2012年一人黑仔之旅DAY 9 @ 鳥取(再見~妖怪たち)

 

 

3月31日 (星期六)  雨天  溫度:8度-15度






當市區預計只有8-9度低溫,哩個大大大砂丘唔知會跌到得番幾多度呢?



又凍,又無細藝之時,食就係最好嘅選擇


至少食飽左,身體都會暖d

上次响境港為左訪尋最愛嘅海膽+大魚子丼

白加煎甘願飢寒交迫咁搵食店,咁樣先會食得更滋味

不過响一個荒蕪沙丘,就算有哩份鍥而不捨嘅精神,但都唔會有好多選擇



砂丘會館入面都有食店,不過風評認真麻麻

同埋見d旅行團係去哩d食店開餐,咁即係唔好預係好食








不過好彩都有一間係食海鮮丼,而且食評網站上得分都唔低,有3.54分






營業時間係10:00-15:00,星期四係定休日 





舖頭細細間,一睇就覺得係一家人經營嘅小店 

所以即使風評好,都唔可能招呼鴨仔團

自由行嘅人當然都應該搵返一d切合身份嘅活地方或者活動 

雖然話白加煎愛食海鮮丼,不過見到各款丼,唔見得勾起食慾

即使係いくら丼都無興趣

最後都只係睇價錢咁注文左一個"經濟雜錦丼",盛惠1150 yen



全碗海鮮丼入面,完全無一樣魚生係可以引起白加煎嘅食慾

連嗰一執仔魚子都只係細魚子........

雖然食評網上得分相當唔錯,但白加煎就覺得無乜驚喜

可能只係响一個風中飛沙嘅地方仲可以食到新鮮海產

咁所以攞到好多好感分數呱!

食完午餐趁唔算好大雨就hea左一陣手信店,順便取暖





鳥取出產二十世紀梨,梨味果汁都幾好味

不過右邊嘅蜂蜜蛋糕(離開鳥取之前响大丸百貨買返黎)就相當唔掂

俾面佢係長崎蜂蜜蛋糕先買,但完全無蜂蜜味

白加煎home-made都好食過佢好多,嘥錢+把鬼!

以後都唔會買日本嘅蜂蜜蛋糕



hea完手信店又去左砂丘展望台

(網絡圖片)如果天氣好嘅話就會見到以下景色



不過當日企响哩度連"再坐一會"嘅理由都無



3月31日黎到鳥取砂丘係夾唔啱睇"堆沙展覽"(有料)

如果4月中旬先黎,就會睇到堆沙展覽

已經係第5屆嘅,詳情請click 鳥取砂丘 砂の美術館


以下係過往作品

即使睇唔到堆沙展,响展望台哩度都有一隻用沙堆成嘅大大大熊







天氣仍然係唔好,所以把心一橫:"返歸"

臨上巴士又係一埸大雨,返到鳥取站後,天色就好轉左少少

當時只係12:35 pm,時候尚早,逛左百貨公司超市打發時間




响鳥取仲會見到唔少妖怪產品




14:15pm返酒店攞返d行李,下面張相看似平靜

但實情哩個位置係食風位,大風到不得了

黎到哩日,白加煎都已經習慣左哩個季節响日本會出現失驚無神嘅"嵐"(暴風)






下晝兩點幾嘅鳥取,哩個情景似曾相識

米子站又係一樣,日光日白搵個人睇下都難



高速巴士响15:35開出,經過上次差d"走車"嘅經歷

已經係有d神經質嘅白加煎响14:35已經黎到高速巴士站

响隔離JR鳥取站逛左一陣手信店




高速巴士(鳥取至岡山)

高速巴士站都係朝早上麒麟巴士嘅車站





往其他地區嘅高速巴士都係唔同時間响"1號"站上車



哩架目的地係大阪



高速巴士售票處



上左車發現點解係3行單座位,而又被編坐中間嗰行?

網上訂票時係話明2行2座位,而白加煎就揀左坐窗口位




哩班巴士都有9成滿客.可能因為一日得3班車由鳥取去岡山

哩班嘅時間算係比好較好



雖然哩日天氣唔好根本都無法好好觀光

但係決定冒雨去砂丘都係正確嘅決定,否則只係响市區逛街

咁就更無聊