文章日期：01/17/2010 06:11 pm
人食人讚既雪莓娘
食過佢既人都好似中晒降頭咁
不分國藉,年紀,性別,大家對佢都趨之若鶩
話說呢輪市面上有韓國黎既士多啤梨,每盒大約$17-$20
味道又真係拍得住日本d甜士多啤梨
結果又搞到我技癢到要趁買到好味既士多啤梨
咁就做半日雪莓娘奴隸
整下呢個人食人讚既甜品黎同d同事,朋友分甘同味啦!
32個雪莓娘,足足搞左我5個鐘頭有多,整蛋糕都無咁花時間
完全係"嘔心瀝血"之作
所以呢樣甜品真係"十年唔逢一潤"先會肯整
(食神都真係"十年唔逢一潤"先會黎)
前幾日d同事一聽到我話整雪莓娘,佢地當堂雙眼發光咁期待
不愧係經我呢個"百彈齋主"多番訓練之下
佢地都變成識食之人,今後前途無可限量!
呢個雪莓娘個樣又係無乜特別,不過真係絕頂好味
如果"外表"同"內涵"要我揀重要次序
咁我會好實際咁要"內涵",真材實料先係最重要
講起呢個雪莓娘,又係有一個關於大阪既故仔
2006年既某一日,小妹响大阪難波d商場shopping時,就見到呢間舖頭
走埋去趁下熱鬧先
原來係雪莓娘
日本d甜品咁好味,もち又係日本人既"自慢"食品
(もち即係草餅等"煙un糰子"食品)
咁真係無理由唔買黎食喎,況且一件都係200yen
當年既滙率係100yen=HK$6.5左右,好平喎
買啦,買啦!
就係咁樣一食之下就中左降頭
上左癮添!
好味到無話可說,唔識形容
mochi皮軟,忌廉又滑,生果又新鮮又好味
即使係日本原裝正版既雪莓娘,外表都係平平無奇
但內涵就俾足佢200分
日本人用白玉粉做もち,我地用糯米粉
糯米粉有一陣粉味,白玉粉無粉味,但係白玉粉比較挺身(硬d)
小妹呢個雪莓娘(秘技)
食譜,背後又係有一段"血汗史"既,
就係試完又改,改完又試
所以話呢~成功非僥倖,真係要用好多心機架!
好彩呢個雪莓娘一直都有一班"忠實粉絲"
次次做出黎既試驗品,都有佢地全部幫我一掃光
就算係試驗品,都一樣好評如潮
唔係自誇
小妹呢個雪莓娘真係唔會輸蝕過大阪食到既呢一個
不過大阪呢個雪莓娘都已經成為歷史
(所以我講乜都得啦!)
話說2008年又再去大阪旅行,响難波已經唔見左呢間雪莓娘店
當時返到民宿就問民宿太太
民宿太太話响大阪已經好難見到有雪莓娘賣
雖然好好味,但工序多,又唔可以賣得貴,所以利潤唔高
呢盤生意唔吸引人去做
所以要食到好味既雪莓娘,以後仲唔係唯我獨尊,只此一家?!
(blog主果然真係精神有問題既
仲間歇性發作添!有無定期覆診呀?)
响太子站近花墟有一間餅店,間中有雪莓娘賣既
呢個既味道都唔錯,價錢都合理,大約係$10一件(宜家可能加左價架!)
而尖東站"A溫"餅店都有雪莓娘賣,佢地叫"大福"
下圖呢個係$16一件既芒果大福
如果係士多啤梨大福就係$17一件
呢個就真係又貴又扼錢,入面仲要係用士多啤梨碎做生果餡
唔係咁嘛?!
佢地餅店日日都用咁多士多俾梨做餅
駛唔搞到用d生果既頭頭尾尾黎做呢個大福呀?!
(係囉!士多啤梨咁易熟到爛,咁邊忽爛咪切走邊忽,未爛嗰忽咪用黎做"大福"囉!)
佢地一件"大福"賣到$16-$17又咁細件,咁咪仲貴過食一件蛋糕?
唔好當消費者係傻啦!
如果"A溫"餅店覺得無利可圖,咁不如唔好賣,好過咁樣搵人笨囉!
(我覺得佢地志在銷出d爛生菓,好過丟左去咁浪費,有傻人黎買"大福",佢地點都係賺左)
對於呢d咁既舖頭,我係完全唔會幫趁既!
呢間"A溫"餅店既"大福"完全係亂抄一通!
下面呢個先係"大阪正牌雪莓娘"既真身
沒有留言:
張貼留言