3月30日 (星期五) 陰天
溫度:12度-21度 
哩日比起前一日暖左好多,妖怪の町又少左好多細路仔
乜唔係星期五會熱鬧過星期四架咩?
今次全個行程一共17日,所以從無"趕"哩個字
白加煎嘅人生入面可免則免都唔想出現"趕"哩樣野
"趕"~總係負面意思比較多
本來都無打算"咁唔趕"用兩日時間响"妖怪の町"觀光
米子都會有值得觀光嘅地方,可惜又係姍姍來遲嘅"桜"
搞亂個行程 既然無桜,咁就要彈性處理,所以响米子兩日都只係去左境港
第二日坐返相同時間08:42出發嘅列車,哩次列車嘅組合係鼠男+鬼太郎
第一日完成左"完走証",又去左水木記念館,又影左好多相
第二日基本上就係全程shopping
"眼珠爸爸"話:皆、ようこそ
白加煎相當欣賞"水木先生",亦都相當欣賞境港哩個咁認真嘅觀光景點
响境港打造出一個妖怪の町,大概當中包含左"水木先生"一點念舊之情
話說80年代之後,境港由一個有人氣
居民可以自給自足嘅海港城市而變為一個急促老化嘅城市
年輕人紛紛離開家鄉,寧願去城市工作
為左要重新振興哩個地方,市政府人員大胆提議將境港打造為一個觀光景點
而出身自境港,又有號召力嘅知名人仕中,首推"水木先生"
當地居民+市政府人員向水木先生提出哩個建議後
"水木先生"好快就答應
或者並唔係只為自己嘅成就而錦上添花,而係一份對故鄉嘅恩情
响"げげげの女房"中,水木先生人到中年先打出名堂,妖怪漫畫被認同
當佢寂寂無名,人又窮困潦倒之時
水木先生身邊依然有支持佢嘅朋友,街坊"當舖" 老闆從來都唔會出售水木先生所抵押嘅物件
咁咪即係變相用抵押物黎借錢俾水木先生,哩d都係一份恩情
所以成名後嘅"水木先生"仍然無忘記"恩情"哩樣野
如果只為宣傳自己錦上添花嘅話
"水木先生"大可以同商業機構合作响東京,响大阪做一個妖怪樂園
參觀者要俾入場費,咁都一樣會有盈利+宣傳之效
但係為乜要响一個連新幹線都無嘅城市打造一個"妖怪の町"
全個妖怪の町,只係"水木記念館","妖怪倉庫"要俾入場費
全街嘅妖怪銅像一樣係全公開咁任影
白加煎欣賞"水木先生"係絕對有理由 响"妖怪の町"入面,相信唔少舖頭係境港原居民
藉住"妖怪"哩個賣點,佢地可以做d小生意,繼續安靜簡單嘅生活模式
除非哩度賣妖怪之物前,先要俾一大筆"加盟費"
否則哩個景點都係振興左"水木先生"嘅故鄉
其實白加煎有d羨慕哩d咁簡樸嘅生活
日出而作,日入而息妖怪の町上,有個別舖頭係特別出名,因為所賣嘅產品有特式
哩d面包夠可愛嘛?!最能保持真面目嘅係鼠男
其實上排右2係邊個造型呢?
諗唔到喎! 唔好睇少哩set 面包,要1470 yen架(稅入)!太貴喇,$140買7個面包
"妖怪饅頭"又係相當有代表性嘅手信
雖然都明知係好睇多過好食
不過見到佢地嘅cute版造型
又係會令人唔計較係咪好食 
最可愛又係鼠男 
可愛+唔難食+價錢相宜,咁就容易"迷惑"人乖乖俾錢
315 yen有齊4款,抵過買妖怪面包喎
白加煎買左新登場嘅栗子饀,唔太甜又唔太硬(即係還算新鮮)
另一必買手信係哩間眼珠饅頭
仲教導埋如何影出鬼馬扮相?!
不過一粒要315 yen,太貴囉!
白加煎所見,會俾錢買嘅人唔係多 
哩個"一反木綿燒"又係太貴喇
1枝400yen....... 
唔飲酒嘅白加煎其實去到日本就有d心大心細想搵一次响酒店歎住sake睇電視
不過每次最終都係卻步
無謂因為貪得意而醉過龍
而遇上大錯
一反木綿嘅籐椅,45000 yen一張,仲只此一家
哩d cute版妖怪公仔個個都係獨一無二嘅"手版",價錢都獨一無二
咁貴 
貴還貴,有d貴到係"非賣品",多多錢都唔會賣
不過又實在仲有顧客問價,舖頭索性寫明係"唔好意思
哩個係非賣品...."
就係一個妖怪の町,重新為境港嘅居民帶來一片新氣象
繼續留守家園,繼續自給自足嘅簡單生活
全街手信店部份賣嘅貨品係相同
有d手信店相當有規模,裝修又新,人流多,職員都好幾個,生意自然都會比較多
白加煎係一個理智消費者(即係要值得俾錢先俾錢),又因為唔趕時間
所以買手信時係一次過睇晒
鎖定目標先回頭再買 咁就比較少會買到d"唔等駛"或者"霎眼嬌"嘅野
同時間白加煎都鎖目標,只要價錢相同都盡量幫趁小店舖
所以白加煎所買嘅手信大多數都係黎自d前舖後居,舖頭無乜裝修
似係屋主自己經營嘅小店
白加煎睇中左"眼珠爸爸布袋",去到一間只有兩婆孫看守嘅小店
當時婆婆同孫女(大約6歲左右)一齊睇故事書
"いらっしゃいませ"後,婆婆繼續同孫女講故仔
睇黎婆婆開舖都只係志在過日神
有細藝 事實上佢地舖頭細細,貨品都唔係好多
白加煎要買"眼珠爸爸布袋",問婆婆要一個新嘅
婆婆話:"唔好意思,只有哩一個,你介唔介意?"
本來都有小小介意,但一心諗住要幫趁小店,咁就唔好嫌三嫌四
同埋當時都唔好意思話唔買,最多洗乾淨先用
當白加煎小心檢查個布袋後,回答婆婆:",哩個都可以!"
婆婆主動話減價100 yen出售,咁就仲好添啦!
能夠順便做到小小自以為好嘅事,至少心靈上有d滿足感
手信中,白加煎响另一間老式店舖買左"眼珠爸爸"水杯
三個顏色中,邊款最靚?白加煎又會睇中邊款呢?
白加煎買左紅色間條嗰款,宜家日日同"眼珠爸爸"親吻!
見到咁壯觀嘅場面,當時實在係用心花怒放黎形容
上圖,下圖哩d全部都係筷子架
納豆乾變為鼻屎
最啱就係用鼠男做代言人 
哩d"仙餅"係易碎手信只宜拍照留念,不宜購買
印有"水木先生"筆跡+名言金句嘅曲奇餅
以下哩d比較普通嘅手信,响鳥取嘅手信店都仲可以買得到
臨別在即
再借用網上影片,再次睇清楚境港哩個地方
沒有留言:
張貼留言