2014 日本之旅 DAY 6 @ 小豆島 - 遇上天使 x 2

 

 

2014年5月8日～星期四，小豆島天氣極強紫外線






小豆島上有5個連接渡輪嘅碼頭，上年第一次去小豆島

由高松出發去土庄港，由草壁港返高松

而哩次行程將會由高松去池田港，之後由坂手港去神戶

 

 响酒店食完早餐就CHECK OUT重踏小豆島

 

 

 

 唔同航線嘅船响外表同內裡設備都有啲分別

 

 

 

 

 

 

 

 

 告別高松嘅烏冬，不過有機會一定會再黎，為左一碗咖喱烏冬都相當值得

 

 

 

 高松港嘅紅色燈塔係地標，黃昏時都幾有睇頭

 

 

大約一小時就到池田港

 

 

 

 

 

小豆島俾白伽煎嘅感覺係相當閒息，事實上島上碰到嘅人大多數都係中年或以上

 

巴士班次相當疏落，幾條巴士線都要慢慢理解先明白

 

 

巴士站嘅指示唔算太清楚，白伽煎差啲一到埗就甩轆：走巴士！

 

不過好彩响哩個小島上充滿了人情味，哩次白伽煎响哩度遇到幾位＂天使＂

 

 

 

落左船第一時間揾巴士站，網頁上表示所坐嘅巴士就係响碼頭上車

 

白伽煎行晒全個碼頭就只有哩個巴士站－新池田港，所以响度等巴士

 

等左大約10分鐘，有巴士埋站，不過唔係白伽煎要坐嘅路線

 

巴士叔叔好奇地主動問白伽煎要去邊，白伽煎如實相告：三都線

 

 

司機叔叔聽完無即時開車，佢攞左張類似地圖嘅野出黎睇

 

睇左一陣就主動話俾白伽煎聽：三都線唔係响哩度上車

 

白伽煎即時有啲＂騰＂，因為時刻表所示，三都線嘅巴士就到車站

 

白伽煎即時問司機叔叔：咁應該去邊度等巴士

 

 

 

 

司機叔叔指住一個位置，示意巴士站就响嗰邊

 

白伽煎謝過哩個巴士叔叔後就半跑式咁跑去另一個巴士站

 

中途遇到一個老伯，白伽煎又向老伯詢問三都線嘅巴士位置

 

响哩啲時候就要實行＂路在口邊＂嘅定論，唔好扮醒

 

 

 

不過後來白伽蒸發現一件事，小豆島嘅三都半島，譯音為MITO PENINSULA

 

但白伽煎問路時讀"三都線"為SANTOSEN

 

到底係咪讀MITOSEN先正確呢？但係司機叔叔同中途遇上嘅老伯都相當明白咁樣啵！

 

 

 

哩個巴士站係池田港，總之新池田港／池田港都令旅客相當混亂啦！ 

 

第一站係去小豆島國民宿舍，其實徒步去都可以，不過就至少要半小時路程 

 

當初知道小豆島嘅巴士係咁疏落時，白伽煎諗定如有需要就＂打的＂

 

不過回想起來，响哩度唔多見到有的士喎！ 

 

 

趕到巴士，上車後都係坐幾個站就落車，到左小豆島ふるさと村，又稱國民宿舍

 

 

 

哩度佔地相當大，類似戶外渡假村，村內有各樣活動

 

哩度有＂日本夕陽百選之宿＂之稱，係睇日落美景既好地方

 

其實白伽煎曾經考慮過就為左哩個美譽而响哩度泊宿，房租相當合理

 

不過哩度實在幾唔方便，巴士班次相當疏落，唯有靠酒店嘅送迎服務

 

但哩個服務只限送到碼頭，咁就相當唔方便，所以最後都放棄左住哩度

 

 

 

 不過唔泊宿都可以參加哩度嘅活動，哩次响小豆島第一個活動係摘草莓

 

 

 

 

 

日本草苺季節係12月至5月，所以哩日黎到已經係水尾 

 

如果係草苺旺季，入場費係1260日元，而且限時30分鐘

 

但哩日已經去到草苺水尾，所以入場費係1050日元，而且不限時間

 

草莓只限現場即食，不設外帶

 

白伽煎都係第一次响日本玩即摘生果

 

 

 

摘之前有專人講解及示範，其實係無技巧可言

 

 

 

 草莓園婆婆示範摘左一粒草苺就話可以食

 

白伽煎其實想問佢：有無地方洗下啲草莓？

 

 

 最後都係選擇唔問，如果有洗嘅需要，佢都會講明去邊度洗啦！

 

無講＝無需要

 

 

 

 

最後白伽煎就係摘左咁多，又食左咁多咋

 

白伽煎仍然最受巨峰提子，草苺都唔係咁香甜

 

 

一邊摘，一邊要避開啲蜜蜂

 

 

 

 

其實俾30分鐘時間都多，白伽煎摘草苺時有一位似係草苺園嘅熟客婆婆黎買草苺

 

順便又同白伽煎搭訕左幾句

 

摘完草苺，白伽煎响對面馬路嘅巴士站小休一陣，順便睇地圖

 

其實下一站係要走過哩條烈日當空嘅路，行到盡頭就有另一路

 

响嗰度坐坂手線巴士去下一個景點，哩條路大約要徒步20分鐘

 

 

黎買草苺嘅婆婆見白伽煎唔知响度等乜，佢响對面馬路大叫，問白伽煎去邊？ 

 

白伽煎答：去OLIVER GARDEN，哩條街行到盡頭就有巴士站

 

婆婆隨即問：我順便車你去到街尾，你坐唔坐？

 

 

坐～坐～坐！有順風車坐至少唔洗响烈日當空下暴曬20分鐘

 

白伽煎上左婆婆架車，原來車上仲有個公公（佢老公）

 

睇婆婆都有80歲，哩次可能係白伽煎人生中遇上最年邁嘅司機

 

婆婆好好人，去到街尾仲幫白伽煎揾埋巴士站

 

婆婆係白伽煎响小豆島遇上嘅第二個天使

 

 

因為坐左一程順風車，所以趕到巴士，响車站等左5分鐘就有坂手線巴士

 

又係坐幾個車站就落車

 

下一個景點：OLIVER GARDEN