一個人浪盪日本2009-Day 5@小樽

 

2009年9月16日,上晝突然好大雨 下晝突然變天晴

 

 

一朝早搬左酒店之後,就開始一日行程喇!

今日要去小樽,不過天氣唔係幾好,去到小樽無幾耐就落滂沱大雨

仲落左有成個鐘頭有多先停雨,有帶傘都會狼狽濕身

結果本來預定左想去既地方,都為左要避雨而結果亂逛一通

又影唔到相........残念だった!(真可惜!)

 

 

南小樽站係一個細車站,乘客既流量唔多,細車站有細車站既人情味

出閘時,站長伯伯仲對我友善咁微笑,呢份人情味令人窩心 

 

 

遊小樽既主角係小樽運河,响南小樽站落車,順路逛落去

7-8分鐘後就會到小樽觀光區一帶,見到呢d大廈,就係購物觀光既起點

 

呢度係小樽オルゴール堂

 

小樽オルゴール堂外,放左呢個蒸氣時鐘

 

附近手信店門外既 mickey & minnie

 

 

LeTAO係小樽觀光區內賣洋果子既舖頭

一樓賣手信,二樓係餐廳,三樓圓頂位置係展望台

 

呢個宣傳牌係用中文寫既,仲話"店內有會說中文的服務人員"

可想而之幾多遊客係黎自用中文既地方

雖然話佢地自稱呢個芝士蛋糕係"不吃會後悔"

但當肚子不餓時,就真係難以動心

 

其實有個職員攞住一碟"試食品"企响呢度叫人試食既

食過試食之後,又唔見得唔食會後悔喎!

 

雖然無食芝士蛋糕,但都買左d朱古力做手信

呢間舖頭推銷d客人買野時,就會主動請客人試食

(其實如果無得試食都真係未必會買)

不過試食左幾種後,又唔好意思咁 けち(孤寒) 咩都唔買

呢個促銷手法都唔錯喎!

 

 

喂! もしもし, My (chocolate monster) friend  

我肯定我自家製既"生朱古力"會好味過 LaTAO呢個

日本出品d朱古力質素仲未到家,同歐洲貨相比仲係有距離

日本係奶製品出名,所以d朱古力重奶味,好滑

但講到朱古力味就......!

 

歌仔都有得唱啦 ~ 

"如果太多牛奶味,朱古力味無"訂"企,等到朱古力味返番黎,牛奶味就唔爭氣"

 

呢個係鐵一般既事實,咁到底你要牛奶味定朱古力味呢?

 

LeTAO網頁: http://www.letao.jp/

 

 

沿住咁行就會去到小樽運河,呢條街大多數都係購物既舖頭,觀光既地方就唔多

再加上無幾耐之後就落左一場大雨 

為左避雨都無再跟住原定計劃咁逛,所以小樽呢條街俾我既印象幾乎只係購物

購物種類中又以玻璃同音樂盒為主

 

 

 

小樽呢一區既壽司店同魚生丼店都唔算少,講明係遊客區,又係要預左價錢係浮誇

 

所以呢一日既午餐就揀左一間小小拉麵店,都係呢d拉麵店比較平實唔浮誇,仲有人情味

 

呢個"注文"(order)係牛油粟米(味增湯底)拉麵

 

後生既店主 木村さん,見我一個人影低 d旅行點滴,仲主動話幫我影相添

今時今日呢d服務態度先叫似樣架嘛!

 

 

黎到小樽確實係有一個"搵食目的",為左搵呢間舖頭,我又行錯地方兜錯路

前前後後都花左30分鐘,到底有咩會令我咁鍥而不捨呢?

咪係雪糕囉!  (店名:北之雪糕屋)

 

呢間小店原來就係响運河附近,唔知點解會行左入巷仔,仲迷路添?

 

呢度唔止賣雪糕,仲有賣 T恤

 

呢間舖頭連廣末涼子都响電視節目中介紹過,佢仲對呢度d雪糕大讚添!

到底有咩咁有特式連電視台都要黎介紹呢?

 

睇下d雪糕味道先~

非一般味道既雪糕有啤酒味,wine味,海膽味,南瓜味

牛油薯仔味,白桃味,tiramisu味,波子水味,納豆味,蟹味

青芥辣味,烏賊味,鹽味,蘋果批味,柚子味,cream cheese味....

果然好有創意喎!

 

女性人氣 no.1係紫芋味 ; no.2係cream cheese味 ; no.3係白桃味

男性人氣 no.1係海膽味 ; no.2係烏賊味 ; no.3係啤酒味

 

廣末涼子既推介係海膽味+牛油薯仔味,咁就照樣"注文"(order)一個啦!

 

兩個味道都唔錯呀!

我係海膽"粉絲",只要係海膽就鍾意,咁呢次當然都係話海膽好味d啦

其實牛油薯仔都唔錯架!

 

呢d食材平時多數都係咸味黎品嚐,可以食到甜既口味,真係幾特別呀!

 

北之雪糕屋網址: http://www.kitanoice.com/

 

 

食飽飽之後就去到戲肉~ 小樽運河

又係狂影相既時候喇!

呢度又有一個專業幫人影相既叔叔喇!

叔叔影人,我影叔叔!

 

又一次証明日本d天氣變幻無常,明明中午時仲落緊滂沱大雨

但下晝已經完全雨過天晴仲見到藍天白雲喎!

 

好鍾意呢張相,睇埋個倒影,感覺份外寧靜呀!

 

 

 

 

另一景點 : 手宮線跡地

 

呢條鐵路响1880年開始服務,1985年正式被棄用

宜家變成小樽既歷史見証

 

下面有張相喎~

 

原來係以前行走呢條鐵路既火車

 

 

多謝呢兩個日本型男

唔收我錢做"騎喱啡",令張相個構圖更生動

ありがとう! 

 

 

到埗小樽時响JR南小樽站落車,離開小樽時响JR小樽站上車

大車站確實係有大車站既繁華

但我最愛既依然係點滴既人情味,即使只係萍水相逄....