2013 日本之旅 DAY 3 @ 高松 - 最讚...岐烏冬

 

2013年6月15日,星期六 (晚上), 高松天氣 






等巴士由大塚國際美術館返德島駅時,天公仍然不造美,雨仲越落越大

但幸運地响1小時車程返到徳島駅就停雨






落車後仲有小小時間,所以逛左車站附近即將結業嘅商場-大割引




哩日中,友人表現最元氣就係哩個時候

雖然只有大半個小時SHOPPING,友人仍然可以買到心頭好

隨後返酒店攞行李,再行出徳島駅等高速巴士








下一個目的地:香川縣高松

車程大約90分鐘,中途不作停站休息

幸運地,預約左泊宿嘅東橫INN就响巴士站前

見到高速巴士即將經過東橫INN門前,即刻襟鐘提早一個車站落車

咁就慳返由高松駅步行8分鐘嘅路程



响酒店CHECK-IN後就去食晚飯,黎到香川縣,有白加煎最愛,最期待嘅地道美食

哩篇BLOG全篇只講哩晚嘅烏冬,可想而知哩碗烏冬非同凡响


日本最出名嘅烏冬,聞名海外嘅有讚岐烏冬,稻庭烏冬

而讚岐烏冬正正就係香川縣嘅代表食品

日本烏冬冷知識
1200年前,日本派唐外交使節弘法大師空海,將中國嘅做麵技術帶返日本

响家鄉讚岐(即係現時嘅香川縣)發揚光大

香川縣因為雨水少,陽光多,不利種植稻米,但就有利於製造烏冬嘅材料-小麥生長

所以烏冬慢慢成為當地人嘅主要食糧

香川縣係全日本面積最細嘅縣,但全縣有接近1000間烏冬店

當地人每人每年平均食超過200個烏冬麵餅

食量,產量都係全國之冠

根據日本農林水產省對烏冬有嚴格嘅標準規定

烏冬要用小麥+水+鹽混合做成麵糰,麵條闊度要有1.7mm以上

厚度介乎1mm至3.8mm




香川縣於2011年10月,由香川縣出身嘅藝人:要潤

代表出任:うどん県副知仕-香川縣改名為烏冬縣

烏冬的確係香川縣人嘅"自慢名物"






計劃行程時,知道可以一嘗讚岐烏冬,白加煎已經好努力咁備課




白加煎對手打烏冬嘅愛慕之情黎自2006年响倉敷賞紅葉

詳文請看: 


2012年一人黑仔之旅 DAY 10 @倉敷(飯借& 一番咖哩)2012年一人黑仔之旅 DAY 11 @ 倉敷 (平凡美)


倉敷位於岡山,香川同岡山只係瀨戶內海之隔

所以能夠响倉敷食到美味手打烏冬都唔係難事

不過今次去到香川,就唔再係揾二奶做愛的替身,當然要一嚐正印嘅功力

實在相當期待




出發前响食評網站揾口碑好嘅食店

而通常哩啲口碑好嘅食店,好多都係規模細小嘅老店

因為烏冬要人手打,所以每日都只能限量咁做生意,賣晒就收舖

幾經努力先揾到一間做夜市,而且比較近酒店,不過都要徒步10分鐘



白加煎一向都會好保險咁事先下載或者列印目的地嘅地圖,店舖相片

累積咁多次獨闖日本無迷路嘅經驗

白加煎甚至會跟地圖指示數交通燈位,通常都唔會出錯

不過以往一個人可以自把自為獨來獨往,即使行錯路都只係嘥自己腳骨力

但當身邊有個唔捱得苦,唔攰得嘅同行人



白加煎就唔敢好似獨行時咁亂闖,要確定無誤先敢去做

而且仲唔可以太霸道,表現得自己一定啱晒而操控別人跟從



到時真係行錯路,豈不是好瘀,而且要尊重同行人嘅感受

問下對方意見,令對方覺得被重視,唔係被專橫操控,服從指令



所以哩晚步出酒店,响黑暗嘅大街角企左兩個女子响度睇地圖,認方向

突然眼前出現"天才神探伽利略A貨" 




有個靚後生仔主動協助問白加煎二人打算去邊度?

白加煎用日文回答,對方應該一聽就聽得出白加煎講嘅係外地人日語

伽利略隨即轉台用英文(其實佢可以繼續講日文)

 佢又知英文可以成為大家共通語言?

果然係伽利略A貨~有智慧又幾好樣,仲勇於挑戰自己嘅語言能力

佢講英文應該同正版伽利略差唔多

但佢都好努力咁用手勢搭夠

友人仲留意到伽利略身上掛住職員牌

陰功~帥哥响星期六夜晚仲要當值無得外蒲,嘥左啲喎!



哩啲地方嘅人就係比東京嘅人友善親切

作為一個生活响香港大城市嘅人

白加煎都極少會主動提出幫人揾路,可能大城市嘅人就係會提防身邊有壞人



當白加煎反感東京人嘅冷漠態度時,其實同樣係反感自己




經過伽利略嘅指示,當然未能即時得到正確指示如何去到食店

但至少佢都指示左一個正確嘅方向,哩個搜尋行動終於再花多7分鐘左右就完成



皆因為白加煎睇地圖,發現食店附近有路面電車,而當時响黑夜中

遠遠就見到有一列路面電車經過

累積左咁多單人匹馬獨闖日本嘅經驗,白加煎對於揾陌生地方都有啲自信心

但需要時間+冷靜唔好心急 响哩啲條件下都應該唔會迷路








香川縣最出名嘅係讚岐烏冬,既然係名物,白加煎都會要求高啲

能夠被挑選嘅食店,評分必需响3.5分或以上,終於揀左哩間


店名: 手打ちうどん 鶴丸
食評網站評分: 3.56 (滿分為5分)






(以下部份為網絡圖片)

食店由20:00開始營業至03:00,全店50席,設樓上座




樓下嘅店舖,麻雀雖小,五臟俱全,人流不絕











哩個係孕育手打烏冬嘅"產房"

搓麵師為每條烏冬麵條注入生命,哩個都係搓麵師傅嘅舞台





白加煎响倉敷第一次食手打烏冬係濃汁咖喱烏冬

只係嗰個"杰撻撻"嘅咖喱汁,往後幾年都無法响日本再遇上

嗰個濃度只係比日式咖喱飯嘅咖喱汁稀少少,口感相當RICH




所以白加煎當然希望再度重遇"杰撻撻"咖喱汁嘅烏冬

所以就注文咖喱烏冬,盛惠700 YEN








黎到嘅時候就係哩碗,睇個樣都似係"杰撻撻"咖喱汁




每條麵條都沾上"杰撻撻"嘅咖哩汁





食後感:

以前睇卡通片"伙頭智多星"主角味吉陽一嘅美食會令人感動到流淚





哩次白加煎都有哩份感覺,"杰撻撻"嘅咖喱汁,彈牙嘅烏冬好似有生命咁

青春年輕有足夠運動,肌肉先會有彈力,烏冬都一樣,師傳嘅技巧要恰到好處

哩碗係白加煎暫時有生以來食過最好味嘅烏冬




都係哩個行程中食過最心花怒放嘅一餐

好味嘅食品唔一定要貴,700 YEN都可以令人有意外驚喜

佢嘅珍貴唔在於佢罕有,而係背後人嘅努力為佢添上靈魂



食店有手信,750 YEN(3人前)





白加煎當時都諗過唔嫌重買一盒返香港

不過當諗到煮麵都需要技巧,而且麵糰搓好後要趁新鮮煮食,咁先會食到精髓

所以最後都無買到,以免破壞左白加煎對讚岐烏冬嘅愛慕之情



揾食店時,同行友人係沉默無話題,兩個相識嘅人只係間中有一兩句交流

哩次好彩好快揾到食店,並無白行冤枉路

當食到好野時,友人就好似即時上左鏈咁元氣




哩晚晚餐只係700 YEN,實在太抵食,而且份量啱啱好

所以跟住就可以有甜品時間





哩枝乳酪飲品係白加煎最愛嘅乳品類

圖中哩個細SIZE,响日本便利店嘅售價大約係170YEN


香港都買到,不過售價令人咋舌(貴左接近2倍),唯有去到日本先可以飲得豪

後記

哩晚返到酒店休息,友人將行李喼放上梳妝櫈上

白加煎即時發現到其中一個轆最外層嘅薄膠帶已經不存在


咁咪等同如"長短腳",難怪友人一直推行李都唔順暢

行李喼都未裝滿,但搬動時已經好似擔泥咁吃力

當然友人一直都唔發現行李喼嘅膠帶問題,所以先會帶出門

但即使當時發現行李喼殘癈左,友人都若無其事一樣

完全無擔心哩個殘癈行李喼係咪可以配合佢即將要瘋狂購物嘅行動?


白加煎又要再次承認

世上奇人怪事何其多,只在乎大家古怪嘅野唔相同



白加煎繼續履行自己嘅承諾:唔影响到自己嘅事就不加任何意見


不過半殘癈嘅行李喼要配合一個有購物狂嘅主人

行李喼係咪仍然可以飾演沉默小角色,為主人提供恰如其份嘅服務?

哩個行李喼响行程嘅下半部,終於由一個沉默小角色榮升為"主角"

戲份越黎越重就等如白加煎嘅氣憤都越黎越多