2014 日本之旅 DAY 4 @ 鳴門 - 700日元的誠意

 

 

2014年5月6日～星期二，鳴門天氣：晴 冷

 

一覺醒來就係大天光，由酒店房間望出去就係咁開揚

 

而哩日天氣相當唔錯

 

 

 

雖然前一晚發生疑似02事件不過白伽煎都相當老定當無事

 

最大原因係因為哩晚入住嘅房間係咁有陽（光）氣（息）

 

所以就算真係有02物快閃過，白伽煎都認為對方只係路過唔會停留响哩間房間

 

有時所謂＂有鬼＂，其實只係自己心中有鬼，自己嚇自己



事實都證明左白伽煎好安寧咁瞓左一晚，無被騷擾

 

 

 

酒店不備有早餐，所以要自己搞掂

 

朋友去完日本後，推介哩個只有＂些粉二呢墳＂品牌嘅自家碗麵

其實都係＂溢青＂出品，所以黎到大和必要一試，珍貴在於香港買唔到嘛！
 

 

哩個麵都幾好味，而且唔算太咸，當然係＂溢青＂都會有返水準

 

 

哩日係GOLDEN WEEK最後一日，晨早新聞已經報導昨日交通嘅混亂情況

 

公路大塞車

 

 

新幹線滿席，都係因為有見及此，白伽煎先會將行程稍為修改

 

只為唔想响觀光時要同大和人一齊迫

 

難得出門旅行，周圍都要迫要等，咁會相當無癮

 

 

 

白伽煎哩日會响午飯後離開鳴門去下一站：三好市，所以要把握時間觀光

 

 

 

酒店CHECK OUT後，將小行李寄存响FRONT DESK，咁就出發 

 

鳴門觀光景點最出名嘅係＂潮渦＂，其實上年响鳴門都坐船响海中親身睇過

 

講真就唔太吸引，不過反正仲有半日時間，咁都再多啲認識哩個地方

 

 

朝早7點就响車站等巴士，打算趕上7:20嘅巴士去鳴間公園

 

 

 

雖然話日本巴士出晒名準時，不過白伽煎幾次响小市鎮等車，都係出現巴士唔準時嘅情況

 

哩朝早等到7:20都無巴士埋站，過左幾分鐘有一架

 

白伽煎上車，但司機叔叔有好奇怪嘅表情，白伽煎即刻問佢＂係咪去鳴門公園？＂

 

司機叔叔答：唔係！

 

咁白伽煎唯有落車再睇車站時間表

 

 

 

當時有個由巴士落車嘅婆婆好友善咁同白伽煎講：去鳴門公園唔係哩架巴士！

 

白伽煎指俾婆婆睇：明明寫住係7:20嘅巴士.........

 

婆婆繼續好有心咁叫白伽煎再等多陣，應該差唔多到

 

就係咁講講下，另一架巴士埋站，正正就係伯伽煎要上車嘅巴士

 

白伽煎跟婆婆道謝後就上車 

 

鳴門哩個地方，見年長人多過見後生人，可能後生嘅都出晒城市生活

 

老人家遇到其他人需要幫助，又會主動伸出援手哩啲就係小市鎮嘅人情味

 

 

 

 

朝早八點都未到，觀光區渺無人煙咁影相就一流，無人阻住晒要爭靚背影

 

 

 

 

哩個係必影嘅＂到此一遊＂位置

 

 

哩日陽光普照看似風和日麗，其實係大風到有啲寒意

 

捱住凍影左啲靚相

 

 

上年坐船响海上睇潮渦，今次就响大橋上睇

 

香港嘅青馬大橋分幾層有唔同用途，而鳴門哩條大橋，行車線下就係睇潮渦嘅地方

 

 

渦の道係响海中心睇潮渦，營業時間都相當早8:00-19:00

 

雖然預計哩日要10：20先開始有潮渦

 

9點都未夠就走入去，咁咪等好耐先有機會見到潮渦

 

 

 

 

不過實在係太凍，白伽煎諗住渦の道會有室內展覽廳，咁至少可以避下寒風

 

所以二話不說就俾錢入場

 

 

入左場先知自己＂太天真＂，哩度係無室內嘅地方，連一個避風嘅地方都無

 

除左洗手間

 

 

 

要行到海中心位置先係睇潮渦嘅地方，越行越出就越大風越凍

 

 

哩個時候白伽煎已經後悔不已

 

 

 

 

哩啲地台玻璃窗就係可以睇到潮渦，不過時間太早仲未有潮渦

 

 

 

 

本來白伽煎係諗住哩次由大橋位置去睇潮渦，相信會比响船上睇價清楚啲

 

不過真係捱不了凍，逗留左一個鐘已經係極限，唯有下退堂鼓走人

 

 

哩次鳴門嘅觀光都就此結束，其實鳴門仲有其他景點：

 

大鳴門橋架橋記念館，エスカヒル鳴門「渦潮」「大橋」展望施設.....

 

對大橋無乜興趣嘅話就等於好多景點都唔洗去

 

白伽煎下一個節目只係去逛手信店買左啲食物，之後就坐巴士返酒店附近

 

只係大約12分鐘車程，白伽煎都差啲瞓着左

 

鬼咩～哩朝早未夠6點就醒左，其實仲未瞓夠

 

 

哩個造型係鳴門嘅代表阿波踊

 

 

真人版就係哩個造型（網上圖片）

 

 

水渠蓋上嘅都係觀光景點，可見鳴門大橋係最主要嘅景點

 

 

仲有潮渦都係代表鳴門哩個地方

 

 

再响購物中心打發左一陣就返去酒店附近醫肚

 

哩日食嘅係洋食，都係食評網站上評分比較高嘅食店

 

峠のわが家 （トウゲノワガヤ）

 

 

哩間嘅裝修比琴晚食PIZZA嗰間商業化一啲，入到去有個後生男仔招呼白伽煎坐低

 

之後就一舊＂葛＂咁企响白伽煎身邊等寫＂注文＂

 

白伽煎心諗：DEDE，你都俾哩時間人睇下食譜先啦，你好趕咩？

 

白伽煎當然係’打發個DEDE走啦

 

 

 

 

注文左炸魚定食，700日元，超抵食！

 

 

當然係即叫即炸，又係充滿誠意嘅食店

 

 

 

定食仲包括左一杯士多啤梨凍飲，係鮮榨士多啤梨加一大舊冰令佢變為凍飲

 

白伽煎唔太鐘意飲凍野（為身體着想），不過哩杯凍飲就例外

 

 

 

食完一餐飯又再一次覺得响香港大眾化食店食野，好多時都係食＂求其＂

 

食店毫無誠意，只求塞飽客人個肚，客人俾錢走人再黎下一轉

 

咁嘅營商心態真係不要得

 

哩餐只係700日元，去過大和嘅人都計得出700日元可以响大和買到啲乜，做到啲乜

 

但食店就係用心咁做左一餐出黎侍客，哩份誠意點都唔止700日元

响鳴門食左兩餐飯，兩餐都相當讚

 

不過白伽煎係＂奶精＂會為芝士着迷，所以嗰個薄PIZZA仍然係俘虜左白伽煎嘅味覺

 

 

 

 

食完飯就返酒店攞返件小行李，之後就去JR鳴門站，準備去三好市嘅阿波池田站

 

中途响佐古要轉車

 

 

 

14:42先出發，白伽煎早左好多，寧願响車站坐住黎等

 

再見鳴門