2014 日本之旅 DAY 5 @ 祖谷 - 秘境主角～出場

 

 

2014年5月7日～星期三，祖谷天氣極強紫外線

 

 

觀光第二站：小便小僧（觀光時間10:50-11:20）

 

 

祖谷温泉旁邊有一個＂小便小僧＂

 

 

 

徒步3分鐘就到

 

 

點解小僧會有頭髮嘅呢？

 

憑乜野可以話哩個造型係小僧呢？

 

 

 

 

 

 

 

小僧就係响懸崖上擺上尿尿嘅姿勢

 

全世界嘅人都鐘意攞錢黎掟，乜都掟得一餐

 

 

如果哩個唔係銅像而係真人，咁樣响懸崖頂向差唔多200米嘅谷底尿尿

 

真係勇氣可加

 

 

預左30分鐘時間响哩度影相，其實邊駛咁耐呢！

 

奈何下一班巴士要响指定時間先會到 ，咁白伽煎唯有HEA住等

 

 

 

先後遇到3對男女自駕咁短暫停留

 

大家似乎對於白伽煎一個女子响山崖徘徊有啲懷疑，佢地有啲奇異目光

 

祖谷哩個地方確實係好少人會用公車黎觀光，可能佢地懷疑白伽煎想跳崖自盡

 

 

講真啦，哩個山崖有二百米高，靜悄悄咁跳左落去

 

真係屍骸都唔會揾到，最後只會化成一埋白骨

 

 

 

 

終於有一對看似係夫婦嘅中年男女，女嘅忍唔住問白伽煎响度等咩？

 

白伽煎如實回答：等巴士去かずら橋

 

之後女人返上車同男嘅講左一陣野，女嘅拎住地圖行出車同白伽煎講

 

佢地都係去かずら橋，可以順路車載埋白伽煎

 

 

 

白伽煎一個女子出門累積咁多經驗，已經訓練得要小心謹慎，唔好咩都貪

 

要先經大腦諗一諗　

 

首先佢地額頭上無刻住係咪壞人？

 

一個只能操低程度日語嘅外地女子跟兩個陌生人上車？？？

 

 

其實巴士將會响5分鐘左右就到，好似無必要坐陌生人嘅順風車呢！

 

白伽煎謝過對方嘅好意之後就婉拒左

 

 

 

 

事後白伽煎諗返，女嘅俾地圖白伽煎睇之時，佢地要去嘅かずら橋並唔係白伽煎要去嗰條

 

而係奥祖谷二重かずら橋，白伽煎去到かずら橋時都無再遇到哩對男女

 

唔好亂上車都係明智之舉如果上左佢地架車，咁可能全個行程都打亂晒

 

巴士好準時咁响11:20黎到載白伽煎去下一個主角景點

 

 

 

 

下一個景點係祖谷行程嘅主角，係因為佢嘅魅力吸引白伽煎黎祖谷哩個深山秘境

 

其實要吸引白伽煎去嘅景點，首要條件係要屬於冷門之地

 

 

 

 

大約20分鐘車程就落車，要行大約300米先到，仲要係斜路落谷底

 

 

觀光第三站：かずら橋（蔓藤橋），觀光時間 11:38-13:10

 

 

 

 

哩條就係久仰大名嘅かずら橋，只係一條吊條，到底背後隱藏住咩野故事呢？

 

 

 

 

かずら橋（祖谷蔓橋）係日本三大奇橋之一，架於祖谷溪上14米

 

2013年更加入選為 ＂世界の徒歩吊り橋 10 選＂之一

 

 

 

蔓橋嘅存在有兩個傳說：

 

 

（１）日本真言宗開山大師空海到祖谷弘法時，因為交通困頓，村民就建立哩條橋

 

 

（２）日本平安時代，＂源＂，＂平＂兩大家族征戰

 

落敗嘅＂平＂家一族由京都逃亡到祖谷深山，為免敵方追殺

 

所以以蔓藤築橋，以便敵人殺到時可以斬斷吊橋逃走求生

 

 

 

兩個傳說都無從求證，不過以（２）為坊間普遍流傳，為哩個深山添上神秘色彩

 

 

 

 

祖谷嘅かずら橋現時以西祖谷哩條係最多人到訪

 

仲有另一條處於交通比較不便嘅地方，橋比較短，嗰條係奥祖谷二重かずら橋

 

以下係網上圖片

 

 

跟據以前書藉記載，祖谷嘅かずら橋曾經有7至13條之多，至今只保留三條

 

 

 

 

以前確實係蔓藤結構嘅吊條，但宜家為了安全理由，蔓藤內裡穿入鋼筋

 

所以宜家實則上係一條鋼索吊橋

 

 

 

 

每年有35萬人次到訪哩條蔓藤橋，令到蔓藤要每３年就更換一次

 

每次更換需時兩星期至一個月，維修時會封橋

 

 

 

蔓藤材料越來越缺，粗度有5 cm嘅蔓藤越加罕見，宜家只係以幾條細蔓藤黎包住鋼索

 

 

 

 

起初行吊橋都有啲驚，不過行到一半就唔再怕，比起嗰啲會搖嘅吊條

 

哩條絕對唔可怕，只係要小心啲行就得，大腳板人仕應該會行得輕快啲

 

 

 

 

為遊人嘅安全起見，吊見只設單程方向，一定要由指定的一邊走到另一邊

 

 

 

 

橋底嘅小溪

 

 

 

黎到哩度已經係午飯時間，的確係有啲肚餓

 

不過當眼前嘅選擇只有哩啲食物時就即使有食慾都唔想食

 

 

 

一條鹽燒魚要大約港幣40，有地道風味都咁話，總係覺得哩啲魚係好腥

 



 

預鬆時間行300m斜路返巴士站，巴士準時13:10到站

 

 

 

 

响巴士上用零食解決肚餓嘅問題

 

不過哩個香港都買到嘅＂家落D＂薯條就強烈唔推介，口感又硬又實

 

 

 

黑胡椒沙樂美腸就好重味精