劇名:頑固老爹 (オヤジぃ)
演員: 田村正和,黑木瞳,廣末涼子,水野美紀,岡田准一
雖然我覺得近年香港三色台d電視劇既質素都每況越下
但其實日本都係差唔多,有時一季之中搵口碑最好既黎睇
結果有d真係不外如是,d舊戲反而仲有睇頭
一講起田村正和,就一定諗起古畑任三郎
除此之外,佢仲經常做d"父親大人"既角色,仲係要做d頑固既老頭子
如果自己屋企有個頑固老爹,咁真係相當難頂
但係旁觀者咁睇另一個家庭有個頑固老爹,咁就係相當搞笑
雖然話係搞笑,但係一如以往日劇d家庭戲,好多時都賣"溫情",呢套都一樣
有時得閒想睇返d有水準既日劇既話,我好多時都會揀呢套黎睇
呢套戲我諗我重覆又重覆咁睇晒全套,至少都會有5次
因為實在太溫情喇,睇到有d位仲洒埋淚添!
老爹响仔女眼中係個又囉嗦又頑固既老頭
對時下年輕人輕浮既行事風格完全不接受
例如响街上見到年輕人d不當行為,佢會走去同人地說教
响餐廳見到隔離枱既細路仔扭計,又吵又鬧,佢又會走去教訓個細路仔...
就係呢個古怪脾氣令佢經常响外面俾人認為撩交打
佢又訂下好多家規:例如早餐一定要全家人一齊食
屋企有門禁,晚上10點以前一定要回家...
老爹雖然都表現頑固,疼鍚仔女又唔肯認
但心底裡又成日想知道仔女既事
佢就成日扮咁巧合咁出現响仔女身邊,都相當鬼祟架!(搞笑!)
以下劇照就係小百合去相睇,佢又鬼祟祟咁出現!
故事內容
神崎完一(田村正和）55歲,開業內科醫生,妻子美矢子(黑木瞳)
3個孩子共組一個5口之家,為左家庭努力工作既完一,非常重視家庭紀律
長女小百合(水野美紀)係一個自細都乖巧既長女,响小學任職老師
到左適婚年齡但一直無心儀既男友
其實小百合係愛上左一個有太太既男人,仲搞到"有左"
又決定要將bb生下來,自己一個人撫養
次女亞鈴(廣末涼子)係個對未來前途毫無打算既新人類
3兄弟姐妹中,唯有佢可以"治"到老爹,其實佢個性最似老爹
某日,突然話要閃電結婚,對方係東大畢業,响大公司任職既國東博(及川光博)
結婚當日,老爹直覺認為事情有異,結果行禮之時就硬搶女兒離開禮堂
最後因為男方係同性戀,所以婚事告吹,亞鈴繼續糊里糊塗既人生
眼見家姐同細佬都搵到人生目標
最後佢立志要代替細佬考入醫科,承繼老爹既診所
細佬亞正(岡田准一)其實係家中既長男,同亞鈴相差一年
自少抱住老爹既心願想繼承診所,但又唔係讀書既材料
為左咁跟老爹鬧翻,出來自立搵工作,搵到人生既目標,決定做個攝影師
唔止3個仔女令老爹頭痛,連太太都秘密再會舊情人
老婆既情感徘徊响矛盾中....
屋企各人既事都突然令老爹都不知所措
雖然老爹係頑固,但其實心底裡係極愛錫屋企人既
口就話唔會原諒小百合未婚產子,亞鈴時時悠手好閒,亞正唔肯承繼診所
但最後都仲係一個慈父咁去關心仔女
被選出黎既片段,令我最感動既係老爹低晒頭咁求小百合既男朋友離開小百合....
"如果你想繼續同我個女一齊,咁請你同你太太分開
如果做唔到既話,咁請你離開我個女
你太太係你既家人,就好似我對我既家人負責任一樣,請你都對你既家人負責任
如果仲同你响一齊,我個女一定唔會再愛上其他人
佢就係一個咁樣既人,作為一個父親,咁係好痛苦既事
如果你真心愛佢既話,可唔可以請你唔好再見佢?
拜托你...(低頭請求中)"
仲有因為未婚懷孕,學校被家長施壓,小百合迫不得已要辭去老師既工作
因為係即時離職,無法向學生說再見,小百合感到相當難受,
結果一家人去學校支持小百合....
另外,亞正本來決定以做攝影師為目標,
但找工作時多翻被拒門外之後,佢自己都想放棄
又係老爹一番說話鬧醒左亞正~
"亞正,你要做攝影師,就只係呢個樣?
你係因為要追求自己想做既事,而唔繼承我既診所
栽培仔女繼承自己既診所係我既夢想
係你叫我放棄我既夢想,但係你宜家咁容易就退縮
你咁樣做我係絕對唔會原諒你
如果係男人既話,想做既事就唔好輕易放棄,堅持到最後,等我可以另眼相看..."
真心愛鍚仔女,先會講得出呢d說話,有個咁既頑固老爹,其實都唔錯唉!
唔怕佢難食,最怕無好名
)
嘥氣!
