2014 日本之旅 DAY 3 @ 鳴門 - 遇上400%的人情味

 

2014年5月5日～星期一，鳴門天氣(下午)：晴
 

 

 
 

 

 

GOLDEN WEEK嘅假期，好多日本人都黎個國內旅遊，美術館就豬籠入水

 

餐廳都迫爆左，排晒隊要等位，鑑於上年食過，MENU又普通得很

 

所以最後決定忍住肚餓，打算响出面食，終於逗留到下午三點幾就離開

 

 

其實白伽煎係帶左啲零食準備隨時醫肚

哩期至愛係＂炸加Ｂ＂，大和版同香港版係唔相同

大家雖然都係國產，大和版係大和製，國產係本地造

兩岸三地同化晒，本地產都隨時有危機

哩個大和版＂炸加Ｂ＂响離開美術館，等巴士時就消化左

 

 

上次黎鳴門，泊宿响德島車站

 

仲記得嗰朝早由德島坐巴士入鳴門，鳴門哩個地方比我想像中荒蕪

 

 

尤其係見到哩個鳴門駅時，和歌山白浜啲車站都係咁上下（舊）款式

 

咁和歌山白浜係鄉下地方喎～

 

 

 哩次為左方便要响鳴門觀光，而且下一個目的地就係坐JR去三好市

無需刻意泊宿德島駅，所以選擇泊宿响鳴門，酒店响車站附近

由美術館坐巴士大約15分鐘就到鳴門駅

 

 

 

去酒店放低行李後諗住去食LATE LUNCH，不過時間只係４點幾

 

心儀嘅食店中場休息，要５點半先到晚市嘅營業時間

 

咁唯有忍多陣，行下街先

 

 

由車站行12分鐘左右，有幾間大型商場，超市，連藥局都咁大間

 

 

超市＋百貨公司＋食店

 

不過响鳴門哩度，便利店就少之又少，白伽煎出沒嘅地方就只見過一間

 

 

哩度有間MR. DONUT，白伽煎走左入去買雪糕夾心餅

 

 

 

之所以會買黎食，係因為王貽興响專欄上曾經推介過，仲讚不絕口，又滑又重奶味

 

咁白伽煎又有乜評價呢？

 

 

最大感覺係：好冰凍，好好好冰凍

 

買左返黎可以等回暖一陣先食，咁應該會無咁冷冰冰

 

 

 

 

至於王先生所講嘅又滑又重奶味白伽煎都會認同

 

但係對成日响大和食洋菓子，又自稱係＂奶精＂嘅白伽煎黎講

 

對於日本嘅奶品類係香濃而且滑，係早知嘅事，所以都唔會有乜驚喜可言

 

王先生可能唔算醉心於大和嘅洋菓子甜品，奶品，所以食到哩個已經讚不絕口

 

 

 

 

遊盪到接近6點，肚餓難耐，終於可以醫肚

 

白伽煎每次去大和旅行都會花好多時間揾食店

 

已經唔信旅遊天書嘅線稿，寧願去日本食評網站睇食評分數

 

 

哩次响鳴門，泊宿酒店嘅附近得分較高而價錢又合符白伽煎嘅荷包嘅，就係哩間洋食店

 

ビストロワン（BISTRO 。1)，食評網站評分為3.18（滿分係5）

 

 

 

哩間食店大致上係年中無休，只休新年同特別日子

 

老闆就係以下相片中哩埋一角嘅男人

 

 

下面相片中哩個係＂奧様＂，又即係老闆娘

 

哩間食店嘅裝修格局，令人好似時光倒流十幾二十年咁樣

 

完全係家族經營嘅小店

 

 

白伽煎係哩場第一個食客，一坐低，健談嘅老闆已經主動打開話題

 

 

佢話：今早仲落兩，宜家就咁好天氣　

 

白伽煎响哩個時候都表明自己嘅日文程度低，而且係外地人

 

老闆再問白伽煎係邊度人？。。。。答：從香港來的

 

世事就係咁巧合，老闆其中一個女兒去左香港做野幾個月

 

 

 

老闆問白伽煎睇唔睇得明餐牌，白伽煎答佢：睇得明

 

其實洋食店嘅餐牌好多都用片假名，哩啲用日語發音嘅外語譯音真係會估死人

 

至於白伽煎睇兩眼就可以＂注文＂，其實只係一早响食評網站睇左食客嘅推介

 

咁老闆就當白伽煎閱讀能力比聽／講能力高

 

完全係一個白伽煎都無能力去解釋嘅誤會

 

 

 

PIZZA同650日元嘅SOUP都係被推介嘅食物，不過哩日就無SOUP

 

咁唯有改食SALAD，其實食物款式唔太多，不過咁樣反而係做到更加專長

 

佢地仲係一間食STEAK嘅食店

 

 

  

　

 

先黎係沙律，紅噹噹嘅蕃茄點會响香港普通嘅食肆食得到

 

黎到大和係食國產貨，响香港就多數都係祖國產貨（＝食得不安心）

 

仲有食店自行混合嘅沙律汁，只係用心做好食物嘅誠意已經有滿分

 

香港普通餐廳只係俾現成沙律醬汁，絕對只係敷衍食客

 

 

 

 

 

食完沙律再等左20分鐘先有哩個PIZZA，要等咁耐因為係即叫即做

 

 

 

哩個係薄批，白伽煎响香港從來唔食薄批，只因為厚批好食過薄批

 

之但係哩次响鳴門食過哩個薄批後，佢已經俘虜左白伽煎嘅心

 

原來薄批都可以好好好好好味道

 

 

 

哩個PIZZA只係有蕃茄，芝士，同切到半透明嘅煙肉

 

材料相當平實普通，但實際一啲都唔普通芝士嘅份量係相當重手

 

比起香港嗰啲普通食肆，PIZZA外圍必定留一條粗粗嘅邊，咁就可以用少啲材料

 

哩個芝士份量相當多，所以其實食半個已經飽，不過咁有誠意嘅製成品

 

再飽都要食晒佢

 

 

 

哩間食店係全個行程中，最能俘虜我心嘅一間，係第一位

 

食完之後，白伽煎將佢同香港嘅普通食店相比較

 

白伽煎當堂覺得香港嗰啲只為塞滿客人個肚，製作毫無誠意，只係有誠意收錢

 

之後返到香港就更加唔想俾嗰啲收費貴少少，只係裝修／餐具扮到高級少少

 

但對於食材做法係絕對無誠意嘅食店＂昆錢＂

 

白伽煎從來都欣賞內在美多於外在美，食野並唔係為左食裝修

 

因為無真材實料先要搞花臣去轉移視線，哩個係鐵論

 

 

 

追伸：

 

食到中途黎左一對熟客，男嘅必定過50歲，女嘅看似細男嘅5年左右

 

健談嘅老闆講講下就指住白伽煎話：嗰邊嘅姐姐由香港黎日本觀光，仲係一個人添！

 

兩位食客即時對白伽煎好有興趣，問老闆：佢識日文架？

 

老闆答佢：佢識睇，但講就差啲。

 

 

 

每次响大和同當地人閒聊時，佢地一知道白伽煎係一個人去日本觀光

 

不約而同大家都投以不可思議嘅眼光

 

其實大和人嘅民族性會聯群結黨，响大和做＂獨家村＂好多時都會俾人夾埋黎杯葛

 

所以對於一個外地女子夠膽獨闖到哩啲唔熱門嘅旅遊地方，佢地都相當好奇

 

哩兩個人知道白伽煎嘅日語聽／講只係麻麻，佢地就刻意講慢啲同簡單啲

 

咁大家都傾到幾句，都仲係個女子比較多野講

 

不過交談中最到肉嘅一個問題係由個大叔發問

 

佢問：姐姐，你有無男朋友？點解會一個人黎日本旅行？

 

當然係用聰明智慧黎答佢嘅問題啦，哩個時候白伽煎係代表＂香港女性＂發言

 

 

 

 

更經典嘅係佢仲問白伽煎幾多歲？

 

白伽煎嘅日語雖然只係考到N3合格嘅低程度

 

不過有啲詞語就學識左要過目不忘，隨時用黎旁身

 

其中一個不能不識嘅詞語係：內緒！（即係秘密）

 

當白伽煎對大叔嘅問題拋下哩個答案時，全場四人即時大笑

 

 

白伽煎當時心諗：咪以為我啲日文得半桶水就以為我會傻到任你擺佈先得架！

 

 

哈～哈不要睇少港女，尤其係嗰D膽生毛鐘意獨行嘅港女

 

話晒都單人匹馬行走過大和幾年啦！

 

 

一個女子離開大和嘅城市去到哩啲小城鎮就係為左想遇到哩啲人情味

 

本來唔相識嘅人，大家無需知道大家嘅背景／姓名／職業

 

只係簡單嘅問候交談都會顯得窩心

 

大城市嘅爾虞我詐，對陌生人嘅提防，作為一個來自大城市嘅人

 

响哩啲地方終於可以鬆下來，慢慢地欣賞哩份簡單嘅＂真＂

 

 

離開餐廳時，老闆娘問白伽煎响邊度泊宿

 

之後四個人都叮囑白伽煎一個人在路上要小心

 

雖然只係門面說話，但依然係窩心嘅旅行回憶

 

 

最後白伽煎回應了大家：皆にあって、楽しがったです

 

（遇到大家實在是太開心了！）