9月5日(星期日),岐阜縣奧飛驒-新穗高,大多數時間天晴
"呼"到入岐阜縣,終於都開始"走難式"觀光喇!
日本既巴士出左名係準時,正常情況之下時間既差誤唔會好大
而我由新宿去到岐阜,時刻表上係預計13:30到達平湯溫泉
落左車之後,我就要即刻接下一班响13:40開出既巴士去新穗高
咁即係我大約只有10分鐘時間就要仆到上巴士
如果唔係就要响呢度呆等一個鐘頭,先有下一班巴士
响高速巴士上就已經萌起要"棄嬰"既念頭
我一心諗住先响平湯溫泉巴士站拜托coin-locker幫我"托兒"一陣
可惜好景不常,响高速巴士落車之後,嗰架去新穗高既巴士啱啱開始上客
咁即係無得揀要仆去買車票上車啦!
上氣唔接下氣咁上左車,後來先發現好似係落車先俾錢都得
咁做乜要趕頭趕命呢?趕乜呢?
仲錯過左可以擺低個"細仔"既機會添
急趕住咁樣去旅行
,真係會令人思想麻木
,真係會令人思想麻木 等同係一個機械人,只識得跟住已設定程式行動,但就完全無思考
好彩到左新穗高之後,終於都趕完,是日行程都無必要再趕
其實我已經係由到埗東京羽田機場開始,就似個"機械人"
思想被麻木左咁只係知道要趕車。趕車。再趕車...
新穗高巴士總站就係呢個"登山指導中心"門前
呢度只係營業到4:30pm,真係相當嘆
突然之間好羨慕呢d咁休閑既鄉間生活
既可以有工作(唔係耕田),但又唔係d 忙。忙。忙......既工作
鄉間既年青人就極力想出大城市工作同生活,我呢d自出娘胎就响城市生活既人
不知幾恨可以過呢d咁有質素既悠閒生活
其實宜家有internet,真係足不出戶都唔會同世界脫節
咁如果可以响呢d鄉間生活,真係幾唔錯呀!
响呢度終於又見到救星喇.....有"托兒中心"呀!完全係有甩難之感
撇低左個"細仔"之後,終於都可以輕輕鬆鬆,自由自在咁欣賞眼前美景
黎到新穗高係坐吊車上山既,今年呢度仲係40周年添
吊車分開兩段: 第一段係(新穂高温泉駅～鍋平高原駅)
第二段係(しらかば平駅～西穂高口駅)
如果只係坐第1段吊車,咁來回車票(大人)都只係400 yen
不過如果坐晒兩段既吊車
咁全程來回車票(大人)就係2800 yen,都真係相當貴
不過黎到呢d高山就係為左睇非一般山景,咁就係要上到高山上先會睇到架喎!
2800yen?! 一定要俾! 呢張車票係兩日有效
第一段吊車係單層,同埋車程比較短,風景都比較普通
所以車費都係"平得有道理",呢度雖然滿左40歲,但佢仲算新淨,一d都唔殘舊架!
呢個係中途站:-鍋平高原駅,响呢個高度望上山就係咁樣
第二個吊車站就係しらかば平駅
响呢度有間食店"あるぷす"係食鄉土料理,咁即係有岐阜好出名既"朴葉味增"
原先計劃中係諗住黎呢度食,"厚くカットした和牛の朴葉みそステーキ定食"
不過就係响"趕。趕。趕....之下,乜都唔記得晒,咁就錯過左喇!
岐阜既飛驒牛肉同朴葉味增都係相當有名,上次去岐阜時都已經食過
飛驒牛肉呢~我就覺得無乜咁特別
(因為我會搵神戶牛黎同佢做比較,根本級數都唔同,咁樣比較都唔公平)
反而係朴葉味增就相當唔錯
第二段既吊車就係雙層吊車,不過我兩次來回都無刻意黎等坐上層吊車
借人地條片一用先~
錯過左去食朴葉味增,所以是日午餐都只係响西穗高口駅內搞掂
諗返轉頭,呢一餐係我全個逗留响日本既行程中,唯一既熟食正餐
往後既日子,我一係食生野,一係就係甜品零食醫肚 
响日本時就係咁樣無餐正經飯,如果係有既話,都係食"野人餐"
呢一餐與其話係午餐,咁不如話係下午茶餐咁會啱d
皆因開餐時間已經係3:30 pm
呢度都有用飛驒牛做既食物,不過免治肉係食唔出肉原來既質感
除左免治飛驒牛肉之外,都有原片飛驒牛串燒,我當然係無幫襯啦!
是日呢個堪稱為全個行程中最正常既一餐
就係咖哩烏冬+飛驒牛コロッケ
今年年滿40歲既西新穗高吊車站入面 ,都有一個設計同佢年紀相當合襯既食堂
呢d仲唔係80年代既室內擺設
醫完肚就係觀光時間,呢個西穗高口駅既屋頂就係展望台呢一層既總高度係2156 m
响新穗高望到既呢一連串山脈之中
最矮既係鍚杖岳-2168m,咁即係同呢個展望台既高度差唔多係平排
如果天氣真係十分好之時,咁就會見到一連串山脈既山頂
呢一日雖然天氣好似唔太差,但其實老天爺久唔久就面燶燶响度鬧情緒
展望台上既遊人
响山頂呢個2156m既高度咁望,真係令人心曠神怡
當人可以咁樣間中走出日常生活既常規,可以慢慢hea下,發下夢
咁大有可能會有意想不到既"開心大發現" 
今次去左3個地區(新穗高,上高地,立山黑部)都係去睇山脈景色
綜觀呢3個地方,我會覺得新穗過並唔係咁特別
因為3日都係睇山,而坐吊車既價錢確實係唔平,所以我會認為唔去新穗高都唔算係可惜
我覺得新穗高呢個地方
只係為奧飛驒(讀音:陀)溫泉區帶黎一個比較有規模既景點
不過呢次為左要去上高地,又係有需要响平湯溫泉住一晚既
沒有留言:
張貼留言