2014年10月10日～星期五，東京天氣: 晴
黎到行程尾二哩日，又有颱風打緊黎
哩個比上一個18號颱風還要強勁，不過佢打到黎之時
白伽煎都已經離開左日本，返到香港喇
估唔到10月仲會咁頻密地遇上颱風
只係一個8日嘅行程，差唔多遇上兩個颱風
哩日行程去邊呢？。。。。先要坐小田急線
响向ヶ丘遊園駅落車
出左車站再行大約10分鐘，目的地就在眼前
就係藤子Ｆ不二雄博物館
有付費接駁巴士去到，但要由登戶駅上車
藤子Ｆ不二雄博物館係需要預約，每場限制入場人數
白伽煎响網上訂左位，然後到埗時响便利店確認訂票
藤子F不二雄網頁: http://fujiko-museum.com/pc.php
响館內要用預訂左嘅"引換劵"換張"入館劵"
入館劵都有不同款式
場館內有耳機導嚮服務，中文版只有普通話版本
而展覽場地完全不准拍攝
能夠相當全面响度重温叮噹嘅漫畫
（唔好意思，白伽煎係生於叮噹時代之下，而唔係多啦Ａ夢）
再次勾起白伽煎童年的回憶
的確，白伽煎兒時最愛係叮噹，後來移情別戀愛上龍猫
宜家白伽煎決定兩個都愛，無分大細
出左展覽館，就一個可以拍攝嘅地方就係哩個技安（胖虎）
叮噹圖書室，入面有叮噹嘅藏書
仲可以玩自拍照，白伽煎從無玩過哩個玩意
見無人排隊咪胆粗粗去玩，仲搞錯左揀左日語版本（有英文版本）
雞手鴨腳之下都算整到張靚相
有以下咁多背景可以揀
當然係揀 "期間限定"嘅萬聖節版本啦！
頂樓有餐廳，人多到不得了，小朋友又多到不得了
白伽煎唔會有興趣為左食有叮噹模樣嘅食物而去排長龍
所以只係响空地影相
Ｑ太郎＋Ｏ次郎。。。。相當可愛
叮鈴，一個聰明善良又乖巧嘅機械貓
哩個係燒餅雪糕，不過價錢太貴，又唔見得好有特式
不如用哩啲錢買個叮噹餅模好過囉！
哩兩個係誰？白伽煎真係唔識佢地喎！
最後一站當然係手信店
白伽煎搜羅左一堆叮噹用品，好讓白伽煎可以每日記住叮噹
其實買左都未必捨得用
白伽煎以前參觀過鬼太郎作者：水木茂先生响家鄉鳥取縣嘅展覽館
同是相近年代嘅漫晝家，但係兩個作者嘅事業路就好唔相同
水木茂先生嘅讀者對象係大人，藤子不二雄嘅讀者對象係小朋友
前者的事業＋人生路都太多波折，所以作品嘅表達上有點複雜
後者就單純好多
兩個漫畫家嘅展覽館都值得參觀
離開藤子Ｆ不二雄博物館之後，就係趕住去SHOPPING
當然要買PASS先可以去掃貨啦!
全個行程得哩半日+明天半日可以SHOPPING
為左SHOPPING都要將午飯時間押後，最後都先要殺左啲戰利品
到埗當日响東京駅轉新幹線去青森
當日响東京駅就去左"哈落D"專門店朝聖
咁返到東京當然要掃啲專門店先買到嘅手信啦!
結果响東京駅幫友人買左一堆面包超人用品，等佢做24孝的媽媽
掃左兩大袋貨，當然要先返酒店
响哩個時候就會慶幸好彩所住嘅酒店近車站，行２分鐘就到
順便响附近百貨公司＋超市買外賣返酒店食
全個行程唯一一件蛋糕，超級水準
其實哩個遲來的午餐都相當豐富
當然啦，當埋晚餐架喇，晚上要再衝刺再買過，唔得閒坐低揾飯食
其實以往响東京，白伽煎對揾美食嘅興趣係唔及响大阪
响大阪真係好易揾到價廉又美味嘅食店
响東京都好似比較難，所以都係求求其其又一餐就算喇！
