2014 日本之旅 DAY 5 @ 祖谷 - 谷底風呂初體驗

 

2014年5月7日～星期三，祖谷天氣

 

 

 

出門去旅行從來都唔會懶床，再加上前一晚未夠22:00就相約＂周公子＂去也

所以一早05:15起身都無難度，哩日準備坐07:00嘅巴士深入秘境

 

所以離開旅館嘅時間係要更早，又係無訂到旅館嘅朝食，咁早旅館都未到開餐時間啦

 

唯有自己準備好即食早餐

 

歐陸風嘅芝士咖喱合味道杯麵仲有士多啤梨

 

 

 



 

 

哩個歐陸風嘅芝士咖喱杯麵曾經令白伽煎相當推介，不過哩次食就覺得唔同左

 

 

一啲都唔吸引白伽煎想食多次，會唔會係改良左呢？還是係白伽煎嘅口味轉左呢？ 

 

 

 

 

 

士多啤梨都係麻麻地，一向白伽煎都係偏愛巨峰提子多過士多啤梨

 

冬天至春天都係士多啤梨季節，巨峰提子未到時候出場 

 

 

 離開旅館响哩條街行到盡頭就係JR車站，哩間旅館實在係超方便 

 

 

哩日係會通山走，唔方便帶晒隨身行李，所以要使用鐵箱托兒服務：

 

COIN-LOCKER

 

响車站等巴士遇到個放狗嘅大叔黎搭訕

 

响哩啲鄉間地方經常都遇到哩啲無懼白伽煎啲低能日語嘅大和人

 

 

 



 

上左巴士開始期待左兩年嘅＂一人深山探險之旅＂

 

坦白講哩次係有少少壓力，因為坐公車，時間絕不能甩轆

 

 

 

 

觀光第一站：祖谷温泉（觀光時間08:10－10:50)

 

 

 

祖谷係深山，有好多旅館，而且房租大多數都唔便宜，都比較少會租俾單人旅客

 

因為以上種種原因，白伽煎計劃行程時無考慮過响深山泊宿

 

如果要享用温泉，就可以响祖谷温泉酒店俾1500日元一嘗＂即日返歸露天温泉＂

 

 

 

哩間祖谷温泉都算係哩區之中最有特式嘅温泉

 

露天温泉設响山谷底，要浸谷底温泉就要坐路軌車深入谷底

 

咁有趣嘅露天風呂當然不能錯過啦！

 

 

買左入場票之後，白伽煎以為可以即刻坐路軌車落去谷底

 

經過職員叔叔解釋一番

 

原來係先要去２樓沖涼着返衫落１樓，帶埋隨身物品坐路軌車去到谷底

 

谷底有更衣室，响嗰度更衣再浸温泉

 

酒店有出售浴巾供即日返歸温泉旅客買黎沖涼，每條100日元

 

 

 

 

２樓係大浴場，其實仲有個室內大温泉方便住客可以24小時使用

 

 

 

更衣室嘅設備都相當齊，連按摩椅都有

 

 

從未試過＂即日返歸温泉＂嘅白伽煎企响度都突然有啲不知所措

 

心諗：平日住温泉旅館係有浴衣，咁會唔會係有浴衣着住先去露天温泉架呢？

 

 

四圍揾左一陣唔見有新嘅浴衣

 

白伽煎先估到應該係沖完涼着返自己啲衫就去坐路軌車

 

 

就係哩架路軌車運送人客去170米嘅谷底

 

 

 

 

 

 

 

當白伽煎行去坐路軌車時，嗰個職員叔叔送埋白伽煎去

 

相信係因為知道白伽煎係外地人，只能操低程度日語

 

為免帶來不必要麻煩都係由叔叔親身講解一次點操控路軌車

 

 

 

首先車停定晒先可以拉開閘門上車

 

上左車記得閂返哩度閘門，無閂門嘅話，路軌車係唔會開行

 

 

 

 

車廂入面係由乘客自己操控，按掣上或者落

 

 

哩日係閒日，觀光區相當清靜，全車都只係白伽煎一個乘客 

 

 5分鐘車程就去到谷底，風呂分男湯／女湯／家族風呂（要預先訂）

 

 

 

 

男湯 / 女湯

 

 

 

 

更衣室

 

 

哩度門行落去就係谷底温泉

 

温韾提示：記得要脫光光

 

 

 

  

响深山谷底脫光光都係第一次

 

原來咁樣回歸大自然而仲要係只有自己一個人，哩份感覺係相當唔錯

 

 

 

白伽煎到宜家都感覺唔到温泉嘅效用，連最簡單可以消除疲勞

 

白伽煎覺得响浴缸浸一陣熱水都一樣好似浸泉咁爽（可能真係唔識貨）

 

不過白伽煎就幾鐘意浸温泉嘅嗰份風味

 

 為左可以咁清靜寫意唔同人迫，所以白伽煎先將行程押後一日先由大阪出發

 

哩個安排完全係完璧だ

 

 

 

 

 

浸完温泉要補充水份，可以同家人朋友响哩度吹下水，小休一會

 

白伽煎就選擇離開谷底返旅館

 

不過坐路軌車時就遇上阻滯白伽煎不能否認自己係＂操控機器超低能人＂

 

 

路軌車响白伽煎嘅腦海中只係按上／下鍵就可以

 

不過當白伽煎入左車廂又閂埋門之時，按＂上＂鍵，架車無反應

 

搞左一陣先留意到車唔開行係因為月台閘門未有關上，所以架車無反應

 

 

 

 

終於返到旅館，仲有大把時間先有下一班巴士，白伽煎就去餐廳歎杯茶先

 

 

 

 

 

哩個深山景色幾靚，大城市人去旅行可以遠離城市，去見識／做啲平日無機會做／睇嘅野

 

確實係一個好好嘅體驗

 

 

 

浸完温泉，再歎埋杯茶，絕對係一大享受

 

 

旅館嘅影片

 

 

 

 

 

旅館嘅官方網頁：http://www.iyaonsen.co.jp/