輕輕緊握你的手 - 溫情式催淚

菅野美穗係其中一個我好欣賞佢演技既演員

佢d內心戲真係演得入木三分,聽聞佢"入戲"同"出戲"都可以好快

可能就係註定要食呢行飯

 

"輕輕緊握你的手"係我第一次睇菅野美穗做戲,呢套戲絕對係溫情式催淚

唔鐘意睇呢d以家庭為題材既人,可能會嫌佢"婆媽"

(咁事實家庭就離不開婆婆,媽媽,亞仔,亞女,老公,老婆,外父,外母,老爺....)

但相反地如果唔反感呢d題材既人,一定會睇到流眼淚

每一集都有感動位,令人忍唔住要流眼淚

 

雖然都可以話呢d以家庭為題材既戲係婆媽

不過我相信人既最終原動力係黎自家庭

父母係每個人一生之中第一位老師,所以唔可以忽視家庭既重要性

 

响日本,太太既工作係照顧屋企人,丈夫既工作就係响外邊打拼

呢一點同香港大部份既太太係唔一樣

唔知係咪呢個原因,所以日本人比較重視家人關係

至少好多日劇都係以此為題材

反觀香港人呢....仔女跟菲姨/印姨/電腦相處既時間係仲多

父母仔女交談既話題,以讀書,學業為多,仔女既人格發展就相對變得忽略左

 

所以睇到呢d以家庭關係為題材既戲,真係令人眼前一亮

家庭係咪幸福,並唔係因為仔女既學業成績

而仔女係咪會成為有勇氣面對生活順逆境既人

都唔係因為佢地係咪資優,入讀到邊一間學校,父母係咪身居要職...等

其實只要有愛

 就會感到幸福,事實就係咁簡單直接

呢d就係呢套戲要表現既主旨

 

 

呢套日劇既原著係漫畫,電視台由1997年開始,每年拍一集,每一集都相當感人

都係口碑好,先會有續集,續續集,再續集...

 

劇中美榮子(菅野美穗飾)係一個天生聽障既女仔,個性細膩但內心堅強

响日本法例規定大企業必需要聘用呢d有殘障既人

初出茅蘆既美榮子就响呢間公司認識博文(武田真治飾)

絕世好男人

 

一個健全既人跟一個聽障既人相戀,甚至要結婚,需要克服既野都唔少

既要除去自己既心理顧慮,仲要顧及兩方家長既感受

 

呢套戲入面圍繞住3個家庭,3對夫婦

(1) 美榮子+博文 (2) 美榮子既父母 (3)博文既父母

3對夫婦都為建立幸福家庭而努力

尤其係美榮子父母,我好鐘意美榮子既爸爸

作為一個丈夫,一個爸爸,佢絕對唔比博文遜色

結左婚既男人,就係要响外面拼搏,揹起一頭家既責任

而一般黎講,女兒多數都係跟媽媽接近d

不過戲入面美榮子爸爸既戲份比媽媽多

 

美榮子係天生聽障,細個時都遇過俾人"蝦"既事

父母都總係想努力保護仔女為佢地設想,只要打聽到邊度有好學校

爸爸都願意為美榮子辭去工作搬家,目的只係想為女兒安排最好既

以前既年代,日本人既工作係終身制,只要無驚無險,無咩犯錯

咁就係差唔多保証會由普通員工慢慢升職,年資越高,職位都相對越高

美榮子既爸爸都甘願放棄男人既事業心,响佢心目中,女兒比自己既事業更重要

只係呢一點都夠體貼啦!

 

美榮子要結婚,爸爸對於從未見過面既未來女婿總有點不安感

可能呢個就係作為爸爸既心情

自己既女兒將會俾另一個男人帶走,而呢個男人又係咪會帶幸福俾自己女兒呢?

 

劇中博文同美榮子既爸爸都係非常溫柔體貼既男人

可能女觀眾會一邊睇,一邊响度諗:"呢d男人真係好到加零一,去邊度會搵到呀?"

 

美榮子既媽媽反而比較嚴厲,即使美榮子都已經有自己既家庭

如果佢做左d任性既事,佢媽媽都會"兜巴星"佢,不過呢d都係出於愛

雖然美榮子係聽障人仕,但佢依然有勇氣跟一個正常男人結婚

努力克服自己既殘障,跟博文建立一個幸福滿溢既家庭

能夠有呢一份自信心,相信都係黎自從少父母既好好教導

 

博文既媽媽又係一個溫柔既母親

最初反對佢地既婚事,不過女人始終都係心軟既

仔大仔世界,咁都接受左美榮子,而且都真心愛鍚呢個心抱

咁好既婆媳關係,又去邊度搵呀?

 

其實美榮子真係相當幸福,有鍚自己既父母,有融洽親切既婆媳關係

當然仲有個好老公,唔少得仲有一個乖乖女

佢個女又係天下絕世乖乖女

咁懂事既女,識得去體諒媽媽,仲話佢對媽媽既愛,係絕對唔會輸比爸爸既...

咁乖既女,又去邊度搵呀?

 

殘障既人並唔係只可以擔當被愛,被保護既角色

劇中有一段係博文既上司因為美榮子係殘障既人

所以從來都唔會要求博文加班,同樣地都因為呢個原因

唔會委任一d重要既工作俾博文

博文因為咁樣而變得好消沉,男人總想可以創一番事業既

博文甚至認為美榮子都唔會明白佢既心情

不過夫婦既相處,兩個人都應該信任對方,尊重對方

結果都係美榮子既一番說話,一言驚醒執迷緊既博文

可以有一個幸福既屋企,就會有無窮能量去面對出面既風雨!

 

劇中有好多場戲既對話係發人深省既

其中有一幕係講博文希望自己一生都可以守護住美榮子同女兒

但佢又擔憂萬一有咩意外發生,令到佢離開呢個世界

咁美榮子同女兒又點算呢?

結果美榮子既爸爸又講左一d好有意思既說話~

"...想到這個世界上還有人需要自己

一想到有人需要自己的保護,是否也是一種幸福呢?....我確是這樣想的.

如果家人出了甚麼事,怎麼辦?如果自己出了甚麼事,怎麼辦?

會考慮這些問題的人,應該也算是幸福的人生...."

 

幸福

係要一家人齊心咁面對生活上既晴天,陰天,雨天

 幸福並非必然 

 

 

第一集(1)  第二集(2)  第一集(3)  第一集(4)

第二集(1)  第二集(2)  第二集(3)  第二集(4)

神戶六甲山牧場(動物篇)

 

 

呢輪只係識食,唔識玩,都係時候又懷緬一下d旅行回憶囉!

上次講左响神戶食牛,今次都仲係離不開神戶

都話左關西之中,神戶係最無睇頭,唔去都唔太可惜

但偏偏佢又令到我寫完一篇又一篇都仲係佢喎!

 

飄零燕係橫跨左唔同年代人既兒時卡通片回憶

海迪呢套卡通片咁健康,意識又咁單純

宜家都好難搵到呢d咁天真既戲

當年我都鐘意睇海迪架,好鐘意佢隻"聖班納犬"

好鐘意海迪可以通山跑,身邊有好多羊...

响神戶都會搵到類似海迪所生活既地方,唔洗去到阿爾卑司山咁遠

呢度就係神戶既六甲山牧場

 

平日要去六甲山牧場,話好難去又唔係,但就要轉幾次車先去到

如果係假期就有巴士响神戶車站直達

不過交通方便左既代價就係  巴士只在日曜日/祝日(即係星期日/假期)行駛

呢d"家庭日"六甲山牧場一定好多人,咁都係閒日自己轉車上去好d!

我寧願轉車轉到頭暈都唔寧願迫人迫到頭暈

 

由大阪坐JR去到神戶(唔記得邊個站落車)

行出車站就轉巴士,跟住就會黎到呢個纜車站

呢個係纜車"山下站"

 

神戶山有兩條纜車路線(唔明為咩要有兩條咁多)

一條係六甲ケーブルコース,而另一條係摩耶ビューラインコース

六甲ケーブルコース呢條線係來回1000 yen

而摩耶ビューラインコース就分開兩段,一段係纜車,另一段係吊車

所以價錢就要貴d喇,呢個來回係1500yen

我黎呢度既目的係去牧場,唔係坐吊車喎,咁當然係做個"精明消費者"啦!

 

 

下面呢個係纜車"山上站"

上到山就要等巴士,都幾疏車架,有時間都可以响呢度影下相既

如果係去有馬溫泉,都可以响呢度等另一架巴士

所以如果想响呢區過夜,可以去埋有馬溫泉都得架

反正纜車既來回車票係3日有效

 

神戶夜景有"一千萬美元夜景"既稱號

下面既指示牌真係咁寫住架 

 

坦白講,呢個夜景睇唔睇都罷囉,佢點同我地維港靚景比呀?

真係"不知外有天"呀!

 

黃昏之前就係咁樣

俾d想像力都會估到天黑時,佢到底有幾"靚"!

 

(下面呢兩張係網上圖片)

 

咩真係值1000萬美金咩

話係1000萬日元都仲還可以!

 

要去牧場就係坐呢架可愛既巴士

佢其實係連接左兩邊既纜車站,所以無論坐邊架纜車,都一定係响中途站落車既

 

去六甲山呢一日之前,全日都落雨,夜晚仲落得好大添

可能係咁,所以呢一朝早,六甲山牧場就無咩人氣喇!

咁咪仲好,無人爭,又唔怕迫人

好彩呢一日都無再落雨,後來仲開始出太陽添!

由大阪黎呢度,轉左幾次車先黎到,終於都到大門口喇!

 

一入大門就已經見到海迪既海報

佢係六甲山牧場既代言人呀!

 

當然仲有佢既老友記啦!咪係彼德同克拉尼囉!

 

連克拉妮架輪椅都响呢度睇到呀!

 

入大門之後第一隻見到既動物就係佢

山羊太太,好可愛呀!

今日輪到佢當值,呢份絕對係優差,見到佢咁乖,真係點捨得唔餵佢呢!

佢就食得開心,我都餵得好開心架!

山羊係全個牧場中,我覺得佢係最溫馴善良既動物呀!

 

除左山羊,仲有日本既木曾馬,又係好乖,任人摸

 

木曾馬原藉响長野縣

佢地係Q版身型,唔知係咪因為以前d日本人身材矮細

騎唔到高大既馬,所以日本先會自行繁殖呢d馬呢?

不過係咪話佢地黎自埃塞俄比亞會似d呀?

相片入面有兩隻,瘦到得番棚骨咁樣喎?

 

呢度有隻bb小乳牛,睇佢都牛高馬大咁樣,原來出左世得半個月

仲未戒奶,所以訪客可以玩"扮奶媽"喇!

 

是日其中一個"奶媽仔"就係呢個日本小朋友

(佢個髮型都相當型架~)

仲有呢一隻爛瞓肥豬都相當可愛,瞓到笑晒咁,仲扯晒"鼻寒"添

呢度真係好食好住喇!

如果响香港/祖國見到呢d豬,都肯定會令人厭棄,掩住鼻想走開

不過响呢度做呢隻肥豬,又確實係好歎啵!

原來呢隻肥豬都好紅架,上網搜尋六甲山既相片/影片

就一定見到佢,不過人人影佢都係瞓緊覺既樣

佢都真係好歎咁喎!

佢d"鼻寒"聲真係唔少野架! 可想而知佢當時既熟睡程度