2013年6月16日,星期日 (早上), 小豆島天氣
到埗高松時係晚上,又係星期六,夜晚出外食晚飯時覺得附近商店街食肆都好熱鬧
但白天睇真酒店附近嘅環境,原來相當寧靜
瀨戶內海上,最大嘅島係淡路島,其次係有"瀨戶內海上的真珠"之稱嘅小豆島
哩日去小豆島當然坐渡輪
响小豆島上分別有6個碼頭分散响東-南-西-北
土庄港,池田港,草壁港,坂手港,福田港,大部港
每個碼頭為唔同地區提供交通接駁嘅服務
高松碼頭有唔同時間嘅航班去土庄港,池田港,草壁港,坂手港
哩次白加煎選擇不走回頭路,响土庄港上船,之後由草壁港返高松
哩日下昼要坐高速巴士返大阪,所以响小豆島唯有做快閃黨
小豆島人口約三萬幾人,盛產素麵、醬油、佃煮、胡麻油、橄欖
島上有小豆島橄欖樹公園,橄欖成為左小豆島嘅標記
連渡輪都以OLIVE LINE為宣傳
渡輪同樣都係下層係載車,上層載人
哩日係星期日,所以好多一家人去觀光,仲遇上黎自台南嘅旅行團
台灣人觀光地區嘅選擇比香港人有深度
雖然近年香港鴨仔團已經開拓左多啲比較冷間嘅地區
但四國哩啲小島,暫時仍然係要自由行
不過自從白加煎離開左和歌山後,响四國完全無聽見過廣東話
四國仍然未係香港人杯茶
船程大約60分鐘,所以船上設施無和歌上去徳島渡輪咁完善
小食部
瀨戶內產嘅名物有藻塩,其實都幾吸引
不過當聯想到福島核電對外污染,連鄰國都抗議日本防災不力時
哩啲咁地道嘅手信會令人卻步,即使買嘅人唔怕,都要慎防收禮人會怕
船開出,响高松哩個紅色嘅燈塔係地標
哩日天氣太太太....好,猛烈陽光下只能見到一個黑影
白加煎遊日經驗所得,日本天氣經常變幻莫測,晴,陰,雨天不時交錯出現
但一般正常情況下,陰雨天氣都唔似香港咁隨時維持10日,8日
前一日响徳島沒完沒止嘅雨水,哩日隔離縣已經完全放晴,見到藍天
紫外光仲極高
一小時航程就到左土庄港
時間緊迫,落左船第一時間揾巴士站
去到巴士站問司機係咪啱路,無端端俾佢點返去碼頭
去到碼頭問職員,佢地又點白加煎去返之前個巴士站,乜事呀?!
返去同司機叔叔講要去"天使の道"(當時白加煎係講哩個發音:てんしのみち）
佢諗左3秒就晃然大悟咁講: エンジェルロード(ANGEL ROAD)ですか?
無發現哩個天使之路係用片假名為名稱添
白加煎聽到ANGEL ROAD哩個英文譯音就示意: 係!就係想去嗰度
只係幾分鐘車程,去到土庄本町就落車徒步去
落車時,友善嘅司機叔叔仲繼續指示接下來要走嘅路
後面8個日本人等落車,當中有啲都一定係去天使之路
エンジェルロード(ANGEL ROAD)係戀人聖地
傳說中,同生命中重要嘅人,只要手拖手走過天使之路,咁就會心願成真
其實哩個解釋都相當廣泛
由日文,英文,中文都睇唔到所指嘅重要人物係情人,都無表達過心願成真係長相廝守
生命中重要嘅人可以係結伴嘅賭徒,心願可以係响賭場贏1億美金
落左巴士,白加煎同友人故意行慢幾步,既然唔識路,最好都係跟人行
前面係一對30歲以下嘅男女,落巴士後就過馬路,再沿住條明河一直行
去到路口轉右再一直行
去到盡頭
以上兩段路合共大約要步行18分鐘
响前面嗰對男女,無任何戀人嘅舉動(例如拖手)
只係好似普通同事或者係投契啲嘅異性朋友,兩個人說說笑,行行路
白加煎當時仲諗:唔係情侶都去天使之路?!
唔通係仲未到達拍拖階段嘅人?即係仍在摸索中
白加煎就覺得,同啲尚未確認情侶身份嘅人去哩啲戀人聖地
隨時會出現反效果,就正如戒指唔係隨便送俾人,承諾唔係隨意做嘅事
白加煎同友人行响背後肆無忌憚咁討論前面哩對男女
行行下就去到最接近エンジェルロード(ANGEL ROAD)嘅小豆島國際酒店
哩度係分义路,去酒店行右,去エンジェルロード(ANGEL ROAD)要行左邊
當白加煎以為前面哩對男女係去エンジェルロード(ANGEL ROAD)時
哩個時候,兩個人突然拖手,跟住向酒店方向行去
完全係爆冷兩個人徒步行左大約20分鐘,完全無任何情侶嘅行動
但即將去到酒店先表露真正嘅情侶身份
白加煎累積對日本嘅興趣,响電視,書本,甚至當地人妻嘅網誌中
發現到日本嘅戀愛/婚姻模式,同被西方文化影响嘅香港係相當唔同
日本女性嗜啤酒,有時飲大左,醒左時先發現自己同另一個唔相熟嘅男人同床
驚嚇一陣之後,就可以若無其事咁趕返工,當之前一晚只係醉後撞鬼
佢地看似相當開放,但又奇怪地佢地即使係情人見面/約會又未必會拖手
香港嘅情況似乎同佢地相反
就算老夫老妻仲會拖手嘅都大有人在,拍拖時拖手係指定動作啦
唔止拖手,响香港隨街都見到人拍拖响公眾地方攬攬鍚鍚黎示眾
但日本就比較少見啲
婚後一段時間嘅日本夫妻,甚至好似昇華到一個神交嘅境界
丈夫只顧埋頭賺錢養家,太太全副心機放响仔女身上
慢慢地兩個人雖是夫妻關係,同住一屋有如兄弟姐妹一樣
身邊如果有朋友夫妻結婚10年8載,但都仲會偶然攬攬鍚鍚
啲日本人妻中就會震驚+妒忌得哇聲四起
哩啲真係各地文化嘅差異有次睇日本女性漫畫書,作者出版左一本關於佢離婚生活嘅漫畫
離婚原因係已經35歲嘅作者想生BB,無奈結婚兩年,丈夫都唔積極配合
其中有一段漫畫相當搞笑
作者向丈夫提出離婚,丈夫問點解?
作者坦白講想生BB,再講落去原來佢地已經好耐無做過有可能有BB嘅事
丈夫仲理直氣壯咁回答:哩啲事,結婚前咪做左好多囉!
實在搞笑
但都反影到响傳統日本人心中結婚好似感情昇華至神交境界,再無需維持拍拖時嘅親蜜關係
當然哩個情況唔可以代表全日本,但至少都反影左為數不少嘅日本夫婦
如果夫妻中有一個係外地人,咁情況可能會比兩夫妻同是日本人為好
兩個異地人相戀,必先要接納對方成長嘅文化背景
有時啲事,只要其中一方會主動啲
另一方就會接受配合咁就容易啲响婚後仍然繼續拍拖時嘅温馨感覺
祝福想嫁去做大和媳婦嘅女子,GOOD LUCK!
沒有留言:
張貼留言