謝絕左追港產電視劇已經超過10年,實在好怕睇無聊多角戀
韓劇.....唔係我杯茶
韓劇唔單只有多角戀,劇情仲婆婆媽媽得緊要
唯有日劇令我追隨多年,哩個都係令白加煎去學日文嘅原動力
不過即使係粉絲,但都唔係盲目嘅人,嗰d無意義嘅日劇
都一樣會謝絕
年輕人憧憬愛情,俊男美女嘅愛情片就最令哩d人陶醉
當人年歲越高,越明白親情可貴
所以哩d以家庭為題材嘅都變為擇戲嘅首選
(胡鬧家庭劇除外)
[愛與寬容] vs [14歲的媽媽]
[愛與寬容]
[14歲的媽媽]
日劇之中以家庭為題材嘅都相當多,反而香港就好少哩d題材
一直到宜家都好懷疑日本人嘅家人關係係咪比香港家庭融洽
首先係日劇令人有哩個觀感
繼而係日本人經常都會同家人响週末作國內旅行
反觀香港家庭,父母總係較關心子女嘅學業
一家人出外旅行可能都唔會係經常嘅事
甚至唔少仔女係交由外傭姐姐黎照顧,父母外出拼摶
如果日本人嘅家庭觀念真係好似日劇之中嘅咁樣,咁又真係相當溫情
睇左兩集[愛與寬容]就令我記起[14歲的媽媽],兩部戲都係講影響家庭嘅事~
[愛與寬容]: 10歲兒子成為殺人兇手
[14歲的媽媽]: 14歲女兒懷孕
日本嘅家庭係以媽媽為中心,教養仔女係媽媽嘅責任
所以兩套戲都一樣以媽媽同仔女嘅關係作主線
兩套戲都一樣,令觀眾有感動嘅地方
[愛與寬容]
兩個唔相識嘅普通家庭,10歲嘅野口智也殺死只有7歲嘅小澤清貴
突然間兩個家庭出現左巨變,當中包括每個家人嘅自我反省
兇手家庭
(左)野口紗月-母 (中)野口智也-子 (右)野口和彥-父
哩套戲入面,飾演媽媽嘅稻森泉不得不讚
終於都表現佢唔再係花瓶,而係可以賣實力嘅演員
智也係獨生子,媽媽婚前係一個職場女性,爸爸係一個以事業為重嘅男人
同好多日本大男人一樣,婚後以事業為重
自以為合理地疏忽家人,家庭嘅事就全權交俾妻子
哩個爸爸响最初嘅行為係令人看得相當氣憤
媽媽以為自己已經係全心照顧兒子
直到兒子殺手之後,响家事法庭調查員嘅引導之下先漸漸明白與兒子嘅鴻溝
响日本社會上,對於哩d犯案殺人嘅人係一生俾社會所排擠
唔單只係犯人,連同犯人嘅家人都一樣會被其他人歧視
當家庭中發生左哩d事
咁全家人都需要用勇氣去面對哩d可能係終生被歧視嘅目光
受害者家庭
(左)小澤美帆子-長女 (中)小澤秀昭-父 (右)小澤聖子-母
哩個家庭同犯兇手家庭唔相同
本來係一家4口嘅平凡家庭
爸爸都係上班族,但比起兇手嘅爸爸,哩個爸爸比較注重家人關係
細仔出世之後,搶去左全家人嘅視線
所以身為大女兒嘅姐姐一直都唔太鐘意細佬
慢慢變得任性反叛
而細仔就有d過度被溺愛嘅囂張表現
父母就以為係女兒踏入反叛期,難以管教,其實哩d都係家人之間嘅誤解
兩個本來完全唔相識嘅家庭
就係响兩個兒子一次偶然相遇之後而發生殺人事件
兩個家庭嘅人除左要用愛去互相體諒/了解自己家人之外
仲用愛去寬恕左兇手嘅家庭或者期望得到諒解
能夠做到哩一點,一d都唔容易
受害人嘅媽媽對於兒子嘅死係相當傷心
但最後依然可以抽身以兇手媽媽嘅心情去諒解對方
哩d係發自光輝嘅人性
劇中除左兩個家庭成員係主要角色之外
劇中嘅家事法庭調查員(富田葉子)更加係不可多得嘅角色
劇中佢有一個跟兇手年紀差唔多嘅仔,丈夫已殁
因為能夠理解哩個少年兇手同兇手媽媽嘅心情
所以富田葉子成為哩套戲之中舉足輕重嘅角色
田中美佐子同樣有主演[14歲的媽媽],同樣係不可多得嘅角色
媽媽知道只有14歲嘅女兒懷孕
由反對直到支持鼓勵,哩個媽媽都絕對不易為
只有14歲嘅女兒未婚懷孕,一家人同樣需要面對其他人嘅異常眼光
睇黎當女人嘅小宇宙要發出勇氣同毅力之時
哩份表現可以係不能計算嘅咁多
[愛如寬容]比[14歲的媽媽]沉重,前者因為10歲兒子做左殺人兇手
家人要响絕望中找出勇氣
後者係14歲嘅初中生突如其來多了一個小生命
家人要响迷茫中找出勇氣
人如果能夠擁有充滿愛,體諒與支持嘅家
家中每個成員都會有無限嘅勇氣去面對人生嘅挑戰
反省