2010年一個人日本之旅-DAY 2@長野縣-上高地(大正池,千丈沢)

 

  

 9月6日(星期一),長野縣上高地,上午天晴下午大致天陰

 

 

 

 

晨早6點已經起身梳洗,連旅館都未開餐,已經响外面逛左一陣 

鄉間既晨早對我黎講係相當珍貴,可以見到眼前咁大座山,心情都豁然開朗呀!

離開旅館之後,揀左搭08:30响平湯溫泉出發去上高地既巴士

呢度連買車票都可以用自動售賣機,非常方便

 

由平湯溫泉去上高地坐巴士只係大約25分鐘

不過我今次並唔係坐巴士去到上高地巴士總站,而係响尾三既巴士站就要落車,由大正池開始"艱辛之旅"

皆因為我仲有一個"邪魔(じゃま)"既細仔(背囊) 

我要一直揹住佢 去到上高地巴士總站先會有"托兒服務"

由大正池行到去上高地巴士總站,大約要65分鐘,如果行下又停下又睇下

咁點只65分鐘呢? 

 

呢一次行程我都算係行左2/3個上高地

行程由大正池開始 巴士總站 河童橋 明神池 明神橋

之後就折返去巴士總站

由朝早08:55行到下晝3點半,仲全程係無停過,亦都無坐低過

可以咁樣不停行足6個半鐘頭,自己都懷疑緊當時係咪鐵人上左身? 

 

大正池至河童橋呢段路係最多遊人既,有d人會選擇响大正池落車

行到河童橋既巴士總站就搭車離開 

而河童橋就係全區最多人既地方,手信店,餐廳都聚集响呢一區

更多旅遊巴士只係黎到河童橋,俾d團友落車影相 

咁就坐返車離開

呢個方式就係旅行團既"上高地"遊喇!

以前因為駕私家車到上高地"河童橋"一帶既人太多

連停車場都唔夠泊車,咁就由1975年開始全面實施禁止私家車駛入呢一區

 

响呢度凡係"廢"野都係禁止既

私家車輛既廢氣?! 禁!   

  私家車請停泊响沢渡/平湯,然後轉坐公車

香煙廢氣?! 禁!  

 

廢物垃圾?! 禁! (請自行帶回泊宿地方棄置)

    廢人?!無話禁,不過唔好死頂黎行,最後搞到好人都變癈人...... 

無理しないて! 

 

响上高地網頁入面見到 "將來計劃從沢渡至上高地鋪設隧道式的登山鐵路"

咁上高地會唔會變成另一個立山黑部呢?!

到時豈不是會全區都旺好多,咁咪無左宜家呢一份寧靜閒適囉?!

唔該唔好再搞觀光吊車喇 

呢一帶仲吊唔夠呀?!新穗高同立山黑部都已經有吊車,仲黎?!

日本阿爾卑司山一帶都係季節性咁開放

上高地同立山黑部一樣,响冬天係會封山

每年4月27日係上高地開山祭,11月15日係上高地閉山祭

要去上高地行山既話,就要好好珍惜由5月至11月呢6個月喇! 

嚴冬既上高地只係一片白茫茫

 

上高地官方網頁,click here~

 

今次呢個日本之旅既主角終於都出場, では 始めましょう! 

由"大正池"開始計起,去到"田代池"係1 km

田代橋係2 km,河童橋係3.5 km,明神池係7 km

仲要再計埋回程嗰段路呢,咁即係呢一日我一共行左幾遠呢? 

至少係有10.5 km 

 

由大正池巴士站落車,咁就正式出發!

大正池巴士站

 

 大正池

當巴士駛到大正池呢度時,响我眼前就係呢一片仙境

呢個就係上高地俾我既見面禮,呢d霧氣俾太陽晒左一陣之後就會消失架喇!

借用網上影片

梓川係貫穿上高地既河

 

1915年6月6日, 由於燒嶽火山噴發, 大量的泥石流將梓川攔截,

從而形成該池塘. 樹木被水淹沒後僅剩下乾枯的樹幹,

形成具有夢幻景象一般的枯萎樹木 

當被霞光或朝靄所籠罩時, 形成夢幻般的景象,加上在天氣晴朗時

燒嶽與穗高峰巒倒映在湖面上,可謂是上高地極具代表性的美麗景觀. 

咁即係呢d水中枯木係死於1915年6月6日?

 

千丈沢

........百年枯樹呀!

 

 

下面呢張相既標題係-仙境中有個乞兒婆 

今次揹住呢個重背囊令我係完全感受到各位媽咪懷胎10月既"苦況"

呢個係背囊,仲可以放低一陣黎休息一下

但如果呢個確實係一個肚中嬰兒既話,咁就點都唔可以除低一陣黎休息一下

各位已是人地媽咪們,你地真係好"偉大"呀,向你地致敬!

下面呢張相,點睇都覺得上面個洞係肚臍,咁下面嗰堆菇菇又似乜呢? 

哇!一拖3呀,奇觀呀!......眼看好喇,手勿動呀!佢係受保護架!

 

呢條片啱啱好就係由大正池去到河童橋,借黎一用!

下面呢d相係網絡圖片

响上高地會見到一d 拍友,無懼瞓地碌街都係想影到靚相

呢d相只有一個"靚"字!