劇名:救命病棟24小時IV
演員:江口洋介,松嶋菜菜子,中山裕介
(又係江口洋介呀!我承認絕對係有私心)
救命病棟24小時,已經拍到第四輯
呢套戲可以拍到第四輯,咁即係唔會差得去邊
呢套戲之後,江口洋介再演醫生都係做d認真,對生命執着既醫生角色
我已經係由第一輯睇到第四輯
好幾年前香港既"三色電視台"播過第二輯
都因為睇過第二輯,先會令我迷上呢套戲
呢套戲係表現人性光輝既一面
睇完呢d咁認真既日本製作,只會更加覺得香港既電視台製作馬虎
"香港三色台"都做都做過類同題材既戲-"妙手銀針"嘛!
但香港既製作拍馬都追唔上日本啦~講黎都嘥氣!
日本d戲可以唔講愛情,但都寫到好劇本,有高收視,好口碑
但香港d戲,唔談情說愛(仲一定要係"多角戀")就好似無戲好做咁,真係失敗!
新呢一輯播到最後兩集時,正正就係我响日本旅行既時候
我嗰時响日本都有追睇架
雖然唔會聽得好明白(仲講咁多醫療用語),但都係想第一時間睇到江口洋介
都由於係中途先睇,唔知頭,唔知路咁
我仲以為中山裕介今次做奸角添!
戲中佢係醫局長,佢同進藤醫生成日都係對立既
一個話:"全部傷者都醫,來者不拒",另一個就話:"要選擇性咁揀黎醫"
今次有中文字幕睇晒全套戲,先知佢都係"大正派"角色
又係一個好有理想既急救醫生
(中山裕介塊面多左好多縐紋呀
宜家睇落佢仲老過江口洋介呀!陰功囉!)
睇完呢套戲先發覺香港既醫療係政府負責既
大家成日彈唔好,原來比起好多地方,香港真係唔差
日本既醫療係私營既,政府只係作有限度津貼
所以每間醫院為左收支平衡,佢地有權拒絕接收病人(包括急症)
有錢都唔代表一定可以得到治療
戲入面講,有d病人因為被醫院拒收
而超過兩個鐘頭依然係無法送院得到治療
病情越拖延得耐,越難搵到醫院願意接收
因為醫院怕病者結果救唔到,到時仲要俾死者家屬控告主診醫生
呢d完全係一個惡性循環
如果係响香港既話,救護車延誤10分鐘,翌日已經會上港聞版
又會變左做立法局議員要問責既議題
比起之前既三輯,新呢一輯想表達既主題的確比較普通
只係以日本現時醫療既情況為主題
政府對醫療既津貼太低,令到無醫生願意選擇做急症室醫生
人手短缺,現有既急症醫生被迫要長時間工作
工作壓力太大,跟薪金不成正比
死者家屬又動輒都訴諸於法庭,結果流失更多急症醫生
醫院人手不足,唯有選擇性拒絕接收急症病人
如果醫療唔改革,情況只會更加惡化落去
呢個就係呢一輯既主題
一如以往三輯,進藤醫生雖然係相當優秀既急救醫生
但個性上係相當"唯我主義"
(但EQ相當高,除左為病人之外,從無見過佢發火)
所以每一輯都必定有一d角色係由原先唔接受佢,甚至反對佢
但結局又會被佢既堅持同執着而對佢改觀,呢次都一樣
最感人的第四集
實習既工藤醫生由本來唔認同進藤醫生既"全民皆盡心拯救"理念
(即使傷者係自殺為攞保險金既人,進藤醫生都一樣盡力
)
後來變成要以進藤醫生為學習對象
實習既工藤醫生响工地同小島醫生對重傷者進行即時急救
但因為係重傷,結果都搶救無效
死者家屬質疑點解會由一個實習醫生黎搶救一個嚴重受傷既人
而工藤醫生都接受唔到傷者死亡既事實而開始自責,變得沮喪,甚至崩潰
(1月3日先播出街既"特別篇",新鮮滾熱辣咁睇左)
兩個鐘頭既特別篇,前半篇係"返炒舊野",後半篇先正式入題
進藤醫生出差,當日就發生停電事件,後備電源都停埋
咁醫院仲點運作呢?
第1集
第2集
第3集
第4集
第5集
第6集
第7集
沒有留言:
張貼留言