4月1日 (星期日) 晴
溫度4度-12度
上次去倉敷時只係一個自由行初哥,新手上路只係掛住安排交通接駁
所以就錯過左哩間美術館:"五十嵐優美子美術館"
佢係小甜甜嘅原畫師,小甜甜嘅作者係水木杏子
白加煎到宜家先知原來故事係分開由兩個人嘅創作結集而成
小甜甜係白加煎最愛+唯一嘅少女漫畫
所以哩次一定要去參觀
五十嵐優美子响北海道出生,唔明點解佢嘅美術館會開設响倉敷?
會唔會係因為有以下哩本漫畫作品呢?
又可能係黎到倉敷之後先有哩本漫畫架喎?!
真相不得而知,唯一知道哩本書無"小甜甜"咁暢銷,揚名海外
美術館一角有"有名漫畫家"嘅真跡
大概哩d係五十嵐優美子嘅好友
小甜甜係1975 年嘅作品
為乜黎到哩個美術館,感覺好似時光倒流左至少20年咁樣?
响樓梯上就係小甜甜+狄里斯嘅畫
上樓梯方向會出現小甜甜,落樓梯方向就係狄里斯
哩個狄里斯個樣相當"o靚仔"
其實小甜甜漫畫中,白加煎最鍾意係歐拔先生
响甜甜相當失意嘅時候,佢就會出現
狄里斯只係令甜甜傷心.......兼且狄里斯同甜甜分手後,佢嘅行為似"窩囊廢"
話哩間係美術館真係無講錯,入面只有畫,連文字介紹都少
比起鬼太郎作者,水木先生嘅記念館,哩間美術館真係相當馬虎
連畫家嘅近照,近況都無,哩度只欠未結埋蜘蛛網架咋!
可能白加煎係第一個外地人咁樣品評哩個美術館
唔鍾意就索性咪寫,不過白加煎就係又要寫但又要批評
雖然好鍾意小甜甜,不過事情應該獨立咁睇
愛~不應盲目
下面張海報,左上角嘅倉敷Tivoli Park都已經結業左一段時間
响哩度就係會搵到out-datedddddddd嘅野
有d事可以做得認真d,為乜唔做呢?
自己間屋企都會間中想有d變化,有d新鮮感
更何況哩度係收入場費,咁至少都應該盡量做到值回票價
不過......有d人就係可以要求何其低
既然"道不同",咁打個轉就可以睇完,閃人
當參觀人氣欠奉時,就要諗d生財計仔
就係以下哩項活動:扮公主
或者扮大和古時人
一間美術館搞到要出租衣服俾人留影黎賺錢
咁可能都應該要改名為写真館
做生意係咪需要有好清晰嘅方針,咁先可能有成功呢?!
白加煎自細都對哩d大眼水汪汪少女漫畫公仔係無乜興趣
細個時畫公仔,畫叮噹都唔會畫哩d少女漫畫
證明左白加煎自出娘胎已經唔係一個咁女仔行為嘅女仔
唔鍾意發埋d少女春夢,又唔鍾意老老積積扮公主
扮淑女長大後仲對哩d過度造作嘅扮靚靚行為有d抗拒
扮公主哩個行為真係.......ちょっと.........
而小甜甜之所以係一個例外,因為故事寫得相當好
所以唯一愛上嘅大眼水汪汪少女漫畫公仔,從來就只得小甜甜一個
不過都因為小甜甜嘅個性一d都唔造作,間中仲有d男仔頭
雖然好鍾意小甜甜,但响美術館入面,一件手信都買唔落手
其一:只係小甜甜嘅物品,已經係選擇不多;其二係價錢偏貴到唔值得
尤其係小甜甜+狄理斯嘅物品,仲係特別再貴d
咁係咪謀取暴利呢?......咁就慳返添!
反正白加煎鍾意嘅係小甜甜+歐拔先生哩個組合
相隔5年半重臨倉敷,遊人多左好多,一條小小運河唔會有咁大影響力
响倉敷站出口嘅另一邊,本來係一個童話樂園:倉敷TIVOLI PARK
本來哩次計劃行程時都有考慮去TIVOLI PARK
因為有黃昏入園票價,入去影相都相當唔錯
不過上網一睇先知响2008年大除夕翌日已經正式結業
(有關TIVOLI PARK,全是網絡圖片)
宜家已經改為大商場+大outlet
星期日嘅outlet,連繫黎自四方八面嘅人,所以多人到不得了
雖然話係outlet,不過價錢至少有一大半以上並唔係outlet價錢
逛左一陣都無心機再逛落去
Mitsui Outlet Park
除左outlet,ARIO係一間大大大商場,入面比較多元化
至少都仲有一間大大大超市
雖然商場入面有咁大大大間超市
不過是日晚餐依然係去返民區嘅超市,除左價錢會合理d之外
最大原因係可以買到 コロッケ,哩次旅行愛上コロッケ(可樂餅)
响超市度仲見到日清Crossover添呀
哩包薯條嘅味道係日清UFO炒麵嘅味道,都話要支持良心企業,所以必買
不過哩款日清焼そば嘅味道係相當濃味,所以哩包薯條都係一樣
仲有淺嘗就夠嘅刺身,因為要留肚食コロッケ
不過無太多選擇,哩晚局住食三文魚啦!
至於"脫印"布丁,哩個正常過之前食嗰個檸檬綠茶味
買完晚餐趕返酒店,皆因有更重要嘅事要做
影靚相睇黃昏景色嘅話,白加煎最鍾意天色轉黑前嘅一刻
因為由白天變為各樣嘅藍色.....最後先係黑夜出場
謝幕為左要捉住哩一刻,白加煎返到酒店,只係帶左枝腳架+相機就再向運河出發
黃昏時段嘅人比起白天時少左好多,"日帰り"或者走馬看花式觀光嘅人都走晒
運河再次變得相當寧靜
相機確實只可以留下大概嘅回憶,最珍貴嘅景像依然只能長留記憶中
眼前嘅天色開始昏暗,不過响相機境頭下仲係捉唔到哩少少嘅變化
更何況白加煎所用嘅只係傻瓜機,仲要之前跌到重傷
倉敷夜景嘅亮燈時間:
10月至3月,直到21:00 ----- 4月至9月,直到22:00
當運河上出現建築物嘅倒影,美景同白天時完全唔一樣
下圖:無影到河中倒影
下圖:哩張就有倒影.........きれいでしょう?!
為左追哩一刻良辰美景,每個人都捱住凍,是日最低溫度:4度
唔肯定係咪太陽伯伯啱啱走左就即刻跌到只有4度
但好肯定當白加煎離開運河時,兩手係凍彊左
相當大意嘅白加煎睇住運河慢慢變得燦爛耀眼之時
相機出現即將無電嘅符號,突然記起後備電池無帶响身.........
唔通即刻跑返酒店攞?
咁又唔需要
咪最多聽晚再黎多次囉!
美景不厭百回看,哩次影到幾多就幾多啦!
哩次暫時只貼出半天黑嘅美景
天黑齊哩美景就要稍等喇!
沒有留言:
張貼留言