"橋"唔怕屎,只要係拍得好,觀眾就會受,呢套"最後之戀"又係要讚
1997年既日劇,關東地區既平均收視係16.85
雖然收視比唔上之後下一季既"戀愛世紀"
(梗係啦,當時有"木村+松隆子"效應嘛!)
不過如果俾我揀,我會鐘意"最後之戀"多過"戀愛世紀"
只係中居正廣既演技都好過木村啦! (如有得罪,請諒!)
中居正廣係另一個我欣賞既演員
佢真係識得做戲,而且每套戲都見到佢有進步
如果講演技,佢响2004年拍既"砂之器"
真係更加好戲,好戲到唔駛向對白都做到戲,呢d真係叫"掂"
SMAP之中,以中居正廣既演技係最了得,不愧係隊長
言歸正傳~
呢套戲條橋真係舊得緊要,內容係講"亞秋"(常盤貴子飾)同細佬相依為命
細佬自細有心臟問題,而為左做手術既可觀費用
亞秋去做應召女郎,結果响細佬住既醫院又邂逅到醫科學生"夏目透"
呢條屎橋當然係講到佢地兩個人既身份距離
仲有係"夏目"點樣克服其他人既眼光,有勇氣咁去愛"亞秋"
而"亞秋"都要有勇氣咁面對自己既過去
如果"亞秋"唔係因為做左應召女郎,都可能唔會同夏目相戀
當時"夏目"有意追求既係同班同學-美紗子
但因為"亞秋"為細佬籌醫藥費既事,令"夏目"對"亞秋"多了一份關心
就係咁樣倆個人就漸漸地互相吸引,"夏目"仲立心要守護"亞秋"
呢套戲既特色在於平凡得好似真實一樣
男主角"夏目"唔係靚仔款,又唔係富家子弟
只係生於小康之家既一個普通醫科學生
平日間中都要搵兼職黎搵生活費,一樣會吸煙,賭馬
同女仔第一次既約會竟然係會去廉價居酒屋...
女主角"亞秋"都唔係d咩天之驕女,千金小姐,姿色確實有d...
不過從少就俾父母遺棄,响孤兒院長大,同細佬一齊相依為命
响彈珠店返工,踏實地靠自己努力工作而生活
男女主角既角色都平實得就好似觀眾身邊既人咁
要一個男人唔介意人地既眼光,接受一個曾經賣淫既女朋友
講就好容易,但真係要面對時就係另一回事,更何況劇中兩個人都係得24歲
"夏目"原先都以為自己唔會介意,立心要保護"亞秋",結婚既念頭都因此而起
不過可能愛情要受過考驗先會變得堅定
當"亞秋"做過應召女郎既事被揭發而傳出去之後
"亞秋"先明白到原來"夏目"既心底深處對於佢賣淫既事,始終係有一根刺
雖然兩個人仲係相愛
不過中間既鴻溝實在太大
當愛既力量都敵唔過世俗既眼光時,恐懼佔據思想時,感情只會無疾而終
其實"亞秋"都自卑自己既身份都配唔上"未來既準醫生"
呢d全愛情橋段既戲,點會無第三者存在呢?
"夏目"同"亞秋"身邊都有單戀自己既人
响佢地兩個人分開左之後,就正好係第三者介入既好時機
不過日劇比較少寫呢d複雜既多角戀
所以男女主角都無因為感情落空而接受新戀情
好多日劇對於真實人性既描寫都比較偏向將人性寫得高尚
例如:想橫刀奪愛既第三者,响日劇之中都會被寫得比較有風度
甚至有d會寫到佢地因為愛而甘願"讓愛","多完美的人啊!"
現實生活中真係有幾多人願意"讓愛"?
呢套日劇當中,單戀"夏目"既"美紗子",雖然不至於係可以心甘情願"讓愛"
不過佢既性格都係溫婉而心地好既女仔
不過故事既結局係"夏目"同"亞秋"响兜了大圈之後,兩人都再續情緣
感情經過考驗之後,先會愛得更堅定
靚女,我"英偉哥"黎喇!你咪走呀~
