一個人浪盪日本2009-Day 6@富良野(1)

 

2009年9月17日,全日天晴 

咁好天氣最好去郊遊 所以今日行程係要去富良野既!

 

 

留响札幌既行程中,以計劃去富良野係最難 plan既~

如果係租車去富良野玩,咁就簡單啦,有架車,仲用埋GPS,咁包唔會迷路啦!

不過如果唔租車,又想自由行咁真係幾"幣"!

 

睇下旅遊天書介紹個行程先 ~

去 ファーム富田 要步行5分鐘 - 呢個都接受到

去 フラワーランドかみふらの 要步行1小時 - 呢個就..

去 日の出公園ラベンダー園 要步行15分鐘 - 呢個都還可以

去 マイルセブンの丘 要踩單車20分鐘 - 呢個都接受到

不過如果要兜晒嗰一區觀光,總共要踩單車120分鐘,吓?!

去 四季彩の丘 要踩單車10分鐘 - 呢個都還可以

去 千代田の丘見晴台 要踩單車40分鐘 - 呢個唔好諗要去喇!

只係睇住d時間,真係都唔知點plan好?!

 

 

富良野d花場都幾分散,如果係6月至8月期間,因為係薰衣草既花期,遊人不絕既關係

所以都有d接駁巴士接載遊人往返JR車站

 

但過左呢個旺季,富良野大致上又回復平靜,唔會再有呢d接駁巴士

JR車站落左車之後仲要行一段路,而行駛田野鄉間既JR班次只有兩個字:"疏車"

下下要計住時間趕返車站都好煩喎!

 

 

係可以租單車代步

但係踩呢d田野路,上斜,落斜都好吃力架喎!踩完第二日咪好攰囉! 

踩單車咪即係唔駛再坐JR,全程都係用單車,咁有挑戰性呀?!

就係因為咁,計劃要去富良野係有d難度既事

咁如果願意取捨,到時參觀到一個花場都會滿足,咁就簡單好多啦

不過真係無第二個好提議喇咩真係無?

 

 

富良野既賣點除左係"花"之外,就係嗰d田野style既民宿喇!

以前响山梨縣嗰邊觀光,已經住過呢d民宿,所以今次已經唔再雀躍要住呢d屋喇 ~

(如果仲要安排住呢d民宿,一定會更加頭痛)

 

去富良野既目標只係要睇花,影相,所以盡可能想用最短既時間影到最多靚相

 

(喂!乜你諸多要求咁又話唔好,咁又話唔得,不如咪去喇!)

 

唔係好多要求遮,唔會人人去富良野都係租車或者踩單車卦?

一定有野會滿足到我d要求既~

咪係join個local tour咯!平,靚,正!

原來自由行之中搵一日做下鴨仔其實都幾好玩架


!跟團都有跟團既好處既~

 

 

上網搵到呢間本地觀光團

http://www.chuo-bus.co.jp/sightseeing.tw/ (中文網頁)

 

千揀萬揀之下揀左呢團 - "ふらの・びえい四季物語"

http://www.chuo-bus.co.jp/sightseeing/stsg_o.php

 

運行期間 発着時刻 予約 料金(税込) 所要時間 ふらの・びえい四季物語 【毎日運行】  2009/6/1～6/19、8/8～10/12 札幌駅前 バスターミナル 必要 四季物語 （大人7,000円　小人4,600円） ラベンダーストーリー （大人7,300円　小人4,700円） 　10時間35分 ふらのラベンダーストーリー 【毎日運行】 6/20～8/7 8:30発・19:05着 昼食代、フラワーランド入場料を含む。 （四季物語のみ）

 

本地觀光團既導遊當然係全程講日文啦!

 我d"半聾半啞"既日文响呢個時候,簡直係變左做"全聾半啞"添!

 

導遊姐姐一上車就逐個人問:有無人係回程時要趕車,唔可以遲到既?

(其實我仲未"全聾"得晒既,只係長時間都"撞聾"遮! )

如果有人係要趕時間,咁司機叔叔就會睇實d時間開車,唔會搞到要過時解散

 

我之所以無話自己係"全啞",係因為我仲識同個導遊姐姐講 :

"すみません　私は日本語が　あまり　分かりません"

(唔好意思呀!我唔係幾明白日文架!)

响呢d時候都無謂逞強扮叻啦~

一早同導遊姐姐講左,等佢知我需要"特別照顧",咁咪仲好

 

之後全程响旅遊車上,就係佢有佢講日文
我有我食野,影相,瞓覺,發白日夢,刨天書....

爽呀!

 

 

其實有另一個 local tour係為外國人而設既

http://www.chuo-bus.co.jp/sightseeing/stsg_x.php

 

呢架車應該係有headphone設備,團友可以選擇聽英文,中國語(應該係普通話),韓文,日文

對於外語,我自認全部都係"半聾半啞",响香港返工時仲聽唔夠咩?

去旅行仲要"勞心勞神"黎聽外語?

唔好喇卦!

 

其實除左呢個原因之外,仲因為呢個"外語團"行程觀光既地方少d

但價錢又貴d,咁我梗係寧願做一日"全聾半啞"人啦!

呢團7000yen玩足一日,包埋一餐酒店 buffet
又解決左d交通問題,其實呢個選擇都幾明智啦!

 

呢個團既觀光點就係下面(1)至(6)項

 

大部份都係旅遊天書推介既景點,宜家一日時間就去到,真係幾唔錯啦!