡樂D薯片,盛惠$14.5

呢個麻油味真係幾唔錯架!

 

 

响"吉豬腦"就買左呢一件mochi食,呢間舖黎左香港咁耐我都係第一次幫襯

因為我總係覺得佢唔會令我有太大驚喜,日式mochi呢樣野....

要知道我d自家製既生招牌雪莓娘係幾"自慢"先得架

 

 

味道都唔差,價錢都算係咁啦

 

我揀左芒果乳酪味

因為响出售前一直係冰住既關係,所以食之前要放室溫15-25分鐘回軟

下面張相一撻撻既係水氣

口感都ok,不至於要柴台,不過我嫌個皮太厚,又煙un左少少

因為係冰左回溫咁食,我覺得有d似雪米糍

個外皮當然係好食過雪米糍啦!

不過講黎講去,都仍然係我自家製既雪莓娘好味!

絕對唔係賣花讚花香,只係講老實說話遮!