一個人浪盪日本2009-Day 13@京都(二寧坂,產寧坂)

 

9月24日,全日天晴非常熱 

 

離開清水寺再行,就係二寧坂(二年坂),產寧坂(三年坂)

據說名字既由來係呢度响大同3年,大同2年開發(即係807,808年)

 

有關「産寧坂」名稱既由來有好多說法,流傳至今大多數既說法,因為呢條街係通往祈求



生產平安既廟宇「子安塔」


所以就叫做産寧坂,「產」就係生產之意,「寧」就係容易之意

 

據說响8世紀(清水寺尚未創建之前),聖武天皇同光明皇后响呢度祈求生產順利


平安咁生左孝謙天皇之後,就响"泰産寺"立下"子安塔"

自此之後"子安塔"就變成孕婦祈求順利生產既塔....總之就係眾說紛云啦!

呢區開發左超過千年以上,雖然呢度d屋唔會係千年前既遺物

但呢度宜家仲保留住古都既風貌

古時傳聞,响三年坂跌倒就會响3年內死亡,又或者縮短3年壽命

如果响二年坂跌倒就會响2年內死亡,或者短壽2年

當日行行下,我隔離個日本中學女生就係响呢度跌低左結果唔會係咁卦?

唔怕喎,絕對有得救!


哩d傳說既目的,可能只係希望孕婦行呢d斜石級去"子安塔"祈福時要格外小心


如果萬一跌倒既話,可以去石級下面既「葫蘆屋」買"解藥"


(呢間"葫蘆屋"背負咁重大既使命,咁咪唔可以結業執笠囉!)

"葫蘆"有「不倒下」既含義,相傳只要帶上呢d葫蘆就可消災解厄

又據說呢d葫蘆原先係用作去清水寺既音羽瀑布時取水之用


但後來就當左做吉祥物

 

响二寧坂有一條幾隱閉既巷仔,就係"お地藏さんの小路"

 

巷仔既入口處就有呢個牌

 

"心の詩画書"仲响呢度喎!


又重遇3年前既佢地喇--地藏小和尚,每個都好可愛呀,而且每一個都手持"至理名言"

至愛名言之一

してもらったことは　忘れない  (接受了別人為自己所做的事,不要忘記)

してやったことは　忘れよう  (自己為別人所做的事,要忘記)

 

可愛既地藏小和尚同每一張"至理名言",都係城たいがさん既作品

 

城たいがさん就好似香港既漫畫家阿虫咁,用漫畫,詩句黎表達人生哲理


同阿虫一樣,佢既作品都結集成唔同既商品出售

今次呢度都有出售城たいがさん商品既舖頭,而二樓就係展覽室

坦白講,城たいがさん既畫功就真係唔算係好靚,但我好鍾意呢d咁有意思既詩句 

就算唔識日文,但睇下d漢字,大概都估到個意思 

城たいがさん

作品既網頁: http://www.jyotaiga.com/

 

响呢條隱閉小巷度,重遇返地藏小和尚已經係好開心


但更開心既係俾我响呢次行程中,第一次遇到佢...


  





其實响東京池袋都有一間賣龍貓產品既舖頭

但今次再去,就已經消失左(可能係執左笠),本來都放棄左會搵到龍貓店

估唔到黎到京都又可以"再度重遇佢"

 

呢間"どんぐりの森"同"心の詩書画"就係响呢條小路既盡頭



如果唔留心,真係响出面行過左都唔知(走寶!)

呢條小巷因為比較隱閉,無人氣時繼續無人氣

但當有少少人氣時,就自然會引埋出面既人唔執輸咁走入黎


八卦/唔執輸既本色,果然係無國界,無種族之分架喎!

本來好清靜咁影緊相時,就突然同時間湧入一班 "8男8女"


    

其實唔止呢四個8人架,仲有一個8小姐,同一個8嬸添!(咁啱俾人遮住左)

一共係 6個    

 小巷既盡頭就有TOTORO可以俾人留影

 

日本人對於官崎峻先生係非常敬重既


而當中以totoro係最受人歡迎,因為佢老少咸宜嘛!

咁佢身型肥肥圓圓咁,又真係好可愛既,連我都係佢粉絲呀!

雖然呢條巷仔比較隱閉

但其實呢條巷仔由頭到尾都有"TOTORO"同"黑貓吉吉"既踪影

留心少少就一定會發現呢條小巷