以往友人睇白加煎寫BLOG,回應寫到都好想去日本大擦一餐
(以下係友人嘅舊留言)
白加煎又太相信哩啲係出自友人嘅心底話,但又忘記左友人係唔捱得苦
白加煎諗住返到大阪後就同友人四處揾美食
不過哩次白加煎觀察所得,如果需要徒步,要花時間揾先食到好野
友人係寧願唔食哩啲好野,求其醫肚就算
為乜白加煎咁講?
哩晚由酒店行到哩間被高度評分嘅大魚子店,徒步都要20分鐘
去哩間食店就一定唔會迷路,白加煎認得路點去
不過徒步哩20分鐘,友人又係異常地沉默,應該係攰
而白加煎都忘記左,友人唔特別鐘意食大魚子
即使哩間有極新鮮大魚子,其實都唔係友人杯茶
去到注文時,哩個季節有海胆供應,咁都好啲,友人鐘意食海胆
本來白加煎一心諗住食最大份量嘅大魚子,不過黎到見到有海胆,咁就叫左個海胆大魚子丼
海胆同大魚子都係最愛
哩間食店啲大魚子真係要讚,口感同其他食店嗰啲係有唔同
而後面嗰件蒟蒻就唔得,倒任何調味枓同食都係無味嘅,食唔慣!
食飽飽埋單時,老闆開口問白加煎係黎自邊度?
白加煎答:香港から!
友人隨即讚老闆啲魚生丼おいしい!
(おいしかった!!!)哩次黎日本,白加煎終於無再講自己係中國の香港
宜家全球蝗禍蔓延,真係唔想認自己同中國有關
離開食店行一陣,見到哩個燈箱
相中いちご同張柏芝嘅相似度係99.9%
唔通有人跟住張柏芝個樣黎整容?還是真人係會"貨不對辦"?
食完晚飯係把握SHOPPING時間
心齋橋都仲有舖頭營業中,只要有得SHOPPING,友人就會將之前發生過嘅事忘記晒
購物對某啲人黎講係最好嘅良藥
雖然行程即將結束
不過白加煎仍然係忍唔住要再買哩個响香港買,價錢係咋舌嘅乳酸奶
哩個500ML只係400 YEN,响香港買就要$7x
實在係為佢鐘情
最多朝早一杯,瞓前又一杯!後記
哩晚友人响心齋橋藥局都已經把握時間掃貨
返到酒店白加煎見到友人整理緊個殘廢行李喼
啱啱返到大阪都未正式SHOPPING,友人個殘廢喼已經塞爆中
當時白加煎個行李喼係連一半都未滿
事實上哩次只係去6日,又係夏天,白加煎嘅隨身品都好少,最重嘅都只係單鏡相機啫!
友人呻緊殘癈行李喼已經塞爆左,白加煎响哩個時候可以扮睇唔到咩?
當時實在做唔出唔理佢,結伴同行就係要互相照顧,只怪自己結錯伴架啫!
哩晚友人向白加煎提出,回程時嘅行李係更多更重
酒店距離OCAT咁遠(其實只係徒步10分鐘),只係搬行李去OCAT上巴士都搞唔掂
白加煎心諗(只係心諗):
邊個叫你帶個殘癈行李出門啫
哩啲咪係你自己攞苦黎辛囉!最後,大家唯有考慮由難波東橫INN坐的士去OCAT代替徒步哩10分鐘
酒店職員話:咁短路程,的士唔會跳錶,咁就係600YEN
以下係參考圖片
哩次友人帶去日本準備瘋狂購物嘅行李喼,size大約係上圖左邊哩個61 cm
當然唔係相片中嘅咁靚仔,相反係殘廢左
而白加煎咁多次去日本,無論逗留日子係6日,還是17日
仍然係同一個旅行喼,size大約係相片中嘅67 cm行李喼
其實白加煎實在不能理解,為乜友人一心準備去瘋狂掃貨返黎送贈親友
實行"豪俾你啦!"
但就唔準備一個合適嘅行李喼,哩件事真係相當唔合邏輯
不過一直白加煎都無出聲,又係無謂多口
友人都知道自己個喼已經塞爆,問白加煎借左個大Nike袋
行李喼塞唔晒,就要諗塞手提上機嗰個行李
當時白加煎好想問友人:
有無考慮過响日本睇下啲行李喼,反正哩個都殘廢左,帶返香港都係做垃圾
不過白加煎當時諗左都無講
又係無謂多意見只係返到香港後,友人終於都嫌棄個殘癈喼,話要買新喼
白加煎先重提哩件事向友人講:
本來我嗰陣有諗過提議你响日本買新喼
誰知友人仲未知全個行程為個殘癈喼已經辣着左白加煎把火
仲相當得戚咁答:
就算當時你叫我响日本買行李喼,我都唔會買
除非哩個行李喼响途中爛左就無得講,一定要買新
我對行李喼都有要求!
白加煎最嬲係聽到友人講最後嗰句
對行李喼有要求?????!!!!!
如果有要求就唔應該帶個殘癈喼去日本掃貨!
個喼唔好拉就發人脾氣
結果仲要我出手幫忙抬左2.6 KG返香港
咁叫做有要求呀?!
係對行李喼有要求?還是對朋友有要求呀?
返到香港聽到友人講啲咁嘅說話,真係仲扯火!
兩次同友人去日本旅行,兩次白加煎都要幫佢負担幾kg戰利品
如果自己抬唔到就唔好買,一人做事唔係一人當架咩?
白加煎咁樣幫佢只係縱容緊友人繼續無責任心
都話一出門去旅行,就好容易睇到同行人嘅真面目
沒有留言:
張貼留言