2014年10月5日～星期日，青森天氣（暴風雨前夕份外晴）
****************************************************
哩個行程第一站係弘前，而弘前除左蘋果公園之外
仲有日本差唔多各城縣都有嘅 "天守閣"
哩啲"天守閣"個個都所差無幾，以前都參觀過，唔再睇都唔係乜野損失
而哩日有突發嘅行程係更好玩，所以離開蘋果公園後就火速咁返青森
去到JR站，接住下一班去青森嘅列車係快速リゾートしらかみ
全車指定席，即刻用JR PASS去綠色窗口劃位
上車前仲有少少時間响車站嘅商場逛左一陣
商場人流唔多，完全感覺唔到哩日係星期日
大約40分鐘車程就返到青森
終於都叫做可以放慢腳步睇下青森哩個地方
响青森有無數嘅鍾馗，佢係驅魔大神，未踏出車站已經會見到佢
哩日車站海旁非常熱鬧，皆因有賣物會
不過白伽煎最有興趣都係相片中右邊嘅紅色建築物，相當有美感
"ねぶたの家 ワ・ラッセ"係青森文化觀光交流設施中心
响ねぶたの家 ワ・ラッセ入面，鍾馗以唔同做型出現
館入面可以展示嘅係青森嘅代表特色，但白伽煎都係覺得館外比館內更吸引
ねぶたの家 ワ・ラッセ隔離係A-FACTORY，哩度環境相當寫意
10月底就係萬聖節，又係一個做生意嘅賺錢商機
哩啲應晒景嘅食物造型，確實係相當吸引人，就算唔食都要留影
下午嘅A-FACTORY都相當多人，比起弘前車站嘅商場，哩度熱鬧好多
而且哩度嘅商品都幾有特式，唔只係一般手信
哩日由弘前趕返青森，其實係為左食，所以SHOPPING都可以押後
因為去食"遲來的午餐"嘅地方只係營業到下午4時
就係朝早黎八卦過嘅青森魚菜センター
朝早嘅時候就係有一堆等食嘅人堆响案內所買票等開餐
哩個下午茶時間，就無左一堆"輪飯食嘅餓人"
可能一般人都認為食海鮮丼越早食，刺身嘅質量／選擇會有更多
不過後來白伽煎就發現左哩個理論未必一定是對的
响哩度開餐係有一套規舉
（1）買食事劵，10個1080日元；5個540日元
（2）先到紅色旗仔嘅商店以食事劵換飯，普通飯用食劵1枚，大飯係2枚
（3）到藍色旗仔嘅店舖，以食劵換心水美食
咁樣就可以自拼天下間唯一嘅魚生丼配搭
白伽煎買左15個食劵，只係1620日元
因為係一個＂遲來的午飯＂，所以連白飯都即將售謦
買食劵時，個嬸嬸都問清楚啲舖頭係咪仲有白飯，咁先將食劵出售俾白伽煎
睇劵買餸，都有啲店舖係現金交易，不過用食劵好玩啲
哩件大大大帶子真係相當吸引，又相當抵食咁喎
最後白伽煎嘅口味就係咁樣：
超大甜蝦／帶子／拖羅片／拖羅茸／しらす（小魚仔）／明太子／海膽
一次過滿足左相當多口味呀！
以上咁多選擇，白伽煎最愛係超大甜蝦，真係又爽又甜，其次係明太子
拖羅同海膽食得太多，相比之下無乜新意
而又大又抵食嘅大大大帶子，味道比較淡，無其他咁突出，咁就比下去了
しらす（小魚仔）如果係時令當造，可以活生生咁食，宜家咁樣就又係比下去了
哩隻超甜大蝦，只係一食已經令白伽煎着迷了
甜蝦食得多，不過都係細隻嗰啲，哩啲咁大隻嘅係相當爽口，超好味！
白伽煎立誓離開青森之前要再黎一次，鎖定目標係超甜大蝦
市場入面有幾個位置擺左枱櫈俾食客慢慢歎
仲有自助茶／水任飲
响度食飯時，對面有個後生女仔又係一個人，佢部相機同白伽煎嘅係相同牌子
佢食完飯之後個口得閒，咁就撩白伽煎講野
佢問：你又係一個人旅行？
白伽煎禮貌地回答，而且順表明左自己係外地人
個後生女仔可能怕大家語言溝通有問題，所以都無再講野
白伽煎哩次旅行無咩興趣同路途中嘅人講野
可能係自知自己日語大退步，又可能根本係無MOOD
食完野要自助咁執拾，最好係可以看圖黎擺放
日本嘅垃圾要分類棄置，咁耐以來都唔係好知道邊啲係可燃垃圾，邊啲係不可燃垃圾
响日本掉垃圾對外地人黎講係一門學問
响青森會見到唔少A字造型物體（上／下圖都有），唔知係刻意，還是巧合
食飽飽之後就四圍逛下，去返之前一晚摸黑去嘅超市
哩邊係住宅區，相當清靜，街燈都唔密
所以前一晚只係９點幾一個人向哩邊行，其實都有啲驚
哩邊至少有兩間超市，規模都相當大
紅葉已經靜悄悄咁黎到青森
還記得當年去京都睇紅葉，凍到咩咁，着住羽絨都仲係凍
都係哩啲早來的紅葉比較適合相當怕凍嘅白伽煎，其實紅葉真係咁靚咩？
去到車站見到即將有架快速電車，下一架係普通電車
白伽煎仲以為自己執到寶，誓要上到哩班快速電車
哩晚係要移動去八戶，準備明白行程
大行李寄响朝早已經寄存在酒店，只係會帶個手提行李上路
不過哩日買左啲手信想放返入個大行李入面
誰知酒店個姐姐話：唔得
？？？？？吓，自己嘅行李都唔准掂？？？？？搞咩呀？？？？
可能又係白伽煎啲日語大退步，而哩個姐姐都唔夠醒，所以大家有誤會卦
最後當然都係批准白伽煎開自己嘅大行李，不過哩個姐姐嘅面口態度就唔多好
其實白伽煎有JR PASS，根本唔需要坐哩哩架快速電車
由青森去八戶係有新幹線，19:13出發，20:11到着，車程大約６０分鐘
但傻左嘅白伽煎上左哩班快速車，結果20:00先到八戶，仲要坐左８０分鐘嘅電車
真係蠢左添！
本当に馬鹿だったよ!
呆坐左８０分鐘嘅電車，終於黎到八戶駅
八戶駅比預期中又新又靚，可能因為始終都係新幹線連接嘅車站，不能太失禮
到埗時只係晚上８點幾，但真係人影都唔多
無夜生活嘅城市，咁都只可以早啲返酒店休息
白伽煎最關心嘅當然就係翌日嘅天氣，因為翌日嘅活動係哩個行程嘅主角
奧入瀨溪流
天氣預報話18號颱風預計會响翌日中午至晚上先打到去東北，到時會有大雨甚至洪水
既然咁講，白伽煎唯有繼續希望真係會咁樣，因為翌日安排行山都只係上午時間
如果預報無錯，咁對去奧入瀨溪流都唔會有好大影響
是日食左個遲來的午餐，晚餐就可以係輕食
久別左４年嘅巨峰提子，能夠再重逢實在有啲激動
由２０１０年開始就無响秋天去過日本，所以難怪有單思病
至於黎到日本不可錯過嘅零食，上圖全部都唔特別
期間限定版嘅Jagabee完全係無水準可言添
芝士味＆明太子都係味道濃嘅食物，但哩個就食唔到有佢地兩款味道
即使係另一隻牌子嘅明太子味薯條，一樣係無明太子味
失敗！
