旅。夢。人生: 2013 日本之旅 DAY 4 @ 大阪

2013年6月16日,星期日 (晚上), 大阪天氣

食完烏冬就要趕上船

買船票時,車已經駛上船,即係代表船都準備就快開出

碼頭入口處

响小豆島嘅行程係不走回頭路,由土庄港入,草壁港出

船票一樣係690 YEN,船程都係大約60分鐘

船駛離草壁港返高松,而哩次行程都即將返大阪,之後又即將結束返香港

哩次行程最後一次坐船,都要參觀一下船上設施

貴賓廳?不過都係自由席

小食部

兒童遊樂室

甲板上睇風景

大約60分鐘船程,見到哩個高松燈塔嘅地標就知道即將落船

早上9點坐船去觀光,下晝2點半返到高松,結束一日觀光行程

跟住係返酒店攞行李,準備坐高速巴士返大阪

高速巴士嘅車票,响第一日到埗白浜時,已經向LAWSON確認+付款

由高松駅步行返酒店大約要8分鐘,來回即係16分鐘

每當要推行李時,友人又會再度沉默,可能因為攰

白加煎看在眼裡,心諗:

自由行就預左要推行李架啦,你唔係唔知道呱?!

去到高松駅,高速巴士站都有好多巴士路線

為免等錯車站,攞住車票去問車站職員到底係邊個車站上車

同一個巴士站,每5分鐘就開走一班車,真係相當頻密

白加煎坐15:30出發嘅巴士去難波

顯示板上有齊日文,英文,韓文,中文(繁體+簡體)

哩日係星期日,坐高速巴士嘅人都相當多

15:30由高松開出,預計18:55到大阪難波,中途休息站只有一個

不過哩日塞車,高速巴士過左鳴門橋,駛到淡路島,未到神戶已經塞車

結果去到難波大約係19:15

哩晚發生左令白加煎最氣頂嘅事

友人因為太攰而輕微發爛渣

太攰嘅原因係黎自友人嗰個半殘癈行李喼

巴士到難波尾站大約係19:15,再次返到OCAT,到埗當日都係响OCAT上巴士去白浜

哩次係白加煎第一次泊宿難波,雖然對難波都有啲街道概念

但不至於識得响OCAT揀啱最近出口行去酒店

咁唯有撞彩數咁出,出到去天都黑晒,又唔係好認得路

白加煎一個人出門時係會是但撞下行下,不過哩次同行友人唔捱得,唔攰得

所以白加煎唔肯定嘅路都唔敢叫友人試行,唯有問附近商店嘅人,東橫INN响邊?

對方指示直行就到,大約5分鐘,睇地圖指示要經過兩個大交通燈位

白加煎記得東橫INN嘅預訂網頁上寫左,由OCAT去東橫大約要徒步10分鐘

友人全程不發言,終於行到第二個交通燈位

白加煎手上嘅東橫INN地圖都指示左要過埋哩個交通燈位

哩個時候友人開始小發爛渣,小吵小鬧咁講左一堆說話:

係咪行錯呀?.....似係行錯喎,都唔見有......
咁遠........唔得喇...........
回程嗰日都係咁樣返OCAT上巴士,咁遠~唔得喇........
乜你訂間酒店咁遠........

友人不斷重複以上嘅說話

白加煎忍住把火

只係心諗(無講出口):

哩的係咪埋怨說話?
自由行係咁架啦,唔想推行李就跟旅行團啦!
坐左4個鐘頭高速巴士都休息夠啦,一推行李就發爛渣!
酒店距離車站10分鐘都話遠?咁不如索性住機場附近啦!
香港人去赤鱲角機場,車站都未必喺正屋企樓下架啦,邊個唔係推行李去車站坐車架啫?
你有專車接送來往赤鱲角機場,咁你帶埋你個私人司機黎啦,得佢先可以操控你唔會發爛渣
邊個叫你推個殘癈行李喼黎旅行?!根本就係自己攞黎辛苦,仲怨人!
邊個叫你未返到大阪就已經買到爆晒?!
自己無能力搬返香港就唔好買咁多!

其實當時白加煎都好嬲,只不過係死忍唔發火