好耐無遇到咁值得寫嘅"地球怪獸"話題
話說哩幾個月黎白加煎响職場重新執"好"位
因為年事不輕,所以要求新工作要安穩,長做長有,人仕關係唔太複雜
暫時仲未執到好位,爛櫈就遇過幾張,其實只係互相配對上不合啫!
當然現今社會,無乜鬥心嘅人多的是,白加煎都歸納為其中一人
人人都想返5日工,大假多,工作量輕鬆,人工嘅考慮反而可以後於以上嘅條件
人人都嫌錢腥咁喎
哩次轉工跳糟,白加煎都有機會大開眼界,見左16份工,遇上兩個職場女惡魔
好多年無轉工嘅白加煎,上次揾工時嘅世界比宜家純樸簡單
估唔到宜家會係女人當道,當中仲係女惡魔出籠
雖然白加煎無响啲爾虞我詐嘅環境下工作過
不過咁唔代表就係純如羔羊,白痴如豬,對於閱人總有啲經驗
實在要講出黎告誡一下天底下間嘅小羔羊們
世途險惡呀小妹妹們,要帶眼識別工作!
遇上1號惡魔
第一次見嘅女惡魔係金鐘區,某外國投資銀行嘅人仕部高層
白加煎去見ADMIN職位,工作由AGENCY介紹
人工用市價來看就好似係高少少,不過只有12個月糧,咁計落就唔係高人工
每星期返5日,每月有一個星期六要返工開門俾清潔公司大打掃
暫時唔係長工,無法享有公司福利
只有跟勞工處嘅基本僱員福利,即係做滿1年有7日大假,雙方7日通知可以結束僱員關係
最離奇係每月出糧並唔係由哩間投資銀行嘅寶號出糧
而係由AGENCY公司代表出糧,算係由AGENCY公司負責
友人响投資基金界工作,佢話宜家大把哩啲公司
佢地用每年HEAD COUNT做理由,話今年HEAD COUNT用晒
要請人就要暫時唔用公司寶號出糧,就話明年先有哩個員工HEAD COUNT嘅錢
咁哩個方法都令到有啲公司可以長期有員工,但就係一個"非長工職位"
公司慳左好多福利+責任,唔滿意仲可以7日即炒
其實當日白加煎無心做哩啲工,只係諗住唔好太嫌3嫌4
又一半應酬一下個AGENT咁先去見
去到哩啲公司,對於唔係頂級商業區甲級寫字樓出身嘅人黎講
哩啲公司一定係冷冰冰+鴉雀無聲
久等多時,女上司出現,一坐低就話自己好忙
講幾句就交待左哩個職位會由AGENCY出糧,無福利
如果已經無心想做就唔好嘥佢時間再見落去
其實白加煎一開始就已經無心想做,但既然俾左車錢黎到,咁就玩埋個遊戲先走
揾唔到工都可能多一份見識,面談繼續落去
最初係一般廣東話對答,問下以前工作經驗,離職原因
女上司大約响10分鐘左右露出惡魔真面目
跟住係英語測試,女惡魔其中一條用英文發問嘅問題係:
你認為點樣可以跟同事保持到好好嘅溝通,令工作順暢進行?
白加煎即時有啲窒左,心諗:
我有無聽錯題目?唔通答佢放工後同啲同事去卡拉OK黎聯絡感情?!
當時白加煎仲要用英文回答,見工總有啲緊張,當時哩題真係無法回答,只好帶佢遊花園
惡魔發現問非所答,佢即時咀角"質"左一聲
坦白講,當時白加煎係心裡詫異,哩個人嘅表現係無禮貌,無教養
佢自細有無被教導過就算幾咁不滿眼前人,都唔應該咁樣當面向對方以示不滿
哩個時候,白加煎心裡出現了"穿PRADA的惡魔"嘅梅麗史翠普
(後來向友人講述哩件事,友人們已經講:我係你嘅話,佢一"質"我,我已經唔會再見落去,會即走)
咁白加煎又做唔出咁小家,轉頭仲要俾人話係"港女",郁啲就發脾氣
做戲做全套啦!
考完英文就講日常工作,ADMIN離不開要打文件,做FILING
做得投資銀行涉及金管局,真係所有野都唔錯得,唔慢得
惡魔會全天候監視哩位員工嘅工作
同事放响哩位同事枱面嘅文件,超過1小時仲未FILING就係唔得
原因係每份要FILING嘅文件都好重要,唔可以亂放,更加不能整唔見
白加煎聽到有個全天候人肉監察儀器响自己身邊,咁咪好大壓力
乜佢地出好高人工,福利又好到值得冒可能會患上精神病嘅險?
惡魔仲講:公司內有個又係做ADMIN嘅員工,3.5年以來都仲未係長工
不過全公司上上下下,人人都返工返得好開心
惡魔對於開心嘅定義可能係苦口苦面,喊晒咁先為之開心
白加煎唔相信無生活負担嘅人,可以自由嘅人會甘願响惡魔操控下工作
哩個時候"無生活負担"嘅白加煎已經揾緊機會鬆人,想盡快結束遊戲
終於都要推說白加煎唔係銀行界,律師樓出身,普通公司仔嘅工作無咁嚴緊
所以突然轉做啲咁嚴謹嘅工作都可能未必做得黎
終於都有藉口做完哩場戲,成功脫身
大約一個鐘後,AGENT 打電話黎跟進,話惡魔回答係求職者對哩份工作唔感興趣
白加煎有啲奇怪,30分鐘嘅面試,惡魔先後當面做左兩次"質"嘅聲音以示不滿
但為乜又要不滿,但仲考慮要聘用哩個員工
哩個問題响白加煎遇上第二個女惡魔之後,終於解開疑團
遇上2號惡魔
某日白加煎去尖沙咀名店地段嘅寫字樓見ADMIN工,對方係一間從事鞋業嘅貿易公司
5天工作,一年12日大假,有雙糧,工作唔算太忙,無需OT
香港公司嘅亞頭就係哩個女惡魔
好簡單咁填左求職表格,响會議室等左20分鐘,然後哩個亞頭就親自帶白加煎去佢嘅房間
房間入面有家庭生活照片,相片中嘅小孩子似係混血兒
全個見工面談只有10分鐘,哩個惡魔不消3分鐘就露出惡魔真面目
好明顯哩個惡魔嘅功力唔及金鐘嗰個1號惡魔
2號惡魔從無需要白加煎出示公司REF. LETTER
都唔太關心白加煎嘅過往工作經歷,離職原因,其實咁樣已經係好奇怪
一間公司就係希望進行面談去聘用一個適合嘅員工
如果唔需要了解咁就決定請一個員工,咁咪等同如盲婚啞嫁?
或者今日响網上相識,出黎見面30分鐘,傾左一陣咁就話:聽日開始做我親密情人?
繼續落去係考語言嘅時間,先係英文
哩個惡魔用英文問白加煎以前工作為乜會離職
(惡魔嘅英文都只屬普通,唔係流利嗰種,如果佢丈夫係外地人,咁惡魔啲英文仲係爛添!)
白加煎有啲緊張,惡魔轉講英文時佢自己都有啲甩轆
結果白加煎第一次嘅英文回答佢聽唔明,咁再用返同一番話,只係講慢啲咁再解釋一次
惡魔話第一次聽唔明白加煎講乜,相信係佢當時自己講英文講到甩轆
佢個靈魂未回歸,所以無留心聽白加煎答佢嘅英文
之後係考普通話,白加煎以前工作嘅老闆係法國人,所以講英文多過講普通話
白加煎坦言因為少講,所以未必講得太好
惡魔話:咁你試講下!
白加煎問:講咩話題?
惡魔答: 你鐘意啦!你地背左啲咩咪講咩囉!
白加煎當時着眼係哩個惡魔把口可以用賤黎形容
人人見工預先有準備,咁代表求職者重視新工作,希望受聘
公司可以突擊考求職者去測試員工真正實力
何必講到求職者係無能力,只會識得講背左嘅台詞?
回心想:哩個女惡魔响面試過程中,一句普通話都無講過
惡魔讀書嘅年代普通話唔係必修學科
可能當年都無去工餘進修普通話,白加煎遇過唔少哩啲大約50歲嘅職場人
佢地啲普通話都相當嚇死人
可能惡魔自知自己啲普通話都唔見得人,所以佢自己唔用普通話去發問
哩啲又係白加煎响細微細眼事上發現到嘅
當白加煎肯定哩個係惡魔之後,已經無打算會做哩份工
所以成功與否都無所謂,咁就自由發揮隨便用普通話講下自己近期睇左本書
講左少於10句被叫停
然後惡魔話:你啲普通話好過你啲英文,你啲英文真係唔得
白加煎以前返工日日對住個法國人老闆
講英文唔一定好流利,但至少咁多年都同老闆溝通到
相對講普通話次數可能平均一日都無一句,不過仍然有人讚白加煎啲普通話好
其實惡魔係借讚,實情係彈緊白加煎啲英文差
如果白加煎英文好好,非常好,咁都唔會黎做ADMIN仔,至少應該做私人助理啦!
公司ADMIN仔就係要負責接電話,白加煎啲英文俾惡魔咁打擊下
都要知道打電話黎嘅人講普通話嘅多啲,還是英文多啲?
惡魔一聽到就"得"白加煎:我點知呀?又唔係我聽電話嘅!
哩位惡魔亞蟬嘅直接反應又令白加煎覺得佢無教養,連基本禮貌都無
識左好耐都話真性情流露啫
啱啱先認識,哩啲人已經恨不得要盡快表露自己最真實無教養嘅一面
為人父母對仔女嘅身教影响係好大,惡魔應該唔會教育到仔女成為天使
跟住落黎就係白加煎受聘,對方口頭上聘用白加煎,只待稍後來電回覆正式返工日
惡魔講明返工不能遲到,要坐定定响個位度,唔可以成日去洗手間,唔可以打手機.....
平心而論講句,工作量唔多嘅工,有空餘時間真係會攞起手機黎睇下
可能睇一眼都會被有心人指控為篤手機
惡魔越講越忟,白加煎即時覺得仲返緊工嘅ADMIN妹妹應該係犯晒哩啲錯
所以佢應該係俾人炒,惡魔即時請另一個新人返黎接手
請邊個都無所謂,反正唔啱咪再炒,再請過另一個
短短10分鐘面談,白加煎就解碼到惡魔每句說話,每個發自內心嘅表現
果然2號惡魔要向1號惡魔再多多學習先可以煉成"精"
不過白加煎就發現惡魔會不客氣狂踩人,目的係抬高自己
2號惡魔踩白加煎英文唔掂,目的係抬高佢自己,佢認為自己有資格批評別人
不過哩啲小圈子惡魔做唔出殺人放火嘅事
白加煎就覺得相當有趣,一個上司踩人能力不合符,但之後又會聘用哩個人
咁到底佢地公司係咪庇護工場,工場入面全部都係能力不逮嘅人
如果係,咁惡魔豈不是做緊善事積緊福,為天下間能力不逮嘅人提供就業機會?
真係惡魔都有慈悲心囉!
還是惡魔其實係精神病院嘅病人,以為眾人皆蠢佢獨醒?
白加煎當然唔會願意响庇護工場返工,更加唔會想天天出入精神病院
哩啲公司嘅員工福利再好,白加煎都唔會做
見完工之後再遇到敗犬一樣現任嘅ADMIN妹妹,面無表情,完全唔開心
白加煎有同情之心,覺得佢好可憐
當然哩個妹妹都可能係犯過遲到,返工時間去多左洗手間,又甚至係篤手機
唔知妹妹衰乜野,但白加煎只係接觸過2號惡魔後都認為2號惡魔本身自己都大有問題
一個唔會控制一下自己情緒,即係EQ低嘅人唔會係行為正常嘅人
不過人生就係一個經歷,累積經歷會令人成長
為乜白加煎見完哩份工唔會考慮做,但都一樣有好多人會願意做哩份工
唔通惡魔响佢地面前成功裝扮成天使,只係白加煎咁好彩見到惡魔嘅真面目?
好大可能其他妹妹就係俾其他條件吸引
5日工,返名店區,12日大假,工作量唔多,人工俾到自己要求嗰個<<<咁已經係一份筍工
所以一定有人被哩啲條件沖昏頭腦,一時間忽略左惡魔嘅真面目
可能被人炒嘅ADMIN妹妹宜家後悔緊,悔不當初
錯選一份工作,之後為自己往後嘅職途上記下"被炒"嘅烙印
要有段時間先可以洗底,可能有啲公司永遠唔會請哩啲員工,市場上大把人可供選擇
真係唔知惡魔會點樣寫份REF. LETTER,女人可以好毒
惡魔更加係惡毒先係惡魔
如果哩個ADMIN妹妹只係响庇護工場返左幾個月工都還好
大不了當哩幾個月無返工,所以無REF. LETTER,都唔好見新工時俾人知係被炒
其實揾工都要好小心
切勿盲目選工,影响一生!
沒有留言:
張貼留言