2013年6月15日,星期六 (上午), 德島天氣
6日行程响哩日終於都落雨,其實白加煎從來未試過去日本係全程都天公造美
哩次只係6日行程都唔例外,仍然係有雨天
不過算係好彩,哩日嘅行程比較多室內活動,所以影响都算小
一早响東橫INN食完早餐就出發,哩個時候仲未落雨
前一晚到埗時係黑夜,朝早行出徳島駅時,發覺徳島比想像中繁榮
總係覺得四國係鄉村地方
去到巴士總站又係要買定傍晚時嘅高速車票
不過巴士總站哩度啲售票處就有啲混亂
,各間高速巴士公司都有售票處
白加煎一面迷惘之時,身邊有個吸緊煙嘅休班巴士司機
主動協助佢指示左去邊度買票,不過白加煎啲日語程度低,唔係完全聽得明
亂撞咁揾售票處,但原來哩個司機叔叔嘅目光一直都跟踪住哩兩個"外地人"
當友人回望哩個司機叔叔時,司機叔叔相隔10幾米距離,指手劃腳咁再指示
遇上一個好心人
高速巴士車票原價係1600 YEN(大人),但休日特割
如果由徳島駅前上車去高松駅,只係1000 YEN,哩個優惠只限頭站搭到尾站
黎德島嘅目的係去鳴門,徳島駅嘅繁盛令白加煎感到意外
而鳴門嘅荒蕪都係白加煎始料不及
(以下係網絡圖片) 哩個車站有點時光倒流20年嘅感覺
鳴門無乜高樓大廈,人唔多,車又唔多,交通疏落
由德島駅坐巴士去鳴門觀光區,每1小時一班巴士
車程大約75分鐘
响鳴門觀光最有名嘅應該係潮渦
鳴門觀潮船
哩日朝早時,天氣尚可,出海睇潮渦時仲未落雨
睇潮渦係有時間,哩日潮渦高峰時間係10:20 或者16:20
高峰時間前後90分鐘都係睇潮渦嘅好時機
白加煎同友人落左巴士就啱啱趕到10:20嘅船
仲係最後上船嘅乘客
哩個觀潮活動大約係20分鐘,盛惠1530 YEN
開船~
人人都係黎睇潮渦,所有座位係都無人坐
响四國,總共有三條大橋駁通日本本洲
第一條大橋係由神戶經淡路島連結德島縣鳴門神戶嘅明石海峽大橋
大橋只有自動車道
第二條大橋係連結岡山縣早島跟香川縣坂出市 嘅瀨戶中央自動車道
只有哩一條大橋係有JR列車行駛
第三條大橋係連結廣島縣尾道市與愛媛縣今治市嘅西瀨戶自動車道
自行車,行人都可以通行
哩條大橋可以踏單車觀賞瀨戶內海嘅景色
安排行程時,友人知道其中一個景點係鳴門大橋
友人問:咪同青馬大橋一樣,有乜好睇?
(友人嘅日常生活係天天都見到青馬大橋)
白加煎答: 順路觀光,去到邊咪睇下當地有乜特式,咁青馬大橋下都無潮渦啫!
睇天然景象真係要講運氣,哩日雖然未落雨,又夾啱潮渦最強嘅時間
但係眼見到嘅潮渦並唔壯觀,仲有哩零碎
情況同响白浜睇"円月島"一樣
係就係睇到,但唔係最完美嘅景像,世事確實係好難有完美
可能因為災難片,卡通片影响
印象中當船遇上潮渦,好似會被捲入海中,九死一生咁恐怖
睇潮渦前都有諗過哩個活動有無危險性
不過親眼見過之後,對潮渦嘅感覺改變左
哩度嘅潮渦好似只係用匙羮搞奶茶咁樣捲起一個小潮渦
而且好快就被四周嘅海水打散
哩條外觀同青馬大橋相似嘅鳴門橋,其實內裡無青馬大橋咁設計完善
香港嘅青馬大橋有露天行車線,惡劣天氣下開放嘅有蓋行車線,仲有鐵路
鳴門哩條大橋只設汽車行走橋面,橋嘅內部係"渦の道",都係觀潮嘅景點
借用網絡短片
以下係網絡圖片
沒有留言:
張貼留言