3月28日 (星期三) 晴
, 溫度:5度-19度
離開廣島和平資料記念館,其實已經到左食"遲來的午餐"嘅時間
廣島除左牡蠣出名之外,廣島燒都係相當有名
哩日白加煎準備好要去一嚐地道廣島燒,响食評網站搵到哩間 HOPE
位置响廣島站對面
6樓全層都係食廣島燒
哩一次係烏龍嘅午餐,本來想食廣島燒
但最後係黎左以下哩個おかず點睇哩個都只係一客副食配菜啦....哩個係牡蠣鐵板燒小食,盛惠580YEN
白加煎每次籌備日本之旅,都會响食評網站搵食
順便會睇埋MENU知道廣島出名係牡蠣,咁就想試牡蠣廣島燒
懶醒又懶有準備咁一坐低就注文,都唔睇下店內MENU
結果原來將牡蠣鐵板燒當為牡蠣廣島燒
食左一個小食,都唔會再另叫一個廣島燒,咁唯有出去再食過其他野補數
下圖為網絡圖片,無緣食廣島燒,都睇下個樣啦!
不過大概都估到係乜味道,想食只為入鄉隨俗,食唔到都不致於要摞地
求其食完一個"遲來的午餐",之後响百貨公司逛左一陣
高速巴士出發嘅時間係16:40,白加煎仲諗住有好多時間
午餐食唔飽,去左mister donut買外賣
順便去埋超市買坐巴士時嘅食物有一段時間無出場嘅(半)黑仔事件簿再度登場:
返酒店攞行李
未認為係急住去車站嘅白加煎仲响酒店食埋3件donut
先出發去高速巴士站諗住16:15分出發去車站,都仲趕得切有餘
之但係白加煎唔記得左推埋行李,由酒店行出電車站大約都要6分鐘
去到電車站又送車尾
突然間先記得廣島d電車大約要5分鐘先有下一班
16:15+6分鐘+5分鐘=16:26先上電車
(以上哩d時間係睇返d相片拍攝時間咁大約計算出黎)
上左車白加煎知驚喇
嚇到企响司機位隔離,猛問住個司機:つぎですか?(係咪下個站?)
心急緊時仲覺得個交通燈位總係紅燈要停車
只係短短4個車站,但估計都坐左6-7分鐘,白加煎就急到標左一額汗
心入面祈禱落車後已經唔理有無儀態,响街上推住行李狂奔
見到有途人仲要一邊跑一邊講:すみません....すみません....
(另一角度嘅相片)
跑到入口,上行人電梯到二階仲要跑一段路
當時白加煎覺得個行李好似反方向鬥力咁拉唔郁,自己對腳又好似俾d野扯住
跑極都好似沿地踏步咁.........好明顯已經係無晒力
跑到去上車區,响9號停車處上車,就係眼前最近嗰個車站
好彩終於都趕到,白加煎拿拿林同司機報到
然後放好行李就上車2分鐘後,終於開車告別廣島
即係白加煎用左5-6分鐘無晒儀態咁狂奔
哩次係坐高速巴士經驗中最驚嚇嘅一次,都希望係最後一次
以後都唔敢咁大安旨意,嚇自己一餐
去到中途休息站仲未天黑,白加煎就係趕上哩架高速巴士去米子
之前响廣島超市買定嘅"脫印"布丁,响跋足狂奔後都粉身碎骨咁散晒
散過豆腐花
下面哩個係期間限定版嘅香蕉味布丁
香蕉味啱啱好,太濃反而唔係人人都接受到,不過香蕉味都唔係人人啱
下面哩個係creamy布丁,比一般布丁更creamy,所以响狂奔後更加重傷
大約4小時車程就由廣島去到米子
到埗時間大約係20:30
哩次白加煎發現只要嗰個地區無新幹線聯繫
咁全個地區都會比較少人
白加煎去酒店check-in放低行李先出外搵超市
不過21:00後超市都關門大吉,哩晚唯有出動早有準備嘅隨身食糧
自從去過大阪嘅日清拉面博物館之後
白加煎打從心底地敬佩安藤百福先生一份不言敗嘅魏力
再加上早前日清繼"太苦汽水"俾香港無良大企業強迫要打壓小商店
要求日清強制小商店嘅最低零售價
結果一場小風波後,日清(香港)回覆大企業:佢地唔會干涉市場定價
自視過高嘅香港無良大企業真係以為自己係超人,可以呼風喚雨
因為哩件事,白加煎講過今後會再多d幫襯日清
識英雄重英雄响香港就唔會捨得買日本版"日清",响日本買杯面帶返香港就係"亞"行李
所以最好都係响日本食
以下哩個係食完要俾佢幾個"讚"嘅芝士咖喱杯面
其實哩款杯面响香港已經相當有名氣,果然係"有麝自然香"
既然提起"無良大企業"嘅經和營手法
都順便想講一間曾經遭哩間無良大企業打壓嘅連鎖商店
當日可能算係小商店,不過自從上次'汽水打壓事件"後,哩間小店不知變得幾咁出名
同時都大規模擴充新舖,宜家哩間再唔係小店
可能連經營手法都變為大企業嘅無人情味經營手法
事情同哩款芝士咖哩杯面有關,所以趁機會順便寫埋
某日白加煎响哩間連鎖商店見到哩個杯面,每杯只售$15.9
白加煎記得响日本買都要138 yen,"桔豬腦"大約係$22,咁$15.9都相當抵買
當時哩款杯面有好多存貨,咁薄利多銷都係雙贏嘅局面
事隔幾日,白加煎再去哩間連銷商店
哩款日清杯面都賣得7788,不過價錢就變為$19.9,突然間加價$4
係咪因為貨品所剩無幾,就實行"發市當3年"咁賺到盡呢?
同時間"桔豬腦"做緊特價,每杯$19.9
哩間本來係小店嘅商店係咪變緊質呢?白加煎相信:係
某日同友人講起哩件事
友人女兒嘅經歷,哩間店舖係即使客人買錯貨品,有單據只要求換貨
但哩間商店係拒絕,講明貨物出門,恕不退換
咁咪即係仲無良過香港無良大企業
沒有留言:
張貼留言