2010年一個人日本之旅DAY 1@東京(不思議之旅~出發!)

 

9月5日(星期日),東京天晴 

 

响機場安頓好"一家大細(行李)"之後,就要揹住個"細仔(背囊)"走難式咁踏上征途

(無講錯,絕對係展開"走難式之旅")

由機場快速閃去新宿搵高速巴士站 ,對於東京興趣不大既我,响東京都似個大鄉里出城

而呢個新宿站,從過去到現在(相信到未來)都係令我相當迷惑

話説當年去日本17日旅行,尾站停東京8日



住响大久保,出出入入都係新宿,但8日以來都係不停响新宿車站迷路

尤其係坐完電車要搵啱出口出地面,真係難過登天  



咪睇我好似咁夠胆响日本橫行.......  

   

就算我响日本係天不怕,地不怕,我都怕左呢個新宿站  

行人多,汽車多,列車多,車站出口又多

繁忙時間响呢度就好似俾後面d人推住行咁樣,我實在係好怕

其實我係患有"人群聚集恐懼症"架!

(道高一尺,魔高一丈.......如果我係"道",咁新宿就一定係"魔")

 

所以响機場搞掂晒d野之後都不敢怠慢

為免誤左上車既"吉時",即刻拿拿林趕去新宿

話咁快就搵到巴士站,皆因"路在口邊",問人咪得囉!

 

最初計劃行程時,本來係打算由大阪出發,不過大阪既高速巴士班次一定唔及東京既頻密

結果為左彈性安排行程,咁先改由東京出發

由新宿去飛驒(讀音:陀)高山既巴士,一日有五班

呢次我係坐09:00出發既巴士,預計到埗時間係13:30

因為呢日係星期日,都唔少人响度等上車

本來我以為會有好多人去飛驒高山,點知又唔係喎,全車大約只有一半乘客

 

高速巴士既車票,一早就响網上用信用咭俾埋錢,今次係我第一次响網上用信用咭訂日本既車票

唔係好肯定上車前有無需要換返張正式車票(好似JR PASS咁)

所以去到車站就先問左呢個問題,結果係用呢張自己印出黎既車票就可以上車



落車時司機先會收左張車票

 

巴士响09:00開車,坐到去平湯溫泉都已經係13:30,原先係計劃去mister donut買定路上食糧



但剩返30分鐘時間就到08:50既上車時間 ,而我實在係怕左呢個"魔鬼新宿區" 

雖然我大概知邊度有間mister donut,但都要搵架喎

最後為免誤左上車時間,都係決定放棄,結果係兩手空空咁上車

唯有寄望中途停站時可以買野食醫肚

上左車聽到司機叔叔話巴士上有洗手間唔係卦?!

咁即係沿途不停站飛車呀?!咁實餓死我都得啦!   

我嗰個响3萬尺高空上品嚐既早餐已經係05:00既事喎,要捱到13:30去到平湯溫泉先有得食?!



咁仲唔係開始左名乎其實既"走難之旅"?!

 

巴士準時開出上車之後,"周公"都開始响我身上發功..... 

斷斷續續地昏昏入睡去本來都有覺好瞓既,直到我遇上佢.......

 

守規舉既日本人,有時真係會令人又愛又恨既

因為今次唔係尾站落車,所以我無將"細仔"交俾司機

費事落車時要等佢摷番件行李俾我,要知道我個行程有幾咁緊湊先得架!

又諗住架車咁"吉",其他乘客都係一人霸兩座位




咁應該唔會有人坐我隔離卦

所以"細仔"一直都放响我隔離,直到巴士去到尾二既乘車站

呢個乘客係一個身型嬌小既後生女仔,就係佢訂左我隔離個位

為左佢,我唯有將"細仔"放响我腳前(頂住我對腳)

本來我諗住當去埋最後一個乘車站(八王子站),唔會再有人上車時

睇怕呢個女子都會轉另一個位坐,事實上我地前面既座位係"吉"既

不過佢真係守規舉到令我當時响個心入面"供奉"佢,繼而係想咁樣對佢




佢全程都堅守座位坐响我隔離 

睇佢身高應該得5呎,所以佢坐得相當輕鬆仲可以"轎"腳坐

但係我就辛苦囉,腳前有個身型唔細既"細仔",結果全程就係咁屈住黎坐

明唔明白一個人又眼瞓,又肚餓,仲四肢唔舒服之時係咩心情架?





    

由呢一刻起,我已經開始嫌棄緊呢個"細仔"阻手阻腳 

其實直到宜家我都唔明為咩只係帶左4日既日用品

無手提電腦,無搞晒花臣既攝影器材(只有天下間被稱為最蠢既相機)

比較有份量既都只係一枝重1.2kg既相機腳架,同一叠旅行資料

但呢個"細仔"都重到令我......我慢できませんでした(忍無可忍)!

我開始萌起要"棄嬰"既念頭

 

司機直踩左3個鐘頭之後,總算有個中途站俾人落車休息一陣

真係多謝呢個中途站哩個諏訪湖位於長野縣既中央

 

睇下天色幾好,風和日麗

落車就順便要醫肚,結果買左個日本人好鐘意既"蜜瓜包"  

不過呢次係食"蘋果包",其實205 yen一個麵包都真係相當貴

俾多一倍價錢就可以食件靚蛋糕,相比之下日本既麵包真係好貴

貴得黎又唔見得有乜咁特別喎

 

終於坐左4小時30分鐘既高速巴士,咁就由東京"呼"到岐阜縣(平湯溫泉)

用相同既時間,都足夠由香港搭飛機去到東京 

不過睇返個地圖,都實在唔好睇少高速巴士,佢令我諗起到多啦A夢既"隨意門"







原來係會咁不可思議

 

當我一諗到朝早仲同我一齊坐飛機去東京既香港人,佢地應該係半夢半醒(殘樣)狀態咁




响東京某個地方shopping緊或者係食緊午飯時

而我已經"呼"左去岐阜縣,俾清新既空氣同埋群山包圍住我




呢個感受絕對係"不可思議" 多得呢架高速巴士,雖然都唔係由頭瞓到尾




但斷斷續續咁都瞓左幾次 

落車時總算似返係一個人,而唔係死屍(行屍酒肉)一樣

今次呢個安排絕對係100分,就算係坐零晨機都總算坐得舒服

 

高速巴士(東京出發), click here~