2009年秋天一個人踏上16日的日本之旅
遊記就由去年10月中旬寫到今年2月中旬先完結
寫旅行遊記的確係可以記低當刻既事情同心情
今年2月到9月,相隔7個月,又再起行去另一次日本之旅
感覺上真係好快,事實上2009年旅行中既點點滴滴
有d仲係記憶尤新咁响我腦海入面,乜咁快又一年架喇?! 
寫blog的確係可以有效防止出現"(邁向)中年失憶症"既症狀
呢次出發去旅行之前,感覺上同以往係完全唔同
上機之前一日,我都仲係懷疑緊呢個行程到底度掂未架 
所以呢次行程响出發之時,我係以"甩皮甩骨散收收"黎形容
之所以會搞到咁,係因為菲律賓嗰件新聞
嗰段時間我正要如火如荼咁安排好每一處既行程
但係一上網就係睇到無數咁多新聞 
搞到度度下行程時,又會click去睇新聞,完全係無專心黎度行程
所以臨到出發前都令我好懷疑呢個行程係咪掂架喇 
即使當時係有懷疑,但都仲係無心情認真咁去再睇一次個行程
去到日本之後,完全無令我諗起香港既事
行程上半部,由到埗東京就即刻趕搭高速巴士去岐阜開始
直到我離開金沢回歸大城市(大阪)之時,我先記返起香港既事
(我甚至乎唔記得左自己响香港係有份工作,我老闆係邊個?)
响日本酒店上網,我係完全謝絕香港新聞 
上網只係快速睇電郵 
繼而係極速咁閃返房間睇電視同食野
我真係玩得太投入喇,投入到出現短暫失憶 
其實玩都咁樣都係第一次
感覺係非常之好,可以咁樣短暫忘記香港既事,呢種感受實在係太好喇 
可以一個人去旅行,實在太美妙喇!
一度俾我懷疑緊係咪"甩皮甩骨散收收"既行程終於都無大錯咁完成到
感覺上就好似成功做完一個大project可以鬆一口氣咁樣 
之前無數夜晚"挑燈夜度"行程 
結果係換來大滿足感 
諗返以前每一次既一個人之旅..... 
每次都係帶住一個生晒"毛"既膽,再擔住半桶水都唔夠既日文上路
第一次初試牛刀落腳在大阪,當時俾自己既第一份功課
就係要坐新幹線,由大阪去倉敷,呢次純粹係為下次去日本做準備
嗰時已經決定左下次再去日本,就係要用全國JR PASS走訪更多地方
就係咁樣自己一個女仔坐新幹線來回倉敷同大阪 
第二次再去就用左7日全國JR PASS
遊歷左岐阜縣(高山,白川鄉),山梨縣(清里高原),長野縣(輕井沢,中輕井沢)
經過左呢一次,我先知响日本國內旅行除左坐JR,仲有其他更好既選擇
話說當年我坐JR到達高山站時
就俾我發現左原來有高速巴士往來東京,大阪,名古屋等各大城市
而且價錢比起坐JR大約會便宜40% 
當然坐巴士既時間會比坐JR長d,但以我呢d從來唔鐘意趕頭趕命咁去旅行既人
其實坐高速巴士都幾舒服
反而我唔多鐘意坐長途JR,雖然話有PASS好似抵用好多
一買左張PASS就好似想用到佢盡,用到佢最抵
不過為左要"抵"而要我急急腳咁"趕" 
仲要綁手綁腳咁限住時間,咁我寧願唔用喇
我認為JR PASS同宜家响超市買野差唔多,迫人一次過買幾件野先會有優惠價
如果本來係無呢個需要買咁多件,咁呢d優惠價都只係多餘
不過人的確有貪便宜既心態,反正都係要用
只要感覺上係可以平d,咁都唔介意一次買幾件返屋企擺一段時間
不過我真係介意"蜻蜓點水式"咁樣去旅行 
去旅行唔只係去遊歷景點
如果只係為左咁,倒不如睇旅遊書/睇旅遊特輯
專業人仕影既相/拍既片,一定會靚過我影既
唯有放慢腳步輕輕鬆鬆去旅行,咁先會有機會發掘到意料之外既事
難怪有d人會响自己心情煩燥時選擇出門遠行
可以暫時離開一個"煩惱根源之地",都會容易d令自己出現新思維方向
都市人每日都太趕,太忙碌喇
可以暫停慣常既生活模式一陣間
好好享受一下咁難得既輕鬆,咁先係有質素既生活 
所以以金錢角度 
加上期待開放式思維既旅行方式
加上期待開放式思維既旅行方式
咁都係坐高速巴士啱我,尤其係宜家d日元滙價咁高,都係坐高速巴士好
為左要學下坐高速巴士,上年我去北海道時,就係坐高速巴士由札幌去函館
而今年呢次去岐阜,長野一帶既山區玩
其實並唔適合用JR,呢一帶既山區係用巴士貫通既
無理由為左個JR PASS而要兜路咁玩,有時間都唔係咁嘥卦 
所以今次全程係坐高速巴士,先由東京出發
第一站係香港(零晨機)直飛東京羽田機場 
隨即上高速巴士去岐阜縣
第二站係岐阜縣(新穗高,平湯溫泉,上高地)
第三站係長野縣(路經松本去立山)
第四站係石川縣(由立山路經富山去到金沢)
第五站係大阪府(由金沢去大阪)
因為行程最後响大阪逗留3日,所以行程上半部係用4日時間遊畢岐阜,長野,石川
呢個安排絕對係趕 
尤其係响立山黑部呢一段
回想返呢一日既行程,趕到令我對呢一日既行程係印象模糊 
所以當腳步太急趕時,只會錯過好多野,嘥晒!
以後我都係寧願逐少部份咁玩,都唔會選擇太趕,咁樣實在係無意思
沒有留言:
張貼留言