2012年一人黑仔之旅DAY 12@倉敷(哇~哇~哇~吹緊黎)

 

 

4月3日 (星期二) 雨  溫度11度-18度





哩一日突然回暖好多,不過都可能係咁樣就引發翌日突如其來嘅低氣壓




一早起身就要執好兩件行李,今日又係同"大仔(行李)分離嘅時候




佢要一個自己返大阪,哩次响酒店做托運,連哩張表格都係自己填

(平日寫字潦草d型好多,無咁功整架!)




食完早餐就去見運河最後一面,唔知d桜花開到邊個地步呢?



就係咁咋!


大原美術館照常運作,不過是日大雨,遊人唔多



哩個景像似曾相識,當年首度踏足倉敷就係哩個天氣,大雨比哩日更甚

不過哩日都唔見得好過當年,雨水時大時細

試過索性走入案內所避雨

不過雨天景色都有影嘅價值

的確又係另一種風情,實在好鍾意哩條小運河,佢有太多變化喇!

 

有點淡淡哀愁

其實哩一場並唔係普通雨

大概當時全個日本地域嘅人都唔會諗到幾個鐘頭後

日本本洲交通大癱瘓,仲牽連到四國,確實係天有不測之風雲.....

 

雨勢有增無減,都係盡快離開,搵個有到瓦遮頭嘅地方




沿路行返出去車站經過東橫inn

見到酒店附近有"黑猫父子貨車"停响路邊

唔知係咪順便會收埋白加煎個"大仔(行李)"呢?.........咁都相當有效率喎!

食埋午飯就會離開倉敷,哩次鎖定嘅食店就係星期一定休日嘅食店

前一日食唔到,哩日誓要補數

食店位置就响東橫inn後面嘅商店街



食店名稱: かっぱ




門外睇裝修,一d都唔up-date

唔似得香港d食店,價錢貴少少,似樣少少嘅間間外表都見得人又新又企理



不過多數都係得個樣好睇.....唔好食

以下係網上圖片



當日去到係接近中午12點,但食店內都已經有8-9個客人

白加煎唔好意思企响身影人地全間店舖

貼哩張相出黎都係想公開埋內裡格局,都係一樣地"舊舊地"


白加煎係一個注重內涵嘅人

店舖唔靚唔緊要,乾淨就可以,其次就係要好食

哩間食店係食炸豬排,白加煎就注文左哩個ミニ(迷你)定食

話係"迷你"都唔算真係迷你,哩個份量有d女子都唔會食得晒




以午餐黎講,白加煎就覺得啱啱好

大特寫嘅豬排,難得有"豬排"係人見人愛

哩間食店嘅炸豬排响食評網站得到唔錯嘅評分:3.51分(滿分係5分)





哩次旅行白加煎發現自己相當鍾意食炸物,咁自不然對哩件炸豬排都讚啦!

事實又真係幾好味,一d都唔乾,唔"鞋"口又唔油膩,仲有d濕潤感

大概哩d就係傳說中嘅juicy (肉汁被封住)

去到12:15pm 左右,食店內嘅卡位都俾人坐晒

counter位都坐左超過一半人,白加煎都唔好意思一人霸一張"4人卡位"

食完就拿拿聲走人,唔好阻人做生意




食完飯後,雨無停仲越落越大,由食店去JR站,步行只係5分鐘左右

不過因為唔想濕身,白加煎中途响百貨公司流連左一陣等雨勢減弱

食店資料請CLICK: 名代とんかつ　かっぱ