2010年一個人日本之旅-DAY 1@奧飛驒溫泉旅館(山莊湯乃里)

 

 

9月5日(星期日),岐阜縣奧飛驒(平湯溫泉),夜  

 

一個人訂旅館既話,選擇唔會太多,今次平湯溫泉既旅館係經"樂天"同"jalan"訂

我既心水係房租預算10000yen左右 ,仲必需要包括早餐

結果"樂天"同"jalan"都各有一間係比較合我心意

樂天"旅館"   JALAN"旅館"  

(1) 出租房間   29間   vs   12間

(2) 旅館位置 車站徒步 4 分鐘   vs   車站徒步 5 分鐘

 (3) 風呂 (附有貸切風呂)   合共3個   vs   合共3個

(4) 食事   朝食+夕食(飛驒牛)   vs   朝食

(5) 私人馬桶    有   vs   無

(6) 洗白白   大浴場   vs   浴場

(7) 價錢(日元)  11550 (1泊2食)   vs  7350 (1泊1食)

 

因為一早就預計到呢一日,我响新穗高既午餐會係比較遲先食

睇怕夜晚都唔會點樣肚餓,求其零食甜品醫肚都可以

再加上晚餐只維持係6成飽兼謝絕五穀類,所以對"夕食"就無乜要求

  而飛驒牛 我又無興趣.......  

如果為左個私人馬桶 而要俾多4200 yen,咁個馬桶又確實係太貴
 

所以最後當選既係jalan網站所介紹既"山莊湯乃里"

 

雖然唔係大規模既旅館,但內裡都相當"骨只"企埋乾淨 

 

呢次係我第二次自由行時入住溫泉旅館

上一次係响高山住溫泉旅館,規模比呢一間大

不過經過上次既經驗

我反而認為規模較細既旅館會比較適合一個人入住

大旅館就係住客多,浴場多人,食堂多人,撞口撞面都係陌生人

尤其係食飯時間,其他枱都係同相識既人一齊暢飲食飯 

而自己得一個人時就會顯得有d "寂しい"既感覺

 

好彩既係日本人唔似香港人

佢地唔會用異常眼光咁擺明打量/背後議論嗰d行為有別於佢地既人 

 乜自己一個人出門去日本"山卡啦"地方旅行,咁係有問題架咩?!

 

不過即使係d日本人唔會當面對有別於佢地既人投以奇異目光

但一個人食飯始終都係好自然咁會食得快d,唔會慢慢嗒

其實咁似係為左醫肚 多過似係品嚐/享受

細間旅館點都係住客少d,咁食堂熱鬧極都係有限



咁自己都唔會咁容易有d寂寞感

 

除左食之外,黎到溫泉旅館當然要考慮埋浸溫泉啦!

住客少d,咁自然同陌生人共浴既機會都會細d

呢間旅館都有"貸切風呂",使用前要預訂,不過貸切風呂係為一家人共浸溫泉而設


如果唔係一家人,咁就要用返一般浴場

呢度既浴場,溫泉都唔錯呀! 

至少呢個浴場同溫泉既規模比起我上次响高山住嗰間溫泉旅館仲要大

但其實高山嗰間旅館比呢間"湯乃里"仲要大

所以上次用浴場都有少少尷尬,就係因為住客太多,而浴場又太細

無辦法既~平湯溫泉出名就係溫泉

相信就算係再差嗰間溫泉旅館,都會似返樣,情況不至於會太劣

 

香港人唔係好慣同陌生人肉帛相見

其實我以前跟團去日本時都唔會浸溫泉

唔慣撞到團友一齊浸,咁咪索性唔浸囉!  

不過開始响日本自由行之後,就無咁抗拒用大浴場

 其實宜家仲有d 鐘意浸溫泉 ,並唔係因為覺得浸溫泉係好舒服

我反而鐘意嗰種地道風味

不過如果要一大棚女仕齊齊用浴場,齊齊浸溫泉

我都係會唔太願意(始終都係唔慣)

 

所以從來我安排行程,要訂旅館住既話

咁一定會避開响星期五,六或者係祝日黎訂房

日本人都會想响週末時黎個溫泉旅行,咁旅館通常都會多住客

因為咁我先會刻意安排入住平湯溫泉既呢一日係星期日

全個觀光區都即刻少左好多人


因為多數人响溫泉旅館歎左一個星期六晚上

咁星期日下晝就係要收搭心情返屋企


準備星期一返工返學去,全個觀光區都即時回復平靜

呢個安排絕對係好 

所以呢次住溫泉旅館真係舒服好多,人客少d都安靜d

 "女湯"完全係我自己一個人包場,絕對係爽!

 

以下既相片係响離開旅館之前所補拍既

 

 

 

呢度仲有一個細細既戶外溫泉,就係俾貨切溫泉用

如果無人訂用,咁响"女湯"都可以走出去,不過當晚入夜後實在係有d 凍 

再加上戶外有唔少"蚊滋"所以都係用番室內溫泉好d

以我唔係日本人,都唔識得分邊間旅館既溫泉水好d,純正d

咁唯有係靠服務,食物,乾淨.....等黎評分

 

見到呢個玄關位放左幾多對鞋,咁咪大約知道有幾多個住客囉!

 

 

响呢度揀左1泊1食,晚餐可以好求其,但早餐就唔可以唔食

更何況第二朝一早就要去上高地行山,咁當要係要食飽飽先有氣力上路

原先仲以為岐阜縣既溫泉旅館,每餐都會有朴葉味增


但原來唔係既....

是日早餐就係最傳統既日式早餐

雖然無朴葉味增,但都唔錯,至少都係食飽左先出發

 

 

揀呢間溫泉旅館的確係無錯既,細細間無咁商業化

老闆娘都有多d時間同客人傾下偈

佢知我係一個女子由香港黎,又知我一個人去上高地行山

臨走之前,佢再三叮囑我路上要小心

雖然呢d可能只係門面既客套說話

但當一個人在途上時就係會對呢d說話感到窩心

鄉間既生活,令人與人既距離拉得近左

至少鄉間既悠閒生活令到佢地重視人與人既關係

所以老闆娘都有時間同我閒聊一陣,又好有耐性咁聽我講d"屎"日文

又好寬容咁讚我d日文係"上手"  

又俾人讚的確令我又鬆毛鬆翼左一陣

宜家無再返學讀日文



無晒d測驗考試黎鞭韃自己,全個人好似漏晒氣咁

但俾人讚我d日文"上手"時,好似即刻有"回魂"作用

 我絕對相信"有志者,事竟成"呢個信念既

これから、頑張ります 

 

 

   山莊湯乃里旅館網頁,click here~